ШКОЛА ТООСЧАТХАННАРҒА - ХАКАСИЯ ПРАВИТЕЛЬСТВОЗЫНЫҢ СЫЙИИ
28.06.2017
Статья
Ағбан. 26 июнь иир. Ағбандағы «Саяны» спорткомплекссер чон илееде чыылысча. Анда республиканың правительствозы «РУСАЛ» паза «СУЭК» компанияларның полызиинаң пӱӱл школа тоосчатхан ӱгренҷілерге «Хакасияның выпускнигі-2017» республика пайрамын иртірген. Мындағ сыйыхты ӱлгӱдегілер ікінҷі чылы читірчелер.
Концерт пасталар алнындох стадионның чазызында чииттер илееде чыылыс парған. Абахай хыстар, иптіг кӧрімніг ооллар кӧңнілерін пір дее чазырбааннар.Анзы пілдістіг, олар иң нандырығлығ тусты иртіріп алдылар, ол ЕГЭ сыныхтағлары. Амды ноға, тынанып, теелбек салбасха! Ӱлӱкӱнге Хакасияның кічіг паза ыраххы аалларынаң, городтарынаң ікі муңҷа школа тоосчатхан ӱгренҷі іҷе-пабаларынаң паза ӱгретчілерінең хада килген.
Ирткен чылнаң тиңнестірзе, пӱӱл ӱлӱкӱн артых ла ирткен. Стадионның сценазынзар филармонияның артисттері, «Хакасияда часхы» фестивальда араласхан Ағбан паза Саяногорск городтарның чайаачы ӧмелері сарыннарынаң паза теелбектерінең чииттернің кӧңнілерін матап кӧдіргеннер.
- Сынап таа, пістің правительство мындағ ӱлӱкӱнні республиканың выпускниктеріне иртірчеткені уғаа ӧріністіг. Пістің пала пӱӱл ідӧк школа тоосча. Ағбанзар концертке килерін ол паза аннаң хада ӱгренчеткен олғаннар чидікпин сахтааннар. Школада выпускной иир ирткенде, олар Россия «чылтыстарынаңар» ла чоохтасчатханнар. Пістің туста андағ улуғ пайрамнар даа чох полған, - сағызынаң ӱлесче стадионзар палазынаң хада килген паба Георгий Чанков.
Пӱӱл республиканың правительствозы Хакасиязар «Quest Pistols Show» группаны хығыртхан. Таныхтирға кирек, пу группа чииттернің иң хынған группаларының пірсі полча. Оол-хыстар музыканттарның сарыннарын чахсы пілчелер, аннаңар артисттернең хада сарнааннар паза теелбек салғаннар. «Quest Pistols Show» группаның солизі Пу группа нинҷе-де чыл мының алнында, «Белая стрекоза любви» сарынны толдырып, матап саблан парған. Спорткомплекстің сценазында пу сарынны олар толдырғаннарох. Ідӧк артисттернің «Санта Лючия», «Непохожие» паза даа пасха сарыннары Хакасияның чииттерінің кӧңнін матап кӧдірген. Орай иирзер чаап сыххан улуғ нимес наңмыр школа тоосчатханнарның кӧңнілерін тӱзірбеен, стадионның тоғынҷылары прайзына чабынҷаң нимелер пирглебіскеннер, ӱлӱкӱн аннаң андар узараан.
Хакасия пазы Виктор Зимин чииттерзер айланған соонаң тигірзер салют атылған. Таныхтирға кирек, Хакасияның школа тоосчатхан ӱгренҷілеріне ікінҷі чылы Россия «чылтыстары» ӱлӱкӱн иртірчелер. Ирткен чылда «Серебро» поп-группа, пӱӱл, тізең, «Quest Pistols Show» группа килді. Хайди айланызында таныхтаан Виктор Зимин, килчеткен чылларда школа тоозар ӱгренҷілерге ідӧк мындағ сіліг концерт иртірілер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде