РЕГБИ ХАКАСИЯДА ТИЛІПЧЕ
23.08.2017
Хабарлар
Ирткен неделяда Ағбандағы «Локомотив» стадионда кӧрігҷілер тығырама чыылыс парғаннар. Чоохтирға кирек, трибунада пос орын чох таа полған. Анзы тиктең нимес. Хакасияда регби спорт кӧрімінҷе Россия чемпионадының пасха орынға сығарылған матчы ирткен. Мында «Енисей-СТМ» (Хызылчар) паза «Металлург» (Новокузнецк) тоғасханнар. «Енисей-СТМ» ээзі полчатханына саналған.
Ноға ойынны Хакасияда иртірерге чарадығ алылған? Хайди таныхтаан Хакасияҷа регби федерациязының толдырығ директоры Андрей Алеев, Хакасияда амғы туста регби чахсы тарабаан. Чииттерні пу спорт кӧріміне тартарға кирек. Ікінҷі сылтағ: Хызылчардағы команданың стадионында тыхтағ тоғыстары апарылча, аннаңар матчты пістің республикада иртірерге чарадығ алылған. «Енисей-СТМ» Россия чемпионы полча. Ирткен неделяда Россия кубогын холға кирген. Амғы туста команда еврочэллэнджте араласча. Сентябрьда Хызылчарда «Енисей-СТМ» Европадағы командадаң тоғыр ойнир. Анзы уғаа танығлығ полча. «Металлург» - чиит команда. Амға теере алты ойында ол пір дее сан ут полбаан.
Ол кӱн Ағбанда улуғ наңмыр чаап парыбысхан. Аннаңар командаларға сидік оңдайларда ойнирға киліскен. Ойын алнында, 17 августта 2009 чылда Сойан-Сус ГЭС-та полған саайда чуртастары ӱзілген тоғынҷыларны хумартхылап, командалар паза кӧрігҷілер пір минута сым турғаннар. Анаң ойын пасталыбысхан. «Металлург» команда ойынҷылары сӧлчік меспекті ойнаҷаң чазы ортызынаң «ыырҷы» саринзар сабысханнар. «Енисей-СТМ», меспекті тудып алып, атакаа пар сыххан. «Ыырҷылары» оларны тут халарға кӱстенген.
Хызылчардағы команданың ойынҷылары, меспекті удур-тӧдір тоғыр пиріп, алнынзар чӱгӱргеннер. Правило хоостыра алнынзар меспекті азахнаң на теберге чарир. Командалар меспекті пыласчатхан туста харбасчатханға тӧӧй пілдіргеннер. Че меспекті пыласчатханының правилолары пар. Командалар оларны сайбабас ӱчӱн чарғыҷылар сизіктіг кӧргеннер.
Регбиде пір тайм 40 минута парча. Пастағы таймның пастағы чардығында командалар саннар ут полбааннар. Арачыланҷаң команда «ыырҷызын» пик тудыбысчаң полған. Тайм ортызында «Метуллург» атакаа чӱгӱргенде, «Енисей-СТМ» правилоны сайбабысхан. Новокузнецк командазы, штрафной сапханда,3 сан холға кирген. Соонаң «Металлург» «Енисей-СТМ» команданың саринда меспекті чазы тастынзар сығарыбысхан. Анзы регбиде «попытка» тіп адалча. Іди Новокузнецк командазы 5 сан холға кирген. Анаң «Металлургка» хаалхазынзар меспекті теберге оңдай пирілген. Регбисттер меспекті «ыырҷы» хаалхазынзар тоғыр салған ағас ӱстӱнҷе тебіскеннер. Анзы «реализация» тіп адалча. Іди «Металлург» хоза 2 сан утып алған.
Кӧрігҷілер сағыбаан ӧрініс поларына ізенгеннер. Пірее туста «Металлург» чиңіс тударына ізеніс полған даа полза, «Енисей-СТМ» 26:18 саннаң утып алған. Ойын салтарларынҷа ол 35 саннаң пастағы орында парча. «Металлург», тізең, ам даа пір дее сан холға кирбеен.
Амғы туста Хакасияда регби тиліпче. Аннаң 100 артиинаң пала айғасча. Олғаннар комплекстіг спорт школазында регби ойнирға ӱгренчелер. Палаңар пу спорт кӧрімінең айғазарға сағынчатса, аны 8(3902)35-20-32 телефон номерінҷе 10 сентябрьға теере пазындыр саларға чарир.
Автор :
Антон ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде