ХАКАС ТІЛІ КӰНІ ХАЙДИ ИРТЕРГЕ КИРЕК
29.08.2017
Хабарлар
Піс Хакас тілі кӱні хайди иртерге киректеңер республика чуртағҷылары аразында сурастырығ иртірчебіс.
Лина ЧЕЛТЫГМАШЕВА, тынағдағы ӱгретчі:
- Мының алнында Хакас тілі кӱннері школаларда иртірілҷең. Ӧӧнінде хакас олғаннар араласчаң. Орыс паза пасха даа нация ӱгренҷілері аралазардаңар пӧгін турған, че кирек киліспеен. Таштыптағы 1 № школада «Ах тасхыл» клуб тоғынған, анда хакас мероприятиелері иртірілҷең.
Тиксі Россияда орыс тілі кӱні иртірілче нооза. Хакас тілінең диктанттар мариин иртірерге чарир. Хакас тілінең иң артых чоохтанчатхан аалларны, чуртағҷыларны ілезіне сығарарға чарир. Чиңісчілерге сыйыхтар читірзе, чахсы поларҷых. Иң артыхтарын хакас газета паза телевидение пастыра даа, адап, кӧзітсе, махтағлығ полар тіп санапчам.
Пётр АДАРОВ, Тағлығ Алтай Республиканың саблығ журнализі:
- Пістің республикада Алтай тілі кӱнін 20 октябрьда таныхтапчабыс.
Сурастырығ Тағлығ Алтайның правительствозы, ӱгредіг паза культура учреждениелері алғым мероприятиелер иртірчелер. Правительство алтай тілінің ағырсымнығ сурығларынҷа чыылығ иртірче. Республиканың хазна университедінің тюркология, алтай тілі паза литература факультеді конференция тимнепче. Драма театрында, Алтай тілі кӱнін пайрамни азып, улуғ ойын парча.
Республика синінде иртірілчеткен мероприятиеде тиксі аймахтар араласчалар. Республика библиотеказы пос тілінең кибеліс хығырарынҷа, чонның писатель-поэттерін пілерінҷе марығлар иртірче. Ідӧк алтай тілінең сыххан книгалар кӧзідии тимнелче, архив кӧп тоғыс апарча.
Мындағ ӱлӱкӱнні ӱсче чыл иртірчебіс, тілге чарыдылған мероприятиелер пір неделя иртірілчелер. Пос тілі кӱні ӧӧнінде олғаннарға паза чииттерге тузалығ тіп сағынчам. Нацияның постың пілінізі ӧсче, тіл паза литература, культура хайраллалча, чон аразында тарадылча. Хакас тілінің чолы хаҷан даа азых ползын тіп алғапчам.
Автор :
Сурастырығ иртірген Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы