ӰГРЕНҶІЛЕРГЕ ПАСТАҒЫ САҢ СЫҢЫРАП ПАРДЫ
05.09.2017
Хабарлар
ПУ ӰГРЕДІГ ЧЫЛЫНДА ХАКАСИЯДА 80 МУҢ АЗЫРА ӰГРЕНҶІ ПАЗА СТУДЕНТ ПАРТА КИСТІНЕ ОДЫРДЫ, ОЛАРНЫҢ 8 МУҢ АЗЫРА ОЛҒАНЫ ПАСТАҒЫЗЫН НА ШКОЛА ИРКІНІН АЛТАДЫ.
АҒБАНДАҒЫ Н.Ф. КАТАНОВТЫҢ АДЫНАҢ НАЦИОНАЛЬНАЙ ГИМНАЗИЯ-ИНТЕРНАТТА ПӰӰЛ 600-че ОЛҒАН ПІЛІС АЛАР, 5-ҷі КЛАССХА 47 ХЫЗЫҶАХ ПАЗА 27 ООЛАҒАС АЛЫЛҒАН. АНА ОЛАРНЫ 1 СЕНТЯБРЬДА ПІЛІС КӰНІНЕҢ АЛҒЫСТИРҒА ХАКАСИЯНЫҢ ПАЗЫ ВИКТОР ЗИМИН КИЛГЕН. ОЛ НИНҶЕ-ДЕ ЧЫЛ МЫНЫҢ АЛНЫНДА ПУ ӰГРЕДІГ УЧРЕЖДЕНИЕЗІН ПОЗЫНЫҢ ХАЙИИНА АЛҒАН.
Гимназияның алнында чазан салған оолғыҷах-хызыҷахтар сіліг кип-азахтығ паза аймах ӧңніг чахайахтығ линейкаа турыбысханнар. Оларның кистілерінде іҷе-пабалары, турып, палаларының ӱчӱн чӱрексіпчелер, че олох туста ӧрінчелер... Кӧӧлҷе чаапчатхан наңмырағасты пірдеезі сизінминчеткенге тӧӧй полған...
Россияның паза Хакасияның гимннері ойнаан соонаң, ӱгренҷілерге ідӧк чӱрекке иң чағын «Школаҷаам» гимназияның гимні толдырылған, хайзын пу школаның полған на ӱгренҷізі чахсы пілче...
Чыылған чонзар Виктор Зимин алғыстаснаң айланған:
- Изеннер, - хакас тілінең изеннесче Виктор Михайлович.
- Піліс кӱні улуғларға даа, кічіглерге дее иң аарлығ паза чарых ӱлӱкӱн полча. Пу кӱнде улуғлар постарының кічіг тузын сағысха кирчелер, олар ідӧк хаҷан-да парта кистінде одырғаннар, кічіглер, тізең, пу кӱнні ідӧк сахтапча поларлар. Школа чыллары наа пілістер аларға, чайаачы оңдайны кӧзідірге иң чахсы тус полча. Че олох туста школа - ол ӱгредіг ле нимес, ол ідӧк ӱгретчілер, нанҷылар, арғыстар, - таныхтаан Виктор Михайлович.
Хакас гимназияда 70 азыра ӱгренҷі 11 класста ӱгренче. Оларға Хакасия пазы, экзаменнерге чахсы тимненіп, оларны турыстыра тудыбызарға паза чӱрекке чағын специальностьты паза профессиональнай ӱгредіг учреждениезін таллап аларға алғаан.
Ідӧк пайрамнығ кӱнде гимназияда ӱр тоғын салған ӱгретчілер Аарластығ паза алғыстас пічіктеріне турысханнар. Іди таныхтатханнарның аразында орыс тілі паза литература ӱгретчізі Августина Аева, тархын предмедінің ӱгретчізі Лилия Ахпашева паза воспитатель Людмила Троякова. Людмила Троякова ідӧк гимназия музейінің устағҷызы паза 5 «Б» класстың воспитательі полча. Ол ӱгредіг киреенде 30 азыра чыл істен парир. Пӱӱл аның клазында 26 ӱгренҷі, прайзы даа ааллардаң килген олғаннар. Ікі ӧӧре, Аня Албычакованаң Ангелина Боргоякова, Асхыс аймаандағы Пилтір аалдаңнар. Аалда ӱгренчеткенде, хызыҷахтар класста иң чахсы ӱгренҷілер санында полғаннар, парта кистінде ідӧк хада одырҷаңнар. Амды, тізең, ӧӧрелер гимназияда пip класста ӱгренерлер паза nip комнатада чуртирлар. Хайди олар чоохтапчалар, пу ӱгредіг учреждениезі оларның кӧңніне кірче. 5 «Б» класстың устағҷызы - Наталья Сергеевна Манчилаева. Чиит ӱгретчі пӱӱлас хазна университедінің филология паза культуралар аразындағы палғалыс институдының хакас тілі пӧлиин хызыл дипломнығ тоосхан.
Хакас гимназияда хас-хаҷаннаң пос тілін хайраллирына, национальнай спорт кӧрімнерін тилідеріне, ӱгренҷілернің чайаачы оңдайларын тилідеріне улуғ хайығ салылча. Ана пу тоғысты Хакасияның пазы Виктор Зимин гимназияның директоры Марина Сагатаеваа аннаң андар узарадарға алғаан.
ПАСТАҒЫ ХАКАС КЛАЗЫ АЗЫЛДЫ
Ағбанның 20 № школазы. 1 сентябрь. 1-ғы класс. 1-ғы урок. Аның темазы - Тӧреен чир-суум. Нимедір ол тӧреен чир-суум, хазна, пос тілі? Аннаңар олғаннарға чоохтапча пасталығ класстар ӱгретчізі Наталья Петровна Шалгынова. Пӱӱл пу ӱгредіг учреждениезінде пастағызын на хакас клазы азылды, анда 24 пала ӱгренер, прайзы даа хыйғаҷахтар, ӧткіннер.
- Иң пастап олғаннарны хакас тілінең чахсы чоохтазарға ӱгрет саларға кӱстенербін. Пу класста хакас тілі сыбыра истілерге кирек. Пастап палаларны ады-солазын орта чоохтирға, хайда чуртапчатханын, сӧбірезінең таныстырарға паза даа пасха нимелерге ӱгредербіс. Ідӧк піс чоныбыстың ӱлӱкӱннерінең танызарбыс, кибірлерін ӱгренербіс. Уроктаң пасха піс «Изеннер, палалар!» кружокта хакас тілін ӱгренербіс. Анда олғаннарның хакас тілінҷе пілізін алғыдарға кӱстенербіс, - ӱгредіг кирее хайди парардаңар чарытча Наталья Шалгынова.
Артём Домогашевті іҷе-пабазы, Виталий Семёновичнең Эльвира Елизаровна, хакас клазына киріп аларға матап кӱстенгеннер.
- Артём пос тілін чахсы пілче, че уйан чоохтасча. Аннаңар, школада хакас клазы азылғанын истіп алғанда, палабысты андар ӱстенгебіс. Ізенчебіс, мында ол тӧреен тілінең чоохтазарын чахсыландырып алар, - позының кӧңнінең ӱлесче сӧбіре пазы.
Таныхтирға кирек, хакас клазында хакас ла палалар ӱгренминчелер. Хохловтар сӧбірезі Антон оолғыҷаан ідӧк пу классха ӧнетін пирібіскен.
- Пала кічігде чапчаң сағыстығ полча. Оларны наа нимее ӱгредіп аларға ниик. Олғаннар кічігдең англия тілін ӱгренчелер, хакас тілін ноға ӱгрен полбасха киректер?! Минің кӧрізімнең, палаа хакас тілін ӱгренгені туза полар. Антонның даа кӧңні пар аны ӱгренерге. Че піс амды хакас тілінең изеннезерге ле пілчебіс, че соонаң пілізібіс алғыдыларына ізенчебіс, - тіпче Антонның іҷезі.
Пӱӱл Ағбанда хакас клазы 20 № школадаң пасха ідӧк гимназияда азылды. Ағаа хоза, 22 паза 24 №№ школаларда пастағызын на ікінҷі хакас клазы азылды.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы