ШКОЛА ПӰДІРИИ ВИКТОР ЗИМИННІҢ ХАЙИИНДА
05.09.2017
Хабарлар
Пӱӱл февральда Ағбанның 6-ҷы микрорайонында наа школаның пӱдірии пасталған. Аның пастағы ӧзегін Хакасия пазы Виктор Зиминнең Ағбан город пазы Николай Булакин сапханнар. Пу тустаң школа полар орында улуғ пӱдіріг тоғыстары пасталған. Олар хайди парчатханын Виктор Михайлович позының хайиинда сыбыра тутча. Ирткен неделяда, тізең, ол орында пӱдіріг тоғызы хайди парчатханын сыныхтаан.
Халғанҷы чылларға городтың пу микрорайонында кӧп наа туралар пӱт парған. Чурт алып, сӧбірелер анда истіг ээленчелер. Оларның палалары ӱгренерге ибдең ырах парбас ӱчӱн, Хакасияның паза Ағбанның устағ-пастаа мында наа школа пӱдірердеңер чарадығ алғаннар.
Хайди чоохтапча пӱдіріг тоғыстарынаң айғасчатхан Хызылчардағы «Град» ООО подряд организациязының прорабы Константин Шапран, мындағ школа проекті Кемеров облазында ла пар паза пір дее регионда чоғыл. Чир тітірезе дее, ӱгредіг учреждение пик турар.
Наа школа 23 муң квадрат метрліг полар. Анда нинҷе-де спортзал, улуғ библиотека, столовай паза 63 - 100 квадрат метрліг 44 ӱгренче. Амғы кирексіністер хоостыра, тізең, 1 - 5, 9 паза 11 класстардағы ӱгренҷілерні ікінҷі сменада ӱгредерге чарадылбинча. Ағбанда палаларның саны ӧсчеткенде, мында ікінҷі сменада ӱгренчеткен олғаннарның саны иң кӧп. Аннаңар пістің республика городта наа школа пӱдірердеңер федеральнай программада араласхан. 1ди пӱӱл пӱдірігнің пастағы ӧзегі сабылған. Мында пір муң пала ӱгрен полар, прайзы иртеннең обедке теере, - таныхтаан Хакасияның ӱгредіг паза наука министрі Лариса Гимазутина.
Наа школада амғы тусха килістірекомпьютер техниказы турғызылар, интерактивнай доскалар паза мебель. Пӱдіріг тоғыстарына паза школаа кирек ниме-ноолар аларына тиксі 900 миллион артиинаң салковай хорадылар. Школа 2018 чыл тоозылғанҷа тимге сығарыларға кирек.
Хайди таныхтаан чооғында Хакасияның пазы Виктор Зимин, пу школа Хакасияда иң артых полар. Ӧӧні - аны кӧрілген тусха теере пӱдірібізері. Анзын Виктор Михайлович тиктең таныхтабаан. Городтың алтынзархы сари чапчаң пӱдірілчеткенде, анда чуртағҷыларның саны ідӧк хозылча. Тӱрчедең мында олған садтары, ӱгредіг учреждениелері улуғ кирексіністе полар. Аны чахсы сизініп, Хакасияның правительствозы городтың 8-ҷі микрорайонында ідӧк наа школа пӱдірердеңер сурығны ӱзӱрче. Ол пу пӱтчеткен школа проектіне тӧӧй полар тіп кӧрілче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы