НАА МИНИСТРНІҢ НАА ПӦГІННЕРІ
05.09.2017
Хабарлар
Ирткен неделяда «Хакасия» газета редакциязында республиканың хазых хайраллаҷаң министрі Владимир Костюш хабарҷыларнаң тоғасхан. Ол, хазых хайраллаҷаң министерствонаң устап, ӱс ай тоғын салды. Тоғазығда пу хысха тусха имнег киреенде хайдағ алызығлар полғаннаңар паза хайдағ пӧгіннер турчатханнаңар чоох парған.
Пӱӱл 79 абитуриент кӧстегліг оңдайнаң имҷілер тимнепчеткен вузтарда ӱгреніп пастапча. Ол ирткен чылдағызынаң 30 %-ке кӧп. Ниме наа? Пу чылда пастағызын на абитуриенттерге республикада хайдағ имҷілер киректелчеткені азынада искірілген. Іди олар, Хакасияа кирек специальность таллап, анзын кӧстегліг ӱгредігдеңер чӧптезігде таныхтааннар. Амды полған на студент пӱӱнӧк пілче, хайдағ имнег учреждениезінде паза кем полып тоғынарын. Тиксі кӧстегліг оңдайнаң федеральнай ахчаа 340 студент имҷілер тимнепчеткен вузтарда ӱгренче.
28 июльдаң регионда ӧнетін имнег оборудованиеліг вертолёт тоғынып пастаан. Аны республика федеральнай программа хоостыра алған. Амды, ыраххы аалдағы чонға кинетін имнег полызии киректелчетсе, имҷілер табырах читчелер. Пір айға вертолёт 42 учуғыс идіп, 54 кізее имнег полызии пирілген. Владимир Костюштың таниинаң, вертолётха кӱнде ӱс тее хати киизер кӧдірілерге килісче. Чон аны кирексіпчеткені іле кӧрінче. Аннаңар пӧгінде: октябрьға ікінҷі вертолётты позыдары.
- Ӧӧні - ағырығ кізее тузында полызығ пирері, тузында имнег туразынзар читірері, - тіпче хазых хайраллаҷаң министр. - Піс ол кӧстегнең тоғынчабыс паза тоғынарбыс.
Олох пӧгіннең пірее аймахтарда «Табырах полызығ» машиналарның чорығы алыстырылған. Кӧзідімге, Пӱӱр пилтірі, Чарков, Аххол ааллар Ағбан пилтірінең ырах орныхчалар. Табырах имнег полызии машиназы оларзар читкенҷе, кӧп тус ирт парча. Аннаңар имнег полызығ службазы оларзар Сорығдаң кил турар. Олох оңдайнаң Таштып аймаанда тоғынып пастадылар. Мында Арбыт хыриндағы ааллар табырах имнег полызиин Абазадаң сағирлар.
Республика ахчазы тузалығ хорадылар ӱчӱн, хазых хайраллаҷаң министр Владимир Фёдорович аймахтардағы хай пірее имнег тураларының тоғызын алыстырарға кирек тіпче. Кӧзідімге алылған Коммунар аалдағы имнег туразы. Улуғ имнег туразында тӧртче кізі чатча. Аны тударға, тізең, улуғ ахча хорадылча. Ол ахчаа кирек оборудованиелер алза, тузазы артых ла полар. Пӱӱр пилтірі аалдағы имнег туразында, тізең, ікі ай кізі чатпинча. Чон аптеканы кирексіпче паза кӱнӧрткі стационарнаң чарасча. Аннаңар андағы имнег туразын имнег амбулаторияа айландырар сағыс пар.
12 сентябрьда республиканың перинатальнай кіні азылар паза ӱр ниместең Г.Я.Ремишевскаяның адынаң имнег туразында хирургия корпузы тоғынып пастир. Аны хоостыра Ағбандағы имнег учреждениелері дее пасха орыннарзар кӧзіп пастирлар.
Автор :
Айана АЛБЫЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде