ХГУ-да ХАКАС ТІЛІ НЕДЕЛЯЗЫ
06.09.2017
Хабарлар
Пу кӱннерде Н.Ф.Катановтың адынаң Хакас хазна университедінде Хакас тілі паза литература неделязы иртче.
Ол республикада пастағызын таныхталчатхан Хакас тілі кӱніне чарыдылча. Хакас тілі неделязын ХГУ-ның филология паза культуралар аразындағы палғалыс институдының хакас кафедразының преподавательлері иртірчелер.
Іди киҷее, 5 сентябрьда, университеттің студенттері хакас тілінҷе, диктант пазып, пілістерінең сынасханнар. Марығда тиксі 15-че оол-хыс араласхан. Прайзы пос кӧңнінең.
Ідӧк пу кӱннерде ХГУ-ның филология паза культуралар аразындағы палғалыс, тӧреміл педагогика ӱгредии институттарының студенттері текстті ӧтіг хығырарынҷа марығда аралазарлар. Анда оларға хакас авторларның произведениелерін иң артых паза ӧтіг хығырыбызарға кирек полар.
7 сентябрьда, тізең, университеттің преподавательлері Н.Ф.Катановтың адынаң национальнай гимназия-интернаттың ӱгренҷілерінең тоғазығ иртірерге пӧгінчелер. Аның ӧӧн темазы «Тӧреен тіл - амғы чуртастағы маңнаныстығ оңдай» полча.
- Килчеткен неделяда, 13 сентябрьда, Хакас тілі паза литература неделязының тиксі салтары иділер. Анда марығда араласхан студенттерге ӧнетін сертификаттар пирілер, чиңіс тутханнарға, тізең, дипломнар читірілер, - чоохтапча ХГУ-ның доценті, филология наука-ларының кандидады Марина Медведева.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы