Сыныхтағ тузында имнер пирҷең полномочиеліг орган ӧнетін андағ кізее имнерні читкіҷе пирбеені ілезіне сығысса, анзы кізінің социальнай полызығ алар праволарын сайбапчатханы полар. Андағ оңдайнаң ол орган кізіні пос ахчазына кирек имнерні алып аларға кӱстепче, аннаңар ол кізінің сайбалған праволарын тӱзедер, кізее иділген ӱрегні айландырар.

Республиканың прокуратура органнары льготалығ категорияа кірчеткен кізілернің праволарын арачылирынҷа исктіг пічіктер ызар тоғыс апарчалар. Имнерні тикке алар рецепттер ӱрге соона чылдырыл парза, кізілерге пос ахчазына кирек имнерні аларға килісче. Прокурорлар ол хорадылған ахчаны айландыр пирер тоғыс апарчалар.

Пастағы теесте прокурорлар имнелбинчеткен аар ағырығларнаң хыйалланчатхан кізілернің праволарын арачылирына хайығ айландырчалар. Андағ кізілерге аарлығ имнер киректелче нооза. Хазии алай улуғ чазы хоостыра постары чарғызар айлан полбинчатхан кізілерге праволарын чарғы пастыра арачылирдаңар пічікті прокуратуразар пирерге чарир. Ағаа хоза паспорттың хобырғанын, имнер ӱчӱн тӧлеен товар паза ахча чектерінің, льготаа право пирчеткенін киречілепчеткен пічіктернің хобырғаннарын пирерге кирек полар.