НАНДЫРЫҒЛЫҒ ТОҒЫС ӰЧӰН ПРАЙЗЫНА - АЛҒЫС
20.09.2017
Хабарлар
ХАКАСИЯНЫҢ ПАЗЫ ВИКТОР ЗИМИН ИРТКЕН НЕДЕЛЯДА ПЕРИНАТАЛЬНАЙ КІННІ ПАЙРАМНИ АСХАНДА, ІДӦК АНЫҢ ПӰДІРИИНДЕ ПАЗА ТИМГЕ СЫҒАРАРЫНДА ӦТКІН АРАЛАСХАН УСТАҒҶЫЛАРҒА, ТОҒЫНҶЫЛАРҒА ХАКАСИЯ ПАЗЫНЫҢ АЛҒЫСТАС ПІЧИИН ЧИТІРГЕН.
СЫЙЫХХА ТУРЫСХАН АЛТЫ КІЗІ. ОЛАРНЫҢ АРАЗЫНДА ВИКТОР ЗИМИН КӦП МАХТААН РОМАН СОЛОМОНЮКТЫ. ОЛ «МОНО-ЛИТСТРОЙ» ООО-ның ИНЖЕНЕРІ ПАЗА ПЕРИНАТАЛЬНАЙ КІННІҢ ПРОЕКТ УСТАҒҶЫЗЫ. ХАКАСИЯ ПАЗЫНЫҢ ИСКІРИИНЕҢ, МАХТАҒА ТУРЫСХАН СПЕЦИАЛИСТ ПЕРИНАТАЛЬНАЙ КІННІҢ ПРОЕКТІНЕҢ 25 ЧАСТЫҒДА УСТАП ПАСТААН. ПӰӰНГІ КӰНДЕ АҒАА 27 ЧАС. ӀДӦК «МОНОЛИТСТРОЙ» ООО-ның ІКІ ТОҒЫНҶЫЗЫ АЛҒЫСТАСХА ТУРЫСХАН: ВАЛЕРИЙ МАКСИМЧУК - ПӰДІРІГ ПАСТЫҒЫ ПАЗА МАКСИМ ГУЛОВ - ВЕНТИЛЯЦИЯ УЧАСТОГЫНЫҢ ПАСТЫҒЫ.
Пӱдірігҷілердең пасха Хакасия пазының алғыстас пічиине турысханнар перинатальнай кіннің тоғынҷылары: ӧӧн имҷі Наталья Ржевская, ӧӧн имҷінің хоных сурығларынҷа орынҷызы Татьяна Борчикова паза сестра киреенҷе менеджер Нина Чимдан. Пілдістіг, оларның устаанаң пӱӱнгі нандырығлығ кӱнге паза мыннаң мындар тӱзімніг тоғынарына тимнелген перинатальнай кін.
- Наталья Валентиновна, - айланған Виктор Зимин перинатальнай кіннің ӧӧн имҷізінзер, - Сірерге улуғ нандырығ артылча! Сірер пӱдіріг пасталғаннаң сығара пу объектнең айғасхазар, аны апарғазар, ол Сірернің тӧреен тураңар. Анда тоғынар прай тоғынҷылар алнында уғаа нандырығлығ пӧгін турча - пістің палаларның паза іҷелернің чуртазын, хазиин хайраллиры.
Республиканың перинатальнай кінінің ӧӧн имҷінің орынҷызы Татьяна Борчикова пу нандырығлығ тоғысха июльда турғызылған, аның алнында 10 чылға чағын ол метрологияҷа инженер полып тоғынған. Татьяна Викторовна перинатальнай кіндегі прай оборудование ӱчӱн нандырча. Аның устаанынаң паза имҷілернің чӧптері хоостыра имнег туразынзар пӧзік технологиялығ оборудование алылған паза турғызылған.
Танығлығ, перинатальнай кінінің ус-тағ-пастаа молҷааны хоостыра 18 сентябрьда пастағы ыңааҷах тӧреен. Ол - хызыҷах. Аны Анна адап салғаннар. Соонаң тӧреен Ярослав.
- Чиит іҷелернің паза час палаларның хазии чахсы. Іҷе поларға ам даа ӱс ипчі тимненче. Тиксі перинатальнай кінде азах аар 26 ипчі чатча. Пастағ пар, аннаңар, сағынчам, ӧріністіг хабарларны кӱннің ал турарбыс, - ӱлесче республика пазы Виктор Зимин.
19 сентябрьның иртеніне перинатальнай кінде тӧрт ыңааҷах тӧреен.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы