ЛИТЕРАТУРА ЧИДІГЛЕРІ
29.09.2017
Хабарлар
Хакасияда «Литература кӱскӱзі» чӧрім пӱӱл 13-ҷі хати иртірілче. Аның пастағҷызы Н.Г.Доможаковтың адынаң национальнай библиотека полча. Пӱӱлгі фестивальда Хакасия культуразының саблығ тоғынҷызы, поэт Наталья Ахпашеванаң паза Хакасия культуразының саблығ тоғынҷызы, писатель, журналист Анатолий Султрековнаң тоғазығ полған. Ідӧк чиит поэт-писательлерге сӧс пирілген.
Мының алнында иртірілген «Литература кӱскӱзінде» Алтай, Чуваш, Тыва, Хызылчар крайы паза пасха даа чирлердегі писательлернең тоғазығлар полған. Пілдістіг, Хакасияның чайаачы сӧс устарынаң тоғазығлар тӧреміл иртіріледір. Мероприятиені азып, Хакасияның культура министрінің орынҷызы Наталья Григорьева чоох тутхан:
- Мындағ тоғазығларда авторларнаң танысчабыс. Республикада чыл сай ікі литература премиязына марығ чарлалча. Прозада иң чахсы чайаачы тоғыс ӱчӱн Николай Доможаковтың адынаң паза поэзияда Моисей Баиновтың адынаң Хакасия пазының сыйии пирілче. Хоос сӧс чайаачыларына наа тоғазығлар, кӧп хығырығҷы алғапчам!
Поэт Наталья Ахпашева «Зеркала в зеркалах» кибелістер чыындызы ӱчӱн Моисей Баиновтың адынаң Хакасия пазының сыйиина турысхан. «Литература кӱскӱзіне» килген чиит улусха Наталья Марковна наа кибелістерінің пірсін хығыр пирген. Анда кічіг хызыҷахтың чуртазының пір кӱнін кӧрчебіс, ідӧк пу кибелісте часкадаңар пазылған.
- Сірернің кибелістеріңде, минің кӧрізімнең, хан тигір темазы пілдірче. Андағ ба? - сурығ пирілген.
- Кізі - тирең паза пай пілістіг тіріг ниме. Минің пастағы кибелістерімнің чыындызы техника саринаң ниик пазылған. Андағы кибелістер чарых паза ӧрініс сыйлапчалар. Кізі, улуғланчатса, сағысха тӱзірчеткен кибелістер пас сыхча.
Писатель Анатолий Султреков, прайзынаң хакас тілінең изеннезіп, чииттерге чайаачы тоғыстарынаңар чоохтап пирген. Кӱресчі Сергей Карамчаковтаңар «Чиңіс ӧрінізі» книгазы ӱчӱн ол Николай Доможаковтың адынаң Хакасия пазының сыйиина турысхан. Карамчаковтардаңар чоох парыбысханда, кӱресчі хыстардаңар чоохтаан. Николай Георгиевич Доможаков Ағбандағы ӱгретчілер институдында аның ӱгретчізі полтыр. А.Е.Султреков писательнің пайрамнығ чазына чарыдылған книга сығарарға пӧгінген, че сағызы толбин парған. Чуртасха кирҷең, пазар сағыстар толдыра тіпче Анатолий Егорович.
Республикада 35 часха читкелек чииттерге проза паза поэзия произведениелері ӱчӱн чыл тооза 2000 салковай стипендия тӧлелче. Пӱӱл Светлана Акатова поэзияда, Василий Пахтаев прозада мындағ стипендияа турысханнар. Чииттер сағыстарынаң паза ӧріністерінең ӱлескеннер.
- Культурада істенчеткеннер пӧзік чидіге чидерге кӱстенчелер, - чоохтаан Светлана Акатова. - Мин аймах марығларда араласхам. Че пу стипендияа турысханым иң пӧзік чидіге санапчам. Кибелістер пазарға мині пастағы ӱгретчім кӧӧктірген. Іҷем Наталья Германовна сын полысчым полча, наа сағыстарынаң сыбыра ӱлесче. Оларға улуғ алғызым читірчем! Минің черновиктер илееде чыыл парған. Читіре пазылбаан сағыстар хайдағ-да тус пазынаң кирек пол парчалар. Іди киректелчеткен сӧстер табыл парчалар.
Светлана мындағ оңдайнаң чайалған «Россиядаңар» кибелізін хығыр пирген. Василий Пахтаев чайаачы кӱзін прозада сынапча. Позы ол музыкант полтыр. Писатель Галина Казачинованың чӧптері хоостыра чиит оол чайаачы тоғыстар пазып пастаан. Василий Г.Г.Казачиноваа алғыс сӧстерін читірче. Ідӧк ол хоостапчам тіп искірген, пазарын тастабинча. Пірее наа тоғыс тӧриріне ізеніс чідірбинче. Анаң литература чолы пазарынаң на салылбинча тіп чоох апарылған. Кӧг киреенең айғазып, пазар тоғысты апарарға чарир.
Поэт Наталья Ахпашева Симферопольда чарыхха сыхчатхан журналны Н.Ф.Катановтың адынаң Хакас хазна университедінің студенттеріне сыйлаан. Эльвира Самрина паза Ксения Воропаева журналистика факультедінде ӱгренчелер. Чииттернің чайаачы тоғыстары пу журналда чарыхха сыххан.
- Кибеліс - ол кізінің худы-чаны, -тіпче Ксения. - Хығырығҷы кибелісті позына чарыдылған тіп санааны иң пӧзік паалағ полча.
Кибелістер пазарға чииттерні Наталья Ахпашева ӱгретче. Худайдаң пирілген чайаачы сағысты кибелістер пастыра хығырығҷаа читірерге чарир. Пирілбеен нимее кізіні ӱгредіп аларох, че анзы математика тиирҷікпін.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы