ИСКІРІГ СИСТЕМАЗЫН ЧАХСЫЛАНДЫРАРҒА
29.09.2017
Хабарлар
Хакасияның Ӧӧркі Чӧп кнезi Владимир Штыгашев 17 сентябрьда президиум чыылиин иртірген. Ӧӧркі Чӧп комитеттерінің паза комиссияларының устағҷылары пу чыылығда орындағы пос устанысха теелчеткен наа закон проектін кӧрібіскеннер. Наа закон проекті Хакасияның пазына муниципальнай пӱдіс пастарының, орындағы пос устаныс депутаттарының, ідӧк ол должностьтарға кандидаттарның парыстарынаңар искіріглерні пирҷең оңдайны турғысча.
Хакасияның пазы кирчеткен закон проектінең республика правительствозы аппарады устағҷызының орынҷызы Елена Кудинова таныстырған. Хайди ол искірген, республиканың закон проекті коррупциядаң тоғыр кӱрезердеңер федеральнай закон хоостыра тимнелген. Закон проекті хоостыра орындағы администрациялар пастары, орындағы пос устаныс депутаттары паза ол должностьтарға кандидаттар, должность полномочиелерін холға кирчетсе, постың, ипчізінің паза частары читкелек палаларының парыстарынаңар, ис-пайынаңар искіріглерні пир турарға киректер.
Ідӧк Хакасияның пазына ол искіріглерні сыныхтир право пирілче. Андағ сыныхтағ иртіреріне сылтағ полча право арачылаҷаң паза пасха хазна органнарынаң, орындағы пос устаныс органнарынаң, коррупция сайбағлары профилактиказынҷа пӧліктер тоғынҷыларынаң, политическай партияларның паза халых пірігістерінің тӧреміл тоғынчатхан устағ органнарынаң, Россияның Халыхтар палатазынаң, ідӧк тиксі Россиядағы СМИ-лардаң кірген искірігліг пічік. Сыныхтағ тузында сайбағлар табылған полза, олардаңар материаллар хазна органнарынзар ызылча. Сыныхтағның салтарларынҷа тимнелген сан пиріс, тізең, Хакасияның пазына читірілче ол килістіре чарадығ алар ӱчӱн.
Хайди таныхтаан Владимир Штыгашев, пу сурығ наа нимес, ол хаҷанох ӱзӱрілче паза коррупциядаң тоғыр кӱрезерінҷе законодательствоны чахсыландырар тоғысты узаратча. Ӧӧркі Чӧп президиумы наа закон проектін чағынғы сессияның ӱзӱриине сығарарға чарат салған.
Ідӧк Ӧӧркі Чӧп кнезі пу чыылығда чуртағҷыларға радио каналлары пастыра сағыбаан саайдаңар искірҷең система тӧстир сурығны кӧдірген. Ӧрттернең паза суғ тасханынаң палғалыстығ киректер кӧзіткен - республикада искіріг системазы читкіҷе нимес тоғынча. Радио пастыра искірері, тізең, иң тӱзімніге саналча. Че ӧӧн сидіксініс пӱӱнгі кӱнде прай республикаа тарапчатхан радио каналы чох полғаны.
- Эмектіг радио 1990 чыллардох чох иділген. Амғы туста радио улуғ ла аал-городтарда пар. Радио пастыра, тізең, піс кӧп сурығларны пӧк поларҷыхпыс, ол санда сағыбаан саайлардаңар сизіндіріглер тузында пирілерҷік, - сағыс-кӧрізінең ӱлескен Ӧӧркі Чӧп кнезі.
Владимир Штыгашев Ӧӧркі Чӧп президиумына ол сурығҷа тоғынарға чахығ пирген - килістіре программа алай закон тимнирге паза, оңдай полза, республиканың 2018 чылға бюджедінде ол кӧстегҷе ахча кӧр саларға.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы