ЧИР-СУҒҶЫЛАРЫНЫҢ КИРТІНІЗІНЕ ТУРЫЗАРҒА ЧАХААННАР
17.10.2017
Хабарлар
Хубачар аалның Культура туразында 12 октябрьда Алтай аймааның пазы Татьяна Раменскаяның инаугурациязы ирткен. Сентябрьда ирткен табығларда аймах чуртағҷыларының 60 азыра %-і ӱнін Татьяна Николаевнаның ӱчӱн пирген. Наа орында тоғызы наа ла пасталчатхан полза даа, Татьяна Раменская аймахтың чуртазынаң, аның сидіксіністерінең чахсы таныс - аймах пазына килер алнында ол Хакасия пазының Алтай аймаанҷа уполномоченнайы полған.
Россияның паза Хакасияның гимні ойнаан соонаң, сценадаң табығлар салтарлары чарлалған. Алтай аймаа пазына табығларда пис кізі араласхан, че оларның аразында Татьяна Раменская ікінҷілес чох чиңіс тутхан тиирге чарир. Аннаңар ол, сценаа сығып, чыылысхан чон алнында присяга пирген. Мында ол хазнабыстың, республиканың, аймахтың конституциязын паза законнарын, чуртағҷыларның алнын алып, ағаа салылған тоғысты матлама толдырарға молҷаан.
Татьяна Николаевнаны мындағ танығлығ кӱннең алғыстирға Культура туразынзар кізі толдыра чыылысхан. Оларның аразында Хакасия правительствозының, министерстволарының кізілері, пасха муниципалитеттернің, аал чӧптерінің устағҷылары, Алтай аймаа администрациязының тоғынҷылары полғаннар. Че ӧӧн аалҷы Хакасия пазы Виктор Зимин полған. Ол, сценаа сығып, наа ла тоғынып пастапчатхан аймах пазына алғыстас сӧстерін читірген.
- Мин Татьяна Николаевнаны улуғ пілістіг, нандырығлығустағҷы чіли пілчем. Алтай аймааның наа устағ-пастаа алнында кӧп пӧгін турча. Ирткен чыллардағы чидіглернің салтарларын хайраллап халарға, ағаа хоза, пӧгерін кирексіпчеткен сурығларҷа тоғыс апарарға кирек: ибіркізін иптирі, чолларны тыхтиры, ол санда аймах кінінде, чарытхы пирерінең палғалыстығ сурығлар, наа поликлиника пӱдіриин узарадары, Хубачарда наа школа пӱдірерін федеральнай программаа кирерге кӱстенері паза аннаң даа пасхазы. Сағынчам, республика правительствозы паза муниципалитеттің устағ-пастаа, хада-пірге тоғынып, чахсы салтарлар кӧзідер, - теен Виктор Михайлович.
Алғыстастар соонаң республика пазы Виктор Зимин Татьяна Раменскаяа аарлығ сыйых - алтын час - читірген. Ідӧк сӧс пасха муниципалитеттернің, Алтай аймаа депутаттарының, аал чӧптерінің пастарына пирілген. Прайзы аймах пазының тоғызы нандырығлығ полчатханын таныхтаан, аннаңар Татьяна Николаевнаа, тоғасхан сидіксіністерні сыдамах тобырып, аймах чуртағҷыларының, чир-суғҷыларының киртінізіне турызарға чахааннар.
Алғыстас сӧстері тоозылған соонаң прайзын чайаачы сыйых сағаан. Россияның паза Хакасияның саблығ артизі Евгений Улугбашев паза Хакасияның саблығ артизі Мария Янгулова сарыннарынаң чыылысхан чонны ӧріндіргеннер.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы