ХАКАСИЯА ТЕЕСТЕГІ БЮДЖЕТ КРЕДИДІ ПИРІЛЕР
17.10.2017
Хабарлар
Теестегі ахчалығ транш республиказар пу неделяда чидер, аның сині - 4,7 миллиард салковай. Ол ахча Хакасия правительствозы паза Россияның финанстар министерствозының аразында иділген чӧптезігнің паза пір салтары. Ол салтарға чидер алнында, Хакасияның пазы Виктор Зимин Россия правительствозының, Хазна Думазының, Федерация Чӧбінің паза финанстар министерствозының устағ-пастаанаң чӧптезіглер апарған. Салтарында Хакасия - бюджет кредидін пирерге киректелчеткенін киречілеп алған.
КОММЕРЧЕСКАЙ КРЕДИТ АЛЫМНАРЫ 15%-ке ХЫЗЫРЫЛАР
Регионға ол ахча ниме пирерінҷе паза пӱӱн республика ахчалығ киректі чахсыландырарынҷа хайдағ тоғыс апарчатханынҷа сағыстарынаң ӱлесче ол тоғыстың араласчызы, Хазна Думазының Хакасиядаң сығара депутады Надежда Максимова.
- Теестегі бюджет кредид, 4 млрд 700 млн салковай, республиканың коммерческай алымының чардығын алыстырарына парар. Салтарында республиканың хазна алымының пӱдізі алыс парар. Іди коммерческай кредит алымнары 15%-ке хызырылар, анзы хазна алымнарынҷа хорадығларны чыл сай чарым миллиард салковайға хызырарға оңдай пирер.
Аның алнында республика пазы Виктор Зиминнің кӱстенізінең Хакасия 1 млрд 295 млн салковай бюджет кредидін алған. Ол ахча социальнай хорадығларға парған. Федеральнай хабазығ алып аларынҷа тоғыс узарадылча. Чағынғы туста Хакасияа бюджедін оңдайлирға хоза ахча пирердеңер чарадығ алылар. Хабазығның сині октябрь тоозылғанҷа пілдістіг пол парар.
ПОС ПАРЫСТАРЫН ӦСКІРЕРГЕ
- Регион пазы паза правительство бюджеттің пос парыстарын ӧскіреріне алынҷа хайығ салчалар. Іди республика бюджедінің парыстығ чардығы чыл сай 1,3 млрд артиинаң салковайға хозылча.
2016 чылның салтарларынҷа республиканың консолидированнай бюджедінің пос парыстары 1 млрд 928 миллион салковайға ӧс парған, республика бюджедінің - 1 млрд 48 млн салковайға. 2017 чылда Россия минфинінең чӧптезігҷе Хакасия пос парыстарын хоза 2 миллиард салковайға ӧскірер пол салған.
Таныхтирға кирек, Хакасиядағы улуғ компанияларның устағҷылары,Виктор Михайлович оларнаң Москвада тоғазығлар иртірген, налог ахчазын ӧскірерге молҷап салғаннар.
Республикада пол парған ахча саринаң сидіксіністеңер чоохтаза, регионнарның кӧбізі андағ сидіксініске урунча. Республика пазы даа, Хакасия Правительствозы даа Ӧӧркі Чӧпнең, пірге тоғынып, оларны пӧгерге прай кӱс салчалар.
АЛЫМНАРНЫ АЙЛАНДЫРҶАҢ ТУСТЫ ЧЫЛДЫРЫБЫЗАР ОҢДАЙ ПАР
- Олох туста Хакасияның чахсы сари пар - промышленность тилізі. Чир алтындағы ис-пайны анирынҷа ла 2017 чылның ирткен тузына промышленность индексі 111,8% полча. Ол Россиядағы ортын саннаң кӧп. Пістің пасхалалчатхан сарибыс - ахчанаң сидіксініс экономикабыс ӧсчеткен туста пол парғаны. Аннаңар Хакасияның федеральнай ахчалығ хабазығ, аны аларынҷа піс амды прай кӱзібіс салчабыс, полызиинаң ол сидік сурығны кӧместең пӧгібізер оңдайы пар.
Пу оңдайларда Россия президентінің бюджет кредиттеріне реструктуризация идердеңер чарадии республикаа уғаа килістіре. Чыыл парған бюджет кредиттерінің реструктуризациязынаңар программа 2018 чылның 1 январьынаң тоғынар. Ол 7 чылға кӧрілген. Алымнарны чабары чардыхти, 2018-2019 чылларда 5% тӧлеп, 2020 чылда - 10%, 2021- 2024 чылларда - 20%, апарылар. Ағаа хоза, регион ікі чылға региондағы налог базазын инфляциядаң тӧбін нимес ӧскірібіссе, реструктуризация 12 чылға теере узарадыларға айабас. Ирткен чылларның ӧзізін кӧрзе, Хакасияның кредиттер тузын чылдырыбызар прай оңдайы пар.
Алымнарны айландырҷаң тусты ӧскіргені республикаа пос пол парған ахчазын социальнай сурығларын пӧгеріне паза хазна алымын хызырарына ызарға оңдай пирер. План хоостыра хазна алымының сині чыл сай 5 %-тең ас нимес хызырылары кӧрілче, ол санда пос парыстарын ӧскірген паза бюджет хорадығларын ӱзӱрлеен полызиинаң. Кӧздімге, устағ аппарадын 130 кізее хызырғаны паза пасха даа бюджеттегі устағ органнарын хызырарынҷа алылған чарадығлар пӱӱл хорадығларны 1 млрд артиинаң салковайға ӱзӱрлир. Анзы ідӧк ол ахчаны социальнай сурығларны пӧгеріне ызарға оңдай пирер. Социальнай хорадығларны хызырарға чарабас, оларның сині - 80%. Олох чал ахчазы бюджетниктерге, социальнай чыындыларзар тӧлеглер, хайзылары ирткен чылларда 6 миллиардча салковайға ӧс парғаннар.
Ол аар чӱк, че хайди даа сидік полза, піс ол сурығларҷа тӧреміл тоғынчабыс, паза оларны пӧк турарбыс, федеральнай синде полызығ сурап таа, республика промышленнозын тилідіп тее, - чоохтап пирген Хазна Думазының Хакасиядаң сығара депутады Надежда Максимова, сағыс-кӧрізінең ӱлезіп.
Таныхтирға кирек, ол тоғыста Хакасия пазынаң хада Ӧӧркі Чӧптің устағ-пастаа, финанстар министрі Ирина Войнова, Хакасияның Федерация Чӧбіндегі кізілері Валентина Петренко паза Евгений Серебренников ӧткін араласчалар.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы