Хоос дизайн паза нинҷідең сувенирлер тимнирі ӱгренҷілерге кӧріл парған. Ағбандағы Экономика, сервис паза профессиональнай технологиялар хакас колледжінзер регионның аймах пулуңнарынаң чон чыылысхан. 23 октябрьда марығ пайрамни азылған.

Таныхтирға кирек, «Абилимпикс» марығ Хакасияда пастағызын иртірілче. Кинектерні тоғысха кӧніктірер тоғыс апарылча.

Чоннар аразындағы синде чӧрім 1972 чылдаң сығара парча, пастағы мындағ чемпионат Японияда 1953 чылда ирттір.

«Абилимпикс» марығ Россияның 29 регионында полған. Кинектер 29 профессияҷа кӱстерін паза чайаачыларын сынапчалар. Хакасиядағы марығда пис кӧстегҷе олғаннар, студенттер паза улуғлар марығласханнар, тиксі 2б кізі санға алылған. Н.Ф.Катановтың адынаң Хакас хазна университедінің, Экономика, сервис паза профессиональнай технологиялар хакас колледжінің студенттері, Ағбан паза Харатас, Саяногорск городтарның чайаачы олғаннар кіннеріндегі палалар паза ӱгренҷілер араласханнар.

Хакасия пазының орынҷызы тоғызын толдырчатхан И.Г.Смолина марығ араласчыларын алғыстаан.

- Пӱӱл мындағ марығ пістің республикада иртірілчеткені - уғаа танығлығ кирек, - чоохтаан Ирина Смолина. - Ӱгретчілер паза эксперттер пістің пар. Олар сірернің хазииңарға хайығ салчалар, пілістер пирчелер. Кӧңніңер чарых ползын, чиңіс тудыңар!

Эксперттер ӧнетін тимнег иртірлер. Оларның саны илееде полған, В.Г.Чаптыковтың адынаң Хакас хазна филармониязындағы олғаннар сарыннар толдырғаннар. Уйан исчеткеннерге сценадаң ӧнетін тілбестег парған.

Марығ пайрамни азылған соонаң, мастер-класстар кӧріп аларға чапсых полған. Ӱӱҷік тамаанаң паза фрукттардаң камелия чахайахты чайааннар. Стол-да муксун, ӱгӱрсӱ, морковь, помидор, яблоко-апельсиннер полғаннар. Парикмахер хыстар састарны иптеп турғаннар.

Анаң марығ араласчылары кӧстеглерҷе тарасхлааннар. Повар кирее, идінҷектер, хоос дизайн, кип-азах пысчаң, нинҷінең тоғынары кӧстеглер чарлалған. Полған на кӧстегде ӧӧн эксперт тоғынған. Эксперттер - от кӧк ӧңніг, марығ араласчылары сарығ футболкалығ полғаннар.

Хоос дизайн кӧстегде ӧӧн эксперт тоғызын Ирина Муравьева толдырған. Мында 14 частығ ӱгренҷілер араласханнар. Оларға чаҷыннаң хоостар тимнирге киректелген. Прайзына тӧӧй хоос паза пір тус пирілче. И.Г.Муравьева сағыстарынаң ӱлескен: «Піс палалар пирілген тоғысты толдырарға сыданмастар алай ба маңнанмастар даа тіп сағынғабыс. Че андағ полбаан. Прайзы чайаачы тоғызын тимнебіскен, хай піреезі хоозын уғаа пӧзік синде ит салған. Хоос дизайнда ӧӧнінде хызыҷахтар араласханнар. Олар иб істін чазир тоғыстарны тимнееннер».

Кристина Бармина Ағбандағы 21 № школада 9-ҷы класста ӱгренче. Хоос дизайн кружогына ікінҷі класстаң сығара чӧрчеттір. Кристина пу чемпионатта II орынға турысхан.

Повар кирее кӧстегде студенттер палыхтаң паза мискедең, чир тамаанаң ізіг чиис тимнееннер. Экономика, сервис паза профессиональнай технологиялар хакас колледжінің студенттері Елена Сагалакова паза Анастасия Бурнакова ас-тамахты чахсы тимнепчеттірлер. Олар палыхты, істінзер мискелер суғып, хаарғаннар.