Пу тураның пастағы хадылында Хакасияҷа МВД-ның миграция сурығларынҷа управлениезі орнығар, анда пасха ханнар паза гражданствозы чох кізілернең тоғыс апарылар. Ол управлениеде прай нап-наа оборудование турғызылча.

Мындағ танығлығ, ӧріністіг мероприятиеде араласханнар Хакасияның пазы Виктор Зимин, Ағбан городтың пазы Николай Булакин, Хакасия пазы орынҷызының тоғызын толдырчатхан Владимир Крафт, МЖф-тың устағҷызы Василий Хамин паза республика МВД-зының устаа. Хакасияның пазы стройда турчатхан МВД тоғынҷыларынзар хысха чоохнаң айланған:

- Уғаа чапсых мындағ мероприятиеде аралазарға. МВД-ның мындағ орта чарадиина ӧрінерге кирек. Олар піске наа тоғыс орыннарын тӧстепчелер. Пӱӱн илееде тоғынҷы квартира клӱзін алча. Амды оларға чуртирға истіг полар. Россия МВДзының министріне улуғ алғыс читірерге кирек, пу тураны пӱдіреріне 200 миллион азыра салковай федеральнай ахча пирген ӱчӱн. Пасха федеральнай органнар ідӧк ахча позытчаң ползалар, чахсы поларҷых. Пу кӱн квартиралар алчатхан сӧбірелерге, олғаннарға уғаа часкалығ кӱн полча. Прай пу чахсы киректерні Россияның президенті итче, ол ахча позыдардаңар чарадығ пирче, улуғ алғыс ағаа. Наа чурт алчатханнарға истіг, читкіҷе чуртас, часка алғапчам, - теен Виктор Зимин.

Хакасияҷа МВД министрінің тоғызын толдырчатхан Сергей Ромашов 115 служебнай квартиралығ тура пӱдірілген ӱчӱн алғызын МВД-ның тыл службазының тоғынҷыларына, подрядчикке читірген. МЖФ тураны андағ-мындағ тудығлар чох пӱдір салған.

Николай Булакиннің чооғынаң, ведомствоның пу туразының улии 10 муң квадрат метрге тиңнелче, аның читі муң квадрат метрінде квартиралар полар. Халғанҷы туста федеральнай инвестициялар городсар кӧп кір сыхтылар. Пу ікінҷі тура тузаланысха кирілче, пазағы чылда ӱзінҷі тура пӱдіріл парар.

Ағбанның пазы Сергей Ромашовха тураны тузаланысха кирерге чарадылчатханнаңар пічік читірген. Ідӧк пайрамнығ мероприятиеде МВД-ның алынҷа службаларына «УАЗ Патриот» паза «Лада X RAY» автомобильлернің клӱстері читірілген.

Наа квартиралар клӱстерін алғаннарның санында полғаннар МВД-ның Ағбан городча управлениезінің улуғ участковай уполномоченнайлары Александр Султреков, Андрей Белоглазов паза ӱр ниместе тоғысха кірген чиит участковай уполномоченнай Матвей Боргояков. Полицияның капитаны Андрей Белоглазов УМВД-да ӱс чыл тоғын парир, аның алнында ол істіндегі войсколарда Чечняда 2008 - 2012 чылларда служба ирткен, улуғ лейтенант аттығ полған. Амды ол городта Хызыл Ағбанда улуғ участковай уполномоченнай полча. Аның сӧбірезінде хызыҷах паза оолағас ӧсче, хада хонғаны Юлия Владимировна ибде паланаң одырча.

Полицияның капитаны Александр Султрековты МВД-ның ветеранына санирға чарир. Ол УМВД-да 19 чыл тоғын салған, армиядағы службазын хада алза, пенсияа сығар тус чит партыр. Ағбанда Александр Николаевич «Гавань» микрорайонда улуғ участковай уполномоченнай полча. Амға теере сӧбіре МВД-ның общежитиезінде чуртаан. Хада хонғаны Екатерина Петровна харах имнег туразында медсестра полча. Амды олар хызыҷаанаң хада наа квартираа кірчелер. Хаҷаннаң сағаан чуртха сӧбіре ам кірче.

Пілдістіг, хайдағ ӧрініс ағылды пу кӱн наа чурт алған сӧбірелерге. Олар ам истіг квартирада чуртирлар, тоғынарға даа ӧрчіліг чӧрерлер. Часкалығ чуртас алғирға кирек прай чурт алғаннарға.