ПАРЫСТАРНЫ ПОС КӦҢНІНЕҢ КӦЗІДЕРІНЕ - ХААЛАҒЛАР
22.11.2017
Хабарлар
Хакасияҷа федеральнай налог службазының управлениезі ирткен неделяда хара тас промышленнозынаң айғасчатханнарнаң азых ӱзӱріглер иртірген. Устаныстың 2017 чылның 9 айына налог сыныхтаанда право практиказынаң тузаланған салтарларыі кӱн суриина сығарылған. Ӱзӱріглерде Хакасияҷа федеральнай налог службазының управлениезі устағ-пастаанаң паза хара таснаң айғасчатханнардаң пасха, ідӧк право хайраллаҷаң органнар паза халых пірігістерінің кізілері араласханнар, ол санда прокуратураның, идінҷектер пірігізінің паза даа пасхазының.
Азых ӱзӱріглерні асхан Хакасияҷа федеральнай налог службазының управление устағҷызы Светлана Диденко. Халғанҷы чылларның сананыстарын кӧрзе, ӧрт сыхчатханы, тоғынҷыларның тоғыс орнында саайланчатханы паза изірткіліг суғларға оохчатханнар саны ӧсче, уламох халғанҷы кӧзідіг. Аннаңар Россияда сыныхтағларның реформазын иртірерге чарадылған, оларның чардығы налог службаларының тоғызына теелче. Азых ӱзӱріглер, тізең, сыныхтағ теелчеткен предприятиелернің, идінҷектернің сағыс-кӧрізін чыырға полызар.
Пастап Хакасияҷа федеральнай налог службазы управлениезіндегі пӧліктер пастыхтары 9 айның тоғыс салтарларынаңар искіргеннер паза тоғыстарының наа оңдайларын чарытханнар. Искіріглердең пілдістіг полған - ӱлгӱ органнары налог тӧлирін пос кӧңніліг идерге пӧгінчелер. Чуртағҷы, предприятие парыстарын пос кӧңнінең кӧзідерге кирек. Налог тӧлепчеткеннернің пос кӧңніліг тудынчатханы іле кӧрінзе, сыныхтағлар саны даа хызырылар. Азых оңдайнаң тоғынчатханнарзар артых сурығлар даа сығыспинча нооза. Парыстар асхынах, чӧптезіглер, тізең, килкім ахчаларға иділче? Хайдар ахча алғазың? Мындағ сурығлар сығыспас ӱчӱн, бизнеске тӱзімніг тоғынҷаң оңдайлар тӧстелерге кирек.
Садыға алай полызыға чӧптезіг иділчетсе, налог службалары хайзы даа сарин сыныхтирлар, ол санда алындағы чӧптезіглерҷе. Пірее ікінҷілестіг искіріг табылза алай сын нимес искіріг ілезіне сығысса, сыныхтағлар иртірілер, ол санда предприятие санға алылған орында. Пӱӱнгі кӱнде предприятиее, идінҷекке, юридическай лицоға хайди даа санға алылған орында тоғынарға кирек. Ол орнында сынында тоғынминчатса, хатығлаттырарға даа чарир. Пасха сурығлар сығыс килче, хаҷан налог декларацияларында кӧзіділген искіріглер пасхалалчатса. Ол пазох пір сыныхтаға сылтағ.
Хакасияҷа федеральнай налог службазының управлениезі сыныхтағлар салтарларынҷа чарғы алнындағы тоғысты апарча. Іди ол читіре тӧлелбеен налогтарны тӧлеттірерінҷе тоғынча. Пілдістіг, пос киреенең айғасчатханнар ідӧк «сынны» тілепчелер. Салтарында ілезіне сығарылған сайбағларның хай піреезінҷе налог службазындағылар паза бизнестегілер пір сағысха килчелер. Халған сурығларҷа чарғызар айланчалар.
Искіріглер соонаң Хакасияның идінҷектер праволарын арачылирынҷа уполномоченнай Василий Кудашкин управление устағҷызынаң налогтарның хайди чыылчатханын чарыт пирерге сурынған. Светлана Диденконың искіриинең, республикада налогтар чыылчатханы чыл сай ӧсче: пӱӱл 9 ай аразына налогтар, 2016 чылның пуох тузынаң тиңнестірзе, 18 % кӧп чыылған. Олох туста налог службазы кічіг паза ортын бизнестің налог тӧлепчеткен чардығын алынҷа сыныхтағда тутпинча. Че республикаҷа управление устағ-пастаа позына андағ ӱзӱріг иткен, хайда кічіг паза ортын бизнестегі субъекттернің саны алысчатханы кӧрінмеен. Піреезі тоғызын тохтадыбысса, пасхазы санға алылча, ідӧк регионнаң пасха регионнарзар кӧсчелер, піссер ідӧк пос киреенең айғасчатханнар килчелер. Іди ол сан пір синде тудылчаттыр. Паза пір сидік сурығ - пір кӱнге азылған фирмалар. Олар тӱзімніг тоғынчатхан идінҷектернің, предприятиелернің тоғызын сайбап салчалар, удаа, кӱҷӱрлеп, ӱреге кир салчалар. Че ноға-да ілезіне сығарылған андағ фирмалар ам даа налог службазынаң суурылбааннар, пір дее оңдайнаң хатығлаттырбааннар. Налог службазындағыларның нандыриинаң, тоғыстың наа оңдайлары ам на чуртасха кирілчелер, аннаңар оларның салтарлары сағам кӧрінминче. Амды налог инспекторлары андағ ікінҷілестіг фирмаларның тоғызын удаа сыныхтир осхас. Сын оңдайнаң тоғынминчатханнардаңар пірее искіріг пар полза, амох таа оларны сыныхтирға тимделер.
Пу сурығны пӧгерге полызар наа оңдай: предприятиені алай идінҷекті сыныхтаан соонаң аны, ӧнетін пічікке киріп, хызыл, сарығ алай ноған ӧңнең таныхтирлар. Хомай тоғынчатханнар хызыл ӧңнең таныхталарлар, чахсы тоғынчатханнар - ноған, улуғ нимес «алҷаастар» иткеннер - сарығ ӧңнең.
Тиксі алза, налог тӧлепчеткеннернің постарының тоғызына теелчеткен кӧп сурығлар полған. Азых ӱзӱріглер кӧзіткеннер, мындағ тоғазығлар чидіспинче. Хайзы даа сарина ол тузалығ ирткен. Аның салтарларынҷа ікінҷі азых ӱзӱріглер тимнелер. Управление устағ-пастаа пазағы чыылығларны уламох тузалығ паза толдыра искірігліг иртірер ӱчӱн, идінҷектерні сурығларын азынада пирерге сурынған. Азынада искірігҷе, пазағы азых ӱзӱріглер 2018 чылның февраль айында иртірілер.
Таныхтирға кирек, чуртағҷыларның налог тӧлирінҷе сурығлар полза, Хакасияҷа федеральнай налог службазы управлениезінің специалисттері оларға нандыр пирерлер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде