НАА ЧЫЛДА - НАА КӦСТЕГЛЕР
17.01.2018
Хабарлар
Юрий САГАЛАКОВНАҢ Ольга ДОМОЖАКОВА чыл пӧгіннерін ӱзӱрчелер.
ХАКАС ТІЛІН ХАЙРАЛЛИР ПАЗА ТИЛІДЕР СУРЫҒНЫ РЕСПУБЛИКАНЫҢ ӰГРЕДІГ ПАЗА НАУКА МИНИСТЕРСТВОЗЫ УЛУҒ ХАЙЫҒДА ТУТЧА. ТИКТЕҢ НИМЕС, ЧЫЛ ПАСТАЛҒАНДОХ АНДА ХАКАС ТІЛІНЕ ПАЗА ЛИТЕРАТУРАЗЫНА ТЕЕЛЧЕТКЕН УЧРЕЖДЕНИЕ ТОҒЫНҶЫЛАРЫ ЧЫЫЛЫСХАННАР. ОЛАР - РЕСПУБЛИКАНЫҢ ӰГРЕДІГ ПАЗА НАУКА МИНИСТЕРСТВОЗЫНЫҢ НАЦИОНАЛЬНАЙ ӰГРЕДІГ ПӦЛИИНІҢ ПАЗА ХАКАС КНИГА ИЗДАТЕЛЬСТВОЗЫНЫҢ ТОҒЫНҶЫЛАРЫ, ХАКАСИЯНЫҢ ТІЛ, ЛИТЕРАТУРА ПАЗА ТАРХЫН НАУКА-ІСТЕЗІГЛІГ ИНСТИТУДЫНЫҢ УЧЁНАЙЛАРЫ ПАЗА ХАКАС НАЦИОНАЛЬНАЙ ГИМНАЗИЯ-ИНТЕРНАТТЫҢ УСТАҒҶЫЛАРЫ. ПРАЙЗЫ ОЛАР 2018 ЧЫЛДА ХАЙДАҒ КӦСТЕГЛЕРНЕҢ ТОҒЫНАРЫНАҢАР ӰЛЕСКЕННЕР.
Чыылығнаң Хакасияның ӱгредіг паза наука министрінің орынҷызы Юрий Сагалаков устаан. - 2018 чыл піске тӱзімніг ползын. Пу чылда тілібісті, хайраллап, кӧдірелер. Ол, тізең, пістің тоғызыбыснаң палғалыстығ, - чооғын пастаан Юрий Гаврилович. - Пілчезер, пу чыл пістің республикада Ӱгредіг чылы тіп чарлал парған Аннаңар аны хоостыра пӧгіннер ідӧк илееде...
Че тіл тилідерінҷе хайдағ пӧгіннер республиканың ӱгредіг паза наука министерствозы турғысчатханнаңар национальнай ӱгредіг пӧлиинің устағҷызы Ольга Доможакова алғыда чоохтап пирген. Аның таниинаң, пӱӱл уғаа кӧп мероприятие полары кӧріл парған. Ол кибірге кір парған паза наа мероприятиелер. Іди пӱӱл Наука кӱні паза Хакас тілі кӱні таныхталар, олғаннарға ӱгредіг телепроект сығарылар, «Иң артых национальнай школалар» марығ иртірілер, «Ызых тағның кип-чоохтары» хакас сӧбірелер фестивальы полар паза даа кӧп пасха мероприятие иртер. Прайзы олар Ӱгредіг чылына чарыдылар.
Ідӧк Ольга Васильевна республикада хакас тілін ӱгренчеткені хоостыра наа мониторинг иртірерінеңер искірген. Іди чыл сай нинҷе пала хакас тілін ӱгренчеткені сыныхталҷаң полза, амды ідӧк олғаннар хайдағ синде пос тілін пілчеткеніне хайығ айландырылар паза школаларның тіл тилідер оңдайлары кӧрілер.
Олғаннар хайди пос тілін пілчеткенін олимпиадалар хоостыра даа сизінерге чарир. Республиканың ӱгредіг паза наука министерствозының национальнай ӱгредіг пӧлиинің ӧӧн специализі Анна Танбаеваның чооғынаң, олимпиадалар республика синінде 90 чыллардаң сығара иртірілчелер. Полған на сай тоғыстар узарадылчалар паза наа нимелер кирілчелер. Іди пӱӱл пастағызын на хакас тілі паза литература олимпиадазына ат пирілген. Пу чылда ол хакас учёнай М.И.Боргояковтың адына чарыдылча. Наа нимелер санында ідӧк олимпиада чӧрімі пасталчатханын таныхтирға кирек. Аны хоостыра ирткен чылларда хакас тілінҷе паза литературазынҷа олимпиадаларда араласханнар паза пӧзік чидіге читкеннер чеестелерлер. Таныхтирға кирек, пӱӱл хакас тілі паза литература олимпиадазының тоғызында кӧп наа ниме кӧрілче, че андар піс пасха сығарыста айланарбыс. Амды олимпиаданың халғанҷы чардығы халған - ол республика синіндегі чардых.
=================================================================================
ПӰӰЛ НАУКА КӰНІ ПАЗА ХАКАС ТІЛІ КӰНІ ТАНЫХТАЛАР, ОЛҒАННАРҒА ӰГРЕДІГ ТЕЛЕПРОЕКТ СЫҒАРЫЛАР, «ИҢ АРТЫХ НАЦИОНАЛЬНАЙ ШКОЛАЛАР» МАРЫҒ ИРТІРІЛЕР, «ЫЗЫХ ТАҒНЫҢ КИП-ЧООХТАРЫ» ХАКАС СӦБІРЕЛЕР ФЕСТИВАЛЬЫ ПОЛАР ПАЗА ДАА КӦП ПАСХА МЕРОПРИЯТИЕ ИРТЕР. ПРАЙЗЫ ОЛАР ӰГРЕДІГ ЧЫЛЫНА ЧАРЫДЫЛАР.
================================================================================
Хайди Анна Антоновна таныхтаан, амғы туста олимпиаданың школадағы чардығы сағыссыратча. Сананыстар хоостыра, республикада ӱс муң азыра пала (5 - 11 класстағы ӱгренҷілер) хакас тілін предмет чіли ӱгренче, че школадағы олимпиадаларда хакас тілінҷе 20 % ле олған араласча, хакас литературазынҷа - 19 %. Ол уғаа асхынах.
|
Мындағ саннар Юрий Сагалаковты ідӧк хомзындырған.
- Полған на марығның кӧзідии кӧп чон араласчатханынаң палғалыстығ. Ползын ол спортта алай пасха даа тоғыста. Пастағы чардыхта кӧп кізі араласса, чахсылары таллалча нооза, - теен республиканың ӱгредіг паза наука министрінің орынҷызы. Аннаңар амды олимпиаданың школадағы чардығына улуғ хайығ айландырылардаңар чоох парған.
2018 чылда ХакНИИЯЛИ-ның тіл пӧлии хайдағ пӧгіннернең тоғынарынаңар аның устағҷызы, филология наукаларының кандидады Артём Кызласов искірген. Ідӧк чоох тутхан фольклор пӧлиинің устағҷызы, филология наукаларының кандидады Надежда Чистобаева. Терминология комиссиязы хайдағ кӧстеглернең пӱӱл тоғынарын филология наукаларының кандидады Ирина Чебочакова чоохтаан. Іди оларның тоғызы хоостыра кӧп чӧп кірген. Кӧзідімге, Анна Танбаева чарыхха сыххан книгаларнаң чонны таныстырарға кирек тіп таныхтаан. Хакас книга издательствозы директорының орынҷызы Нина Толмашова амғы тахпахчыларның кӧглерін чыырға чӧптеен. Аны пӱӱнгі кӱнде пар тахпахтар соонаң чіт парары чӱрексітче. Чылдаң тахпахчылар саны хызырылып одырар нооза, тахпахтар, тізең, ідӧк ас полып одырарлар. Хакас книга издательствозының тоғызы хоостыра Нина Антоновна пӱӱл хайдағ книгалар сығарыларынаңар искірген. Іди пӧгінде - 10-11 класстарға хакас тілі паза литература учебниктерін сығарары. Ідӧк хакас книга издательствозының электроннай учебниктер идер опыды пар, аннаңар пӱӱл ол тоғыс ідӧк узарадылар тіп таныхталған.
Хакас национальнай гимназия пос тілін тилідерінҷе ідӧк улуғ тоғыс апарча. Аннаңар директорның орынҷызы Лилия Ахпашева чоохтаан. Аның искіриинең, хакас гимназиязында прай даа класстарда хакас тілі уроктарына частар хозыл парған. Паза хакас тілінҷе ӱс опыттығ ӱгретчінең хада чиит специалисттер тоғынчалар. Лилия Олеговна чиит ӱгретчілернің уроктары уғаа хынығ паза чапсых иртчеткенін таныхтаан. Ідӧк, хакас тілін пілчеткен чиит воспитательлер тоғынып пастааннаң, национальнай гимназияда уроктар соонда хакас тілі ӧткін тузаланыл сыххан тидір.
Пу чыылығда кӧрінген, ӱгредіг паза наука тоғынҷылары пу Ӱгредіг чылынзар улуғ кӧстеглернең кірчелер. Полғанының на пу чылға ізеніс пар. Аннаңар даа ол тӱзімніг иртчең полбас па? Че анзы соонаң кӧрінер.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы