«АРҒАН ПӰГӰРЕК» АППАРАТТАР АЛЫЛҒАН
17.01.2018
Хабарлар
Ирткен чыл тоозылчатханда, Г.Я. Ремишевскаяның адынаң республиканың имнег туразы диализ идеріне 4 миллионҷа салковайға турчатхан 4 «арған пӱгӱрек» аппарат паза 9 миллион салковайға турчатхан суғ арығлаҷаң система алып алған. Пу кӱннерде Хакасия пазы орынҷызының тоғызын толдырчатхан Ирина Смолина паза хазых хайраллаҷаң министр Владимир Костюш наа оборудование хайди тоғынчатханын кӧрерге чӧргеннер.
Оборудование алылғаны диализке 37 наа пациентті аларға паза ол имнег процедуразын иртіреріне теесті чох идерге оңдай пирер. Наа аппараттарға ахча регион правительствозының паза «Русал» компанияның аразында пірге тоғынардаңар иділген чӧптезіг хоостыра позыдылған. Ол 2017 чылға иділген чӧптезігде Хакасияның пазы Виктор Зимин паза «Русалның» ӧӧн директоры Владислав Соловьев хол салғаннар.
Республиканың хазых хайраллаҷаң министерствозының пӧгіннерінде - Хакасияда гемодиализ сетьін алғыдары. 2018 чылда кіннің пӧліктері Шира паза Асхыс аймахтарының имнег тураларында азылар. Ол имнег тураларының специалисттері «нефрология» профильҷе ӱгренеріне пу чылның пастағы кварталында ызыларлар.
Г.Я.Ремишевскаяның адынаң республиканың имнег туразының гемодиализ кіні Хакасияның пазы Виктор Зимин пастағнаң сыхханы паза хабасханы сылтаанда 2012 чылда тӧстелген. Гемодиализ кіні пӱгӱректері ағырығ кізілерге имнег полызиин качестволығ паза тузында пир турар кӧстегліг полча. Ол пӧгіннерге республика бюджедінең «Хакас Республиканың хазых хайраллирын тилідері 2011 - 2013 чылларға» программаҷа 28 миллион салковай позыдылған. Соонаң гемодиализ кінінің пӧлии Саяногорскта азыл парған.
Пӱгӱрегінең тың ағырығ кізілерге гемодиализ идері чуртас тооза киректелче. Процедура тузында хан диализ фильтрінің мембраназын, хайзы кізінің ағырығ пӱгӱрегі орнына тоғынча, иртіп, арығлалча.
Пасха оңдай донор органын турғызары полча, че піреезіне хазии хоостыра андағ операция идерге чарадылбинча. 2017 чылда Хакасияның 20 чуртағҷызына пӱгӱрек трансплантациязы иділген. Теесте ам даа 10 кізі турча, олар килістіре донор органын сағыпчалар.
Автор :
Хакасияның хазых хайраллаҷаң министерствозы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде