ХАКАСИЯДА АРАЧЫЛАНЫСЧА ХАЗНА ЧАХЫҒЛАРЫ ТОЛДЫРЫЛЧА
20.02.2018
Хабарлар
Министрнің чорығы. 16 февральда Россияның арачыланыс министрі, армияның генералы Сергей Шойгу Хакасиязар кил парған. Аннаң хада погоннарында кӧп улуғ чылтыстығ генераллар паза полковниктер толдыра килгеннер.
ЧООХТИРҒА КИРЕК, СЕРГЕЙ КУЖУГЕТОВИЧ ХАКАСИЯДА УДАА ПОЛ ПАРЧА, ОЛ КИЛЗЕ, АНДАҒ-МЫНДАҒ СУУМ-СААМ ДАА ПОЛБАҶАҢ, МИНИСТР КИЛГЕННЕҢЕР ОЛАҢАЙ ЛА ИСТІП АЛҶАҢ ПОЛҒАБЫС. АМДЫ, ТІЗЕҢ, ОЛ СЛУЖБА ХООСТЫРА ТОҒЫС ЧОРЫҒЫНАҢ ЦЕНТРАЛЬНАЙ ЧАА ОКРУГЫНҶА СЫНЫХТАҒНАҢ ЧӦРЧЕ ОДЫР. АННАҢАР АННАҢ ХАДА АРАЧЫЛАНЫС МИНИСТЕРСТВОЗЫНЫҢ, ЧАА ОКРУГЫНЫҢ ПРАЙ УСТАА ЧӦРЧЕ. ІДИ ОЛ НОВОСИБИРСК ОБЛАЗЫНДАҒЫ, ТУВАДАҒЫ ЧААҶЫЛАР ГОРОДОКТАРЫН СЫНЫХТАП ЧӦРГЕН.
Арачыланыс министрі, Хакасиязар киліп, «Абаканвагонмаш» заводта полардаңар искіріг читкенде, журналисттер аны заводта удурлирға тимнен салғаннар. Москвадағы генераллар килер прай орамаларда ГИБДД тоғынҷылары турғлааннар. Заводтың істінзер кіріп, аның устағ-пастаа туразы хыринда улуғ пастыхтарны сағыпчабыс.
Анда піссер, вахтаҷа иртіп, Виктор Николаевич Преловский пастыр килді. Ол Хакасияның Ӧӧркі Чӧбінің президиумында комитет кнезі полып ӱр тоғынған, аның алнында кӧп чыллар «Абаканвагонмаш» производство пірігізінің ӧӧн директоры полған. Ол, сала хомзынып, чоохтапча:
- Мин пу заводта 17 чыл тоғынғам, оларның 15 чылын ӧӧн директор полғам. Амды мині чиит хадағҷылар заводсар позыдарға хынминчалар, таныбинчалар нооза. Мин тоғынчатхан туста пӱдіріг тоғыстарын апарарға «Абаканвагонстрой» трест тӧстеп алғабыс, аның устағҷызына Сергей Шойгу турғызылған.
Трест чахсы тоғынчатхан, молат хайылдырҷаң завод пӱдірілген, городта чурт, школалар, олған садтары пӱдірілчеткен, завод городты тутчатхан предприятиее айлан парған. Ол туста чурт пӱдіриин амғы чіли квадрат метрлернең санабаҷаңнар, квартираларнаң санаҷаңнар. Завод чылда ӱс муң контейнер сығарҷаң. Че перестройка пасталғанда, прай ниме изел парыбысхан.
Ам завод хати азахха турып пастапча. Машиналар пӱдіриине Россияның президенті Владимир Путин улуғ хайығ салча. Машиналар пӱдірии экономиканың тӧстее полча, ол отрасль чахсы тоғын сыхса, хазнаның прай экономиказы тиліғі сығар.
Хакасияда «Абаканвагонмаш.» заводтың тоғызына чахсы хайығ саларға кирек, ағаа чарытхы пирері, тимір чоллар прай пар. Мының алнында заводта тоғынчатханнарны аарлаҷаңнар, чал ахчазы пӧзік полған. Амды арачыланыс министерствозы заводха чахығлар пирчеткеніне ӧрінчем...
Іди чоохтас турчатханыбыста, заводсар Оӧркі Чӧп кнезі Владимир Штыгашев паза Оӧркі Чӧп аппарадының ӧӧн эксперті Георгий Майтаков чиде тӱскеннер. Тӱрчедең завод істінзер микроавтобустар паза автомобильлер килгеннер. Олардаң министр Сергей Шойгу, Хакасияның пазы Виктор Зимин паза офицерлер сыхханнар.
Пастап олар, тасхар алынҷа турчатхан модульнай туразар кіріп, аның істінде хызылған искірігліг стендтернең танысханнар. Анаң прай делегация цехтарзар парған, анда ол модульларны пӱдірчелер.
Россияның арачыланыс министерствозы «Абаканвагонмаш» заводха пирген чахығларны толдырар тоғыс пу чыл тоозылғанха чидер. Сергей Шойгу, производство цехтарында хайдағ материаллардаң модульнай туралар пӱдірілчеткенін кӧрглеп, прай материалларны холнаң тутхлап, узы-тӱбіне тӱсчеткен. Ідӧк ол кирек чӧптер пир турған. Аның чооғынаң, ӧӧн хайығ саларға кирек материалларның качествозына, экология саринаң арығ полчатханына, ідӧк тура истіг поларына.
Предприятие чахығларны чахсы паза тузында толдырчатса, министерство хоза чахығлар пир турар. Андағ чахығлар саны илееде хозыл парза, заводта тоғыс орыннары ідӧк кӧп полар. Арачыланыс министерствозы чахығлар санын ӱс хати кӧп пирерге пӧгінче. Предприятие сығарчатхан модульларны Центральнай паза Ӱстӱнзархы чаа округтарында кирексіпчелер. Ідӧк олар Сириязар ызылчалар.
Пу модульлар тың улуғ ниместер, оларны табырах чыыбызарға чарир, кирек орынзар апарыбызарға даа оой. Амды конструкторларға ол модульда пос алынха чуртаҷаң прай ниме пар поларынаңар сағынарға кирек. Хайди андар суғ пирердеңер, чарытхы тартардаңар паза пасха даа чуртирға истіг кирек нимелердеңер сағынарға.
«Абаканвагонмаш» заводта полған соонда, арачыланыс министрі чааҷылар городогынзар чол тутхан. Анда ам зенитнай ракеталығ бригаданың штаб комплексі пӱдіріл парған. Тӱрчедең бригада наа орынзар кӧзер. Чааҷылар паза оларның сӧбірелері истіг оңдайларда чуртирлар. Оларға кирек социальнай инфраструктура пӱдірілче. Республикада служба иртчеткен чааҷылар уғаа кирек пӧгін толдырчалар. Бригаданың С-300, С-400 комплекстері республиканың паза чағынғы регионнарның стратегическай объекттерін - Сойан-Сус ГЭС-ты, Майнскай паза Хызылчардағы ГЭС-тарны, Сойан алюминий заводын, Ағбан паза Ким суғлар кизіре тахталарны - ізестіг хадарчалар.
Арачыланыс министрі Сергей Шойгу паза Хакасияның пазы Виктор Зимин, чааҷылар городогында полып, тоғазығ иртіргеннер. Виктор Михайлович министрге республикаа улуғ хайығ салчатхан ӱчӱн алғызын читірген. Аның сылтаанда «Абаканвагонмаш» завод наа тыныс алынча, анда ам 260 кізі тоғынча, ол сан ам даа ӧзеріне ізеніс пар. Ідӧк Хакасияның пазы Сергей Шойгузар «Патриот» парктың пӧлиин республикада азар пастағнаң айланған. Министр андағ айланысха чӧпсінген, министерство ағаа хабас пирерге тимдезінеңер искірген. Андағ паркта спорт площадкалары, партизаннар аалы, сабланыс аллеязы, успас от полары кӧрілче.
Автор :
НИКОЛАЙ СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде