ӰННЕР ЧАПЧАҢ САНАЛАР
20.02.2018
Хабарлар
Табығлар-2018. Хакасияның Табығ комиссиязы табығ бюллетеньнерін санға алҷаң комплекстің презентациязын иртірген.
Ирткен неделяда, 16 февральда, Хакасияның Табығ комиссиязы пістің республикада пастағызын на тузаланылар табығ бюллетеньнерін санға алҷаң комплекстің (КОИБ) презентациязын иртірген. Чыылысхан чонны ідӧк 2011 чылдаң сығара хайзы табығ участоктарында тузаланылчатхан электроннай ӱн пиріс комплекстерінең (КЭГ) таныстырғаннар.
КОИБ хайди тоғынчатханынаң танысчалар Ағбан город администрациязы туразында ирткен презентацияны Хакасияның Табығ комиссиязының кнезі Александр Чуманин асхан. Хайди ол таныхтаан, табығ бюллетеньнерін санға алҷаң комплекстер (КОИБ) пістің республикада пастағызын на Россия президентіне табығлар тузында тузаланылар.
- Халғанҷы туста табығ тоғызында наа техниканаң тузаланары удаадаң удаа кирілче. Арса, хаҷан-полза табығҷылар, ибде одырып, Интернет пастыра ла ӱн пир полар оңдайлығ пол парарлар, - таныхтаан республиканың Табығ комиссиязының устағҷызы.
Че пӱӱнгі кӱнде табығҷыларға ӱн пирер ӱчӱн табығ участогынзар парарға кирек. Наа техника, тізең, амғы туста ӧӧнінде табығ комиссияларының тоғызын нииктир пӧгіннең тузаланысха кирілче. КЭГ-тар кӧрімінең экранға тӧӧй ползалар, хайзынзар салаанаң пазып ӱн пирерге чарир, КОИБ-тар кӧрімінен мының алнындағох ӱн пирҷең олаңай харчах осхастар. Оларзар ідӧк ле чаҷын бюллетеньнерні кире тастапчалар. Наа ниме аның ӧнетін сканерліг чабии полча. Табығҷы бюллетеньін сканерзер кире сухса, система мындох кемге ӱн пирілгенін кӧрче паза санға алча. Ідӧк позы прай ӱннерні хозып санапча паза салтарлар итчеткен QR-кодтығ протоколны тимнепче. Андағ оңдайнаң табығ комиссиялары кізілерінің тоғызы хай-хай нииктелче - бюллетеньнерні холнаң санирына ортымахти ікі час хорадылчатхан полза, КОИБ-тар полызиинаң олох тоғыс чарым час аразына толдырыл парча. Табығ комиссиязының кнезі Александр Чуманиннің чооғынаң, КОИБ комплекс пос алынҷа паза алҷаас чох тоғынчатхан пик арачыланыстығ система полча, аның тоғызына кізі ара кір полбас.
Россия президентіне табығлар тузында Хакасияда 19 КОИБ тузаланылар, олар прайзы Ағбан городтың табығ участоктарында турғызылар. Анзы Хакасияның ӧӧн городында иң кӧп табығҷы полчатханынаң палғалыстығ. Ідӧк Харатас городтың 21 табығ участогында КЭГ комплекстері турғызылар тіп кӧрілче.
Презентация тузында чыылысхан чонны КОИБ-тың тоғызынаң таныстырғаннар. Хынған на кізі, табығ бюллетеньінде пазып, аны КОИБ істінзер сух кӧрер оңдайлығ полған. Бюллетеньні саба сухчатханнаңар, аны пазылған саринаң, тӱңере салып, суғарға кирек, мындох электроннай ӱн сизіндірче. Таныхтирға кирек, ӧнетін печать чох бюллетеньнерні КОИБ санға албинча - олох ла электроннай ӱннең прайзына истілдіре «килістіре нимес бюллетень суғылған» тіп искірче. Аннаңар ол харчахнаң кӱҷӱрлен полбассың тиирге чарир.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде