ЧАСОВНЯ ПӰДІРІЛЕР ОРЫНДА ПАСТАҒЫ КІРПИС САЛЫЛДЫ
13.03.2018
Хабарлар
Киртініс чолынҷа. Алтай аймаандағы Кӧк хайа аалда часовня полар.
КӦК ХАЙАДАҒЫ ОКТЯБРЬСКАЙ ОРАМАДА МЫНДАҒ ЧАРЫХ КӰНДЕ ПАРКТЫҢ АЧЫҒЫН ЧИҢІС ПАРКЫ ОРНЫХЧА. АНДА ИЛБЕК АДА ЧААДА ПОЛҒАННАР. АРХИЕПИСКОП ИОНАФАН АРАЛАСЧЫЛАРЫНА ХУМАРТХЫ ТАС ТУРЧА.
8 МАРТ ӰЛӰКӰН АЛНЫНДА ПАРКТА ЧАСОВНЯ ПӰДІРІЛЕРІ ХООСТЫРА ПАСТАҒЫ КІРПИС САЛЫЛҒАН.
КӦК ХАЙА ЧУРТАҒҶЫЛАРЫНАҢ ХАКАСИЯ ПАЗЫ ВИКТОР ЗИМИН, ХАКАСИЯНЫҢ ПАЗА АҒБАННЫҢ АХ АРЫҒ АРХИЕПИСКОБЫ ИОНАФАН ПӰДІРІЛЕР ЧАСОВНЯНЫҢ ЧИРІН ЧАРЫТХАН. АБЫСТАР ХУДАЙ СӦЗІН ПАЗА ЫЗЫХ ЫРЛАРНЫ ЧОНҒА ЧИТІРГЕННЕР. ИОНАФАН КИБІРЛИ ИРБЕННЕҢ АҒАС КІРӦСТІ ИБІРГЕН. АНЫҢ СООНАҢ ЧАРЫТХАН СУҒНЫ ЧИРГЕ КІРӦСТИ ЧАЧЫРАТХАН.
ЧАСОВНЯ ПӰДІРІЛЕР ОРЫНДА ПАСТАҒЫ КІРПИС САЛЫЛДЫ
Часовняның тӧзінзер кірӧстеен пастағы кірпистерні Виктор Зимин паза архиепископ Ионафан салғаннар. Оларға пасхазы даа хозылған. Ионафан цементке салылған кірпистерні елей ызых хайахнаң сӱртклеен.
- Худай ӧргезі Илбек Ах арығ Василийнің адынаң адалар, - чыылған чонға архиепископ Ионафан чарыдығлығ чооғын читірген. - Пу уғаа ӧріністіг кирек. Кізее хаҷан даа худы-чаны тайанар паза чазыттарын азынар орын кирек. Халғанҷы туста тигіриблер пӱдірілче, чон киртініске паза Худай сӧзіне айланча. Православиенің ызых киртінізі чонда хаҷан даа полған, полар паза чуртир. Ол хазна паза культура ӧзені полча тізе, саба полбас. Прай киртіністернің пос кӧрізі пар, тигіриблерін пӱдірчелер. Че тархын хоостыра Россияда православие пик орныхча.
Прай чӱреемнең пӱдірігҷілерге алғызым читірчем! Сіліг часовня пӱт парар тіп ізенчем паза киртінчем.
Архиепископ республика пазы Виктор Зиминге православие паза даа пасха киртіністерге улуғ хайығ салылчатханы, мындағ ызых пӱдіріглер апарылчатханы ӱчӱн алғызын читірген.
- Илбек чағбан парчатхан туста Худайға киртіністіг кирек хоостыра чыылысханыбыс уғаа ӧріністіг, - таныхтаан В.М.Зимин. - Православие Худайға киртініс - ол Россия. Киртініс пісті хорылыстығ даа, часкалығ даа тустарда піріктірче. Чонға мындағ орыннарны пӱдірері паза азары - анзы правительствоның, ідӧк тигірибнің тоғызы.
Часовня туразының пастағы кірпистері салыл парды. Кӧк хайа чуртағҷыларына ол хайди даа кирек. Олар Илбек Чиңіске чарыдылған парктың ачығын ызых чирге санапчалар нооза.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы