АЛЫЗЫҒЛАР ЧАХСЫ ЛА САРИНЗАР ПОЛЗЫН
13.03.2018
Хабарлар
Табығлар-2018. Хакасияның чуртағҷылары табығлар хоостыра сағыстарынаң ӱлесчелер.
Эльвира ТАНАЧАКОВА, Ӱс Чулдағы аал чӧбінің бухгалтері:
- Табығларны иртірбинчем, полған на сай араласчам. Табығларда кем утып алары мині сағыссыратча. Минің іҷе-пабам табығларда хаҷан даа араласчаң, аннаңар кічігдӧк мағаа ӧӧн сағысты читіргеннер: табығларға чӧрерге кирек, минің ӱнім киректелче. Амды мин палаларымны ідӧк табығларға чӧрерге кӱстепчем. Кемнің ӱчӱн ӱннерін пирчеткені минің киреем нимес, че табығларда олар хайди даа аралазарға киректер. Табығлар пістің чуртазыбысха кӧнізінең теелче нооза.
Илларион БОРГОЯКОВ, «Аскизтеплоснаб» МУП-тың тоғынҷызы:
- Хайди табығларға чӧрбес. Табығларға чӧрбинчеткен кізілер хайхатчалар. Нимедеңер сағынып, табығлар кӱнінде ибде, диванда чадып, телевизор кӧр чадарға. Ағаа хоза, соонаң табығларда араласпинчатхан кізі, табығларда утып алған кандидатты хомайлап, хайди даа перінче.
Морсынчам кізілерге, хайзылары постарының кӧрістеріне турысчалар, ибіркілерін ағаа киртіндірчелер. Піс хонғанымнаң табығларға хада чӧрчебіс. Ӱн пир салған соонаң чӱрекке дее истіг пілдірче. Чуртас уламох чахсы саринзар айланарына ізеніс, киртініс тыыпча.
Николай ЯНГУЛОВ, Хара кӧл аал чуртағҷызы:
- Табығларға сыбыра чӧрчем. Пір дее иртірбеем. Минің кӧрізімнең, табығларға хайди даа чӧрерге кирек. Кандидаттарның программаларын хығырып алғам, аннаңар хайдағ кандидат хайдағ пӧгіннер турғысчатханын пілчем. Кемге ӱнім пирерін пілчемӧк.
Полған на кізі чуртас чахсы ла саринзар алызарына ізенерге кирек. Аннаңар прай чуртағҷыларға 18 мартта, табығ участогынзар парып, пірее кандидатха ӱнін пирібізерге чӧп пирчем.
Олег ШУЛБАЕВ, Н.Ф.Катановтың адынаң Хакас хазна университедінің ӱгретчізі:
- «Хазна хомай, киректер хомай парчалар». Пу чоохты кӧп истерге килісче. Чоохтанған кізілер, тізең, постары ибде одырчалар. Табығларға пір дее чӧрбинчелер. Піс чахсы чуртасты позыбыс тӧстепчебіс нооза. Аннаңар табығларға хайди даа чӧрерге кирек, сынап сині киртіндірчеткен кізіні табарға. Пірдеезі синің орныңа итпес ол таллағны. Ибде ле одырзабыс, чуртазыбыс андағох полар. Кӧзідімге, пастағызы парбаспын алай пірсі киліспинче тіпче. Іди кӧп кізінің ӱні чіт парча. Аннаңар, чахсы чуртирға сағынчатсаң, табығларға чӧрерге кирек тіп сағынчам.
Алексей КАРАМЧАКОВ, пӱдірігҷі, Ағбан город:
- Мин аалда тӧреем, андох ӧскем. Улуғлар табығлар кӱнін пайрамны чіли сахтапчатханнары сағызымда халған. Иң чахсы кип-азахтарын кизібізер ползалар... Клубсар уғаа ӧрчіліг чиде салҷаңнар. Анаң ӱн пирібіскен соонаң концерт турғызылҷаң. Че паза аалдағыларның «синің ӱніңнең тиксі хазнаның чуртазы палғалыстығ» тіп чооғы миизіме сиип парған. Аннаңар, город чуртағҷызы пол парып таа, мин полған на табығларға чӧрерге кӱстенчем.
Виктор ЧЕПЧИГАШЕВ, Ағбандағы улуғлар чӧбінің кнезі:
- Мин табығларға полған на сай чӧрчем. Пір алай ікі ле хати киліспеен. Тоғыс хоостыра ырах командировкаларда полғам. Че чӧрбеенде, ноға-да мині списоктаң сығарыбыстырлар. Анаң парғам, чоохтасхам. Мин мында чуртапчам, хайди табығларға чӧрбеспін теем. Аннаң сығара иртірбинчем.
Минің ӱнім хайди даа саналча нооза. Ол кізее ізенчем, ағаа киртінчем. Аннаңар ағааох ӱнім пирчем. Піс прайзыбыс чахсы чуртасха ізенчебіс.
Автор :
Наталья ТЮКПЕЕВА, Александра СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы