ЧОН ПІРГЕ ТУДЫНЗЫН
14.03.2018
Хабарлар
Кӱн сурии. Ағбан городтағы улуғлар чӧбінің чыылии иртті.
Чыылығны апарған Ағбандағы улуғлар чӧбінің кнезі Виктор Чепчигашев. Городтағы хакас пірігістернің устағҷылары паза олаңай тоғынҷылары пу кӱн аймах сурығларға теелгеннер.
Иң пастап «хакас» сӧстеңер чоох парған. Хайди искірген республиканың Улуғлар чӧбінің нандырығлығ хачызы Любовь Аёшина, полтыр андағ тус, хаҷан пісті «хакасецтер» дее адаҷаң осхастар. Че ол сӧс хыйа тасталған, амды піс хакастарбыс! Любовь Иосифовна ідӧк Хырғыс Республиканың устаа Пии аймаандағы Сос пилтірі аал хыринда Парыс ханға чарыдылған хумартхы тас турғыс саларға тіп пічік ысханнаңар чоохтаан. Че пістің чонның халых пірігістері хырғыстарның сурынызын хыйа иткеннер теен ол. Чарадыға сылтағ чоғыл.
Александр Котожеков пу чыылығда хакас чонның календарьына чарыдылған хумартхы чарды хазап салардаңар чоох апарған. Аның істезіглерінең, Хакасия іскеркі чирлердең хай-хай пурун тӧстелген. Чыл айлары аңнар хоостыра пістің чирде адалтырлар. Пу сурығнаң ол 2009 чылдох республиканың Улуғлар чӧбінзер айлантыр. Че, ачырғасха, ам даа нандырығ чоғыл теен Александр Иванович. Чыылығ араласчылары, Ағбан городта андағ чарды хазап салза, артых полбасчых тіп чарасханнар.
Паза уғаа чапсых таластар парғаннар республиканың ӧӧн городында хакас чонның кінін пӱдірер сурығҷа. Аны Ағбандағы улуғлар чӧбінің араласчылары хакас чонның съездінде кӧдіргеннерӧк. Пӱӱнгі кӱнге ол тадар иблер комплексінің проекті дее тимнел парған. Хорадар ахчазы ідӧк санал парған.
- 80 азыра миллион салковай! Аннаңар иң пурнада ол ахчаны табар оңдайларны тілирге чарадығ алылған. Ідӧк чыылығда ол кінде кемнер тоғынарын паза хайди тоғынарын ӱзӱргеннер.
Пай идінҷектерзер айланарға тіп чӧп полғанох. Че оларның нандырии мындағ полған: «Хайдағ даа идінҷек иң пастап ахчазын санапча. Мыннаң мындархы парызын кӧрче».
Анзы андағ. Кемге хынығ полар, кінні пӱдір салып, андар кӧріп ле турарға.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде