КРЫМ - ПІСТИ! ХАҶАНҒА ДАА!
20.03.2018
Хабарлар
Митинг-концерт. 18 март Россия чонына уғаа танығлығ кӱн полды: Россия президентіне табығлар ирткен, ідӧк Россияа Крым Республика паза Севастополь піріккен кӱн таныхталған.
Пастағы май площадьында ирткен митинг-концертте Хакасияда, прай Россиядағы чіли, чон Крым Россияа хозылған кӱнні пайрамни таныхтаан. Тӧрт чыл иртіп парды, хаҷан чарым олтырыхтағы чон, референдум иртіріп, Россияа хозылардаңар чарадығ алыбысхан. Аннаң сығара Крым Республика паза Севастополь город пістің илбек хазнабыстың субъекттері полыбысханнар. Пістің чон Крым Россияның чардығы полчатханына кӧнік тее парды.
Че США паза Западтағы хазналар андағ кирекнең пір дее чараспинчалар. Крымны піріктірген ӱчӱн, Россиядаң тоғыр аймах санкциялар киргеннер, ам даа кирчелер. Пістің хазна, ол санкцияларға тың хайығ салбин, экономиказын пос алынҷа тилітче, ол санда Крымның экономиказын. Чарым олтырых Украинада полғанда, андағы промышленность объекттері, чоллар саңай изел сыхханнар. Амды Россиядағы Тамань чарым олтырыхтаң Крымзар Европада иң узун тахта пӱдіріл парир. Анда ікі дее тахта - поездтер чӧрҷең тимір чол тахтазы паза автомобильлер тахтазы. Хайди теен Россияның президенті Владимир Путин: «Крым - пісти! Пу сурығ саңай чабыл парды. Крым суриин паза ӱзӱрерге кирек чоғыл».
Амды Крым чарым олтырых Россияа піріккен кӱн прай чонның ӱлӱкӱніне айлан парған. Хакасияда даа аны улуғ пайрам чіли таныхтааннар. 18 мартта Ағбанда Пастағы май площадьынзар чон толдыра чыылысхан. Табығлар кӱнінде чуртағҷылар, прай сӧбіренең табығ участоктарынзар ӱннерін пирерге чӧрген соонда, кӧнізінең город ортызындағы площадьсар тартылғаннар.
Ӧрчіліг кӧңніліг кізілернің холларында аймах ӧңніг шарлар, плакаттар, транспаранттар, флагтар полған. Алынҷа предприятиелернің тоғынҷылары, ӱгредіг заведениелерінін студенттері, ӱгренҷілері, учреждениелернің тоғынҷылары андар ӧменең чыылысханнар. Оларның транспаранттарында Хакасия Крымдағы чонға чӧпсінчеткеннеңер, оларға хабасчатханнаңар чоохталча. Политическай партияларның пістің республикадағы пӧліктерінің кізілері, чииттер, халых пірігістері пайрамда ӧткін араласханнар. Ибіре ідӧк пайрамнығ кӧглер, сарыннар истілген.
Мында таныхтирға кирек, чыл сай Пастағы май площадьында митинг-концерт иртіреріне кибірли чахсы хабасчалар Хакас хазна университедінің, Сибирьдегі федеральнай университеттің Хакасиядағы техническай институдының, Харатастағы тағ-пӱдіріг техникумының студенттері. Ідӧк хакас филармонияның тоғынҷылары чахсы концерт тимнепчелер.
«Крым - пісти!» чоохталчатхан лозунг-плакаттар прай саринаң кӧрінгеннер. Мероприятиенің ведущайы чарым олтырыхтың тархынынаңар искірген: хайди Россияның ах ханы II Екатерина аны пістің хазнаа піріктіріп алғаннаңар, Крымда полған чаалардаңар, аның махачы арачылағҷыларынаңар, Севастополь Крымның ізестіг бастионы полчатханынаңар. РТС-тың хабарҷызы Анна Ахпашева чарым олтырыхта пол килтір, ол Крымның амғы чуртазынаңар, анда ам хайдағ наа объекттер пӱдірілчеткенінеңер чоохтаан.
Пу пайрамны чон позы оңдайынаң иртірчеткенін мындағ ниме таныхтаан - мероприятиенің тоғызында хазна ӱлгӱ органнарының кізілері араласпинчатханы. Сценазар ӱлгӱ кізілерінің пірдеезі сыхпаан, чон аразында мағаа Хакасияның национальнай паза территориальнай политика министрі Михаил Побызаковты ла кӧрерге киліскен. Анзы пу ӱлӱкӱн сыннаң чонни полчатханын чахсы таныхтапча.
Мындағ чылығ, кӱн чарыпчатхан, айас кӱнде площадьта андағох ӧрчіліг, таңдағы кӱнге киртіністіг, патриот сарыннары толдырылған.
В.Г.Чаптыковтың адынаң Хакас филармониязының солисттері Алтай Республиканың паза Хакасияның саблығ артизі Артур Марлужоков, Хакасияның саблығ артизі Ольга Васильева, Александр Федоров, Александр Сибиряков паза Владимир Доржу, сценазар теести сығып, аймах сарыннарнаң чыылған чонны ӧріндіргеннер. Оларның аразында Владимир Доржу сарыннарын хакас тілінең толдырған.
Крым чарым олтырых Россияа хозылчатханнаңар Кремльде хол салылған соонда, Хакасияның чайаачы ӧмелері, постарының чарым олтырыхтағы чонға чӧпсінізін, хабазиин кӧзідіп, концерттернең Крымзар паза Севастопользар чӧргеннер. Ам даа оларның аразында палғалыс чахсы тудылча.
Пу пайрамнығ мероприятие Россия паза Крым пір хазна полчатханын, хада-пірге тудынызын чахсы кӧзіткен. Хайди плакаттарда пазылған: «Крым - пісти! Хаҷанға даа!» сӧстер прай чонның сағызын читірче.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде