ХАҶАН ДАА АЛНЫНДА ПОЛАРҒА
21.03.2018
Хабарлар
Марығ. А.М.Топановтың адынаң Хакас драма театрында «Мисс паза Мистер студенчество-2018» студенттер марии ирткен.
Хакасия пазы Виктор ЗИМИН «Мисс паза Мистер студенчество» марығ чиңісчілерінең хада.
РЕСПУБЛИКАНЫҢ ӰГРЕДІГ УЧРЕЖДЕНИЕЛЕРІНДЕ ӰГРЕНЧЕТКЕН ООЛ-ХЫСТАР ПУ МАРЫҒНЫҢ ФИНАЛЫНА КІРІП АЛАР ӰЧӰН КӦП КӰС САЛҒАННАР. ПОЛҒАНЫ ЛА ИҢ ХЫЙҒА ПАЗА ЧАЙААЧЫ ПОЛЧАТХАНЫН ЖЮРИ АЛНЫНДА КИРЕЧІЛЕЕН. ЧЕ ТАЛЛАҒ ЧАРДЫҒЫН 6 ХЫС ПАЗА 5 ООЛ ЛА ИРТІП АЛҒАН.
ПРАЙЗЫ ОЛАР СПОРТНАҢ ПАЗА ИСКУССТВОНАҢ АЙҒАСЧАТХАН ӦТКІН СТУДЕНТТЕР. ПУ УЛУСТЫ АННАҢ АНДАР ХАТЫҒ СЫНАҒ САҒААН. ЧЕ ОЛАР, АНЫ ДАА ТУРЫСТЫҒ ИРТІБІЗІП, ПАЙРАМНЫҒ ИИРДЕ ПОСТАРЫН ПРАЙ СІЛИИНЕҢ ПАЗА ЧАЙААЧЫ САРИНАҢ КӦЗІТКЕННЕР.
Іди финалға Николай Котюшев, Максим Кузнецов, Дмитрий Евдокименко, Егор Великих, Павел Булдаков, Татьяна Никитина, Юлия Кончакова, Светлана Тимофеева, Кристина Редькина, Дарья Новикова, Екатерина Асомчик сығып алғаннар.
Олар Хакас хазна университедінің институттарында, Хакасияның техническай институдында, Ағбанның колледж-училищелерінде ӱгренчелер.
«Мисс паза Мистер студенчество» марығның халғанҷы чардығы гала-шоу оңдайынаң ирткен. Мероприятие пӧзік синде тимнелтір. Кӧрігҷілер залға толдыра полған, оларның санында республиканың ӱгредіг организацияларының устағ-пастаа, ӱлгӱдегілер. Че иң хайығ тартчатхан аалҷыларға санирға чарир Хакасия пазы Виктор Зиминні паза Россияның Хазна Думазыньщ депутады Надежда Максимованы. Олар ідӧк оол-хыстарның ӱчӱн «ағырарға» килтірлер. Че мыннаң аалҷылар саны тоозылбинча. Пайрамнығ иирні апарған республиканың аалҷызы Вячеслав Макаров. Ол - КВН-дағы «Камызяки» ӧменің, «Однажды в России» скетч-шоуның араласчызы. Ачых-чарых, кӱлімзіреес оол кӧрігҷілерні чітіг тілінең паза хормачы чооғынаң аптаан.
Итсе-де, марығ араласчылары даа кӧрігҷілерге ирінерге пирбееннер. Чиит, ӧкерек, ӧткін студенттер видео-презентацияда, чайаачы номерлерде, кип-азахтар кӧзідиинде постарын прай саринаң кӧзіткеннер. Кӧглер, теелбектер, кибелістер, ойыннар полғаннар. Че полған на чайаачы номер араласчының кӧңнін паза сағызын читірчеткен. Кӧзідімге, имнег-психолого-социальнай институттың студенті Николай Котюшев ойын пастыра чуртазынаңар тирең сағыстығ кибеліс хығырған. Мин иң пастап чалғыс хакас араласчының ӱчӱн «ағырғам» паза чӧпсінгем. Чиит оол позын уғаа ізестіг, турыстығ тудынған. Кип-азах кӧзідиинде дее аннаң артых оол чох полған, неке.
- Мин хаҷанох мындағ алғым мероприятиеде аралазарға сағынғам, улуғ сценада тур кӧрерге хынғам, - тіпче Николай. - Амды сағызым толды. Мин позыма чӧпсінчем.
Аның чооғынаң, марыға тимненіс уғаа хатығ партыр. Ікі неделя араласчылар иртеннең иирге теере хайыныста полғаннар. Че аның тузазы улуғ. Оол-хыстар кӧп нимее ӱгреніп алғаннар паза сын арғыстар пол парғаннар.
- Финалға тимненген тусха піс пір сӧбіре пол парғабыс. Прайзы уғаа ынағлазып алғабыс. Аинаңар кемні-де артых тиирге тідінмеспін. Мин утып аларға тың хынчам, че, пасхазының чайаачы оңдайларын піліп, олар даа чиңісхе турыстығлар сағынчам, - тіпче Юлия Кончакова.
Марығ тоозылып, тус читкен иң чӱрексіністіг чардыхха - салтарлар идеріне. Ӧӧн чиңісчілерні адир алнында араласчыларға номинациялар хоостыра сыйыхтар читірілген. Іди кӧрігҷілернің кӧңніне кіргеннернің аттарын Хазна Думазының депутады Надежда Максимова адаан. Мында Екатерина Асомчикнең Максим Кузнецовха он полған. Оларға сыйых читіріп, Надежда Максимова таныхтаан:
- Пу марығның араласчылары паза тӧстегҷілері піске уғаа сіліг ӱлӱкӱн иртірділер. Пу сіліглернің, чииттернің ӱлӱкӱні. Чиит тус - ол андағ тус, хаҷан кізі посты, узын, талантын кӧзітче, пӧзіх чидіглерге кӱстенче. Піс оларның прай ол оңдайлары парын кӧрдібіс. Піс прай араласчыларны алғыстапчабыс.
Таныхтирға кирек, иир сыйыхтарға пай полған. Полған на араласчы хайдағ-да номинацияда таныхтатхан, піреезі, тізең, ікі дее сыйых алған. Іди Николай Котюшев «Талант» номинацияда чиңіс тутхан паза ӱзінҷі орынға турысхан.
Сыйыхтар ӱлестіріл парған, чиңісчілернің не аттарын піліп аларға халған. Прайзы холларына толдыра сыйыхтығ турча. Павел Булдаковха ла пір дее ниме читірілбиндір. «Хайдар жюри кӧрген?»
- сыбыхтасчалар халғанҷы рядтарда. Че Олимп резерві училищезінің студентін айирға ирте. Сценазар Хакасия пазы Виктор Зимин сыхча паза Павел «Мистер студенчество» пол парған тіп искірче. Зал кӱӱлепче. «Мисс студенчество» атха техническай институттың студенті Екатерина Асомчик турысхан. Регион пазы чиңісчілерге алтын хол частарын сыйлаан.
- Мин сірерні прайзын алғысгапчам, - айланған марығ араласчыларынзар Виктор Михайлович. - Чиңісчілер ле нимес, ідӧк финалға сығып алғаннар прайзы улуғ чидіге читкен. Сірер артых ползаңар, пістің Хакасиябыс, улуғ Россиябыс артых полар.
Амды Павелнең Екатерина «Мисс паза Мистер студенчество России» хазна мариинда аралазарлар. Ол чайғызын Севастопольда иртер.
Кӧрігҷілернің кӧбізі сизінген, пӱӱл пу марығ уғаа пӧзік синде ирткен. Аны Хакасиядағы «Россияның чииттер чӧбі» организация иртірген. Марығны тӧстирінде Хакасия правительствозы паза региондағы чииттер киректерінҷе хазна комитеді араласханнар.
Минің дее кӧңніме пу иир кірген, че мағаа аның араласчыларының аразында хакас хыстары чидіспеен. Хомзынысха, пістің чоныбыстың алнын Николай Котюшев ле алған. Итсе-де, пу марығнаң пір туста республикада «Мисс Абахай» марығ чарлалған, пістің хыстарыбыс ол марығзар тартыл парыбысхан поларлар. Ізенербіс, соңа чылда кирек чахсы саринзар алызар.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы