АҢ-ХУСТАРНЫ ХАЙРАЛЛААЛАР
23.03.2018
Хабарлар
Кізі паза чир-чайаан. Кізі чӱреен ағыртчатхан сурығдаңар пас пирерге чараттым.
Амғы туста кӧп кізі, телефоннаң паза компьютернең тузаланып, Интернетте «одырча». Мин ідӧк «Одноклассники» социальнай сетьнең тузаланчам.
Ӱр ниместе пархамнаң телефонҷа чоохтасханда, ол піске чахаан:
- Улабама чоохта, парчых уйазын ит салзын.
Пархам аң-хустарға уғаа паарсапча.
- Халғанҷы ікі-ӱс чыл пір парчых таа кӧрінмеді. Часхыда сарнапчатханын хаҷанох испедім, - искірчем ағаа.
Аның соонаң, ікі-ӱс кӱн пазынаң, ол мағаа Интернетче ыраххы Ватиканда суурылған сомны ысча.
- Мында прай парчыхтар чыыл парғаннар, - тіпче пархам.
Сынап таа, сомда тигірде учухчатхан хустар хара пулуттар чіли харалчалар. Ӱр ниместе Интернетте кӧргем: парчыхтарға тӧӧй хустар, суғ ӱстӱнҷе улуғ ӧӧрнең учуғып, кинетін не ӧлімге суға кире учуғыбысханнар. Андағ нимені кӧріп, чӱреем ачыпча. Халғанҷы чылларда мындағ киректерні удаа кӧрерге, истерге килісче. Ноға аң-хустар іди полчалар? Хайдағ чобағ оларға урунча? Кізі аны піл полбинча. Піс, кізілер, постаңар ла сағынчабыс, че піснең хости чуртапчатхан аң-хустар, ӧзімнер хайди полчатханын сизінминчебіс, пірееде пілерге дее хараспинчабыс.
Тӧреен чирібістің ибіркізіндегі прай тіріг нимені хайраллабазабыс, тӱрчедең чир-чайаанның ис-пайы, ісчең арығ суғ даа халбас.
Аллығ чӱректіг хакастар постың тілін, кибірлерін, айландырып, паалап, чиит улусха читірчеткеніне ӧрінчем. Газетада, радиода паза телевизорда чирібісті хайраллир оңдайларны, чарыдып, удаа ӱзӱр турарға кирек тіп сағынчам. Пу чир ӱстӱнде чуртагҷыларның кӧбізі - чахсы кізілер, аннаңар минің сӧстерім тикке парбас тіп сағынчам.
Піс хысхызын пораатайларны, кӧгізектерні иртен-иир хузухнаң паза чарбанаң, киҷегейлерні, тізең, мӱндӱргеснең азырапчабыс. Кӧмес тее азырап турза, олар оой хыстап парыбысчалар. Олар иртен-иир, кӧзенексер харахсынып, азырал тоолат пирерін сағыпчалар.
Автор :
Зинаида ТОЛМАЧЁВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде