ХАЗЫХ ЧУРТАС АПАРАРҒА
10.04.2018
Хабарлар
Акция. 7 апрельде тилекейде Хазых кӱні таныхталча. Аны, чонны сағыссыратчатхан темаларға чарыдып, полған на сай иртірчелер. Пӱӱл Хазых кӱні кізілерні хазых чуртас апарарға кӧӧктіреріне чарыдылған.
Ағбанда Хазых кӱні Пушкин орамазының 36 номер туразында орныхчатхан «Кристалл» полызығлығ фонд алнында таныхталған.
Ікі площадкада акциялар иртірілген. Пастағызы «Хазииң сыныхтабыс» адалған, ол «Кристалл» фондтың фойезінде ирткен. Андох ярмарка тоғынған. Хазыхтарын сыныхтанарға килген кізілер пос холынаң иділген ниме-нооларны паза Хызыл нымырхаа тимнелген халастар садызып алчатханнар. Имҷі кізілернің, сынын, кӧдірімін синеп, хан кӧдірілізін сыныхтаан. Ідӧк чӱрек-тамыр, онкология, сахар диабеді ағырығларның сылтағларынаңар искірген паза оларнаң ағырыбыспас ӱчӱн чӧптер пирген.
Республикадағы имнег-профилактика кінінің имҷі-методизі Алла Валерьевна Домановаа Н.Ф.Катановтың адынаң Хакас хазна университедінің «имнег кирее» пӧлиинде ӱгренчеткен студенттер Кристина Корень паза Кристина Коновалова кізілернің хазиин сыныхтирға полысханнар.
- Пӱӱл Тилекейдегі хазых кӱні пістің хазнада «Хазых пол!» хыйғылығ иртче.
Піс аны «Кристалл» полызығлығ фонднаң хада иртірчебіс. Пістің имнег-профилактика кіні мындағ акцияда ӱзінҷі чылы араласча. «Хазииң сыныхтабыс» площадкада сыныхтағ ирткен соонаң кізілерге хазыхтарын тыыдарынҷа алай хазыхха хорғыс полза, хайдағ специалисттерзер айланарға киректелчеткенін чоохтап пирчебіс. Хакас хазна университедінің студенттері акцияда пос кӧңнінең араласчалар. Олар удаа пістің полысчыларыбыс полчалар. Олар ӧткіннер паза оларның полызии чох піске сидік поларҷых, неке, - сағыстарынаң ӱлескен Алла Доманова.
Ікінҷі площадканың тоғызынаңар «Кристалл» полызығлығ фондтың чоннаң палғалыс тутчатхан специализі Татьяна Сейтанова чоохтап пирген:
- Пістің площадка тасхар тоғыс апарча. Араласчыларның кӧбізі - пістің А.В.ДОМАНОВА студенттернең хада хан кӧдірілізін сыныхтапча фондтың хайииндағы кізілер. Оларға «Кристалл» полызығлығ фонд» пазылған футболкалар читіргебіс. Ідӧк полған на кізі, флешмобта паза Хазых кӱнге чарыдылған марығларда аралазып, сыйыхтар алған. Марығларда араласхан кізілерге сыйыхтар читірерге ахчалығ полызығны спонсорлар иткеннер. Площадканың ӧӧн пӧгіні - кізілернің кӧңнін кӧдірері.
Аал хонии колледжінің студенттері марығлар иртірерге полысханнар. «Кристалл» полызығлығ фондсар чӧрчеткен Марина Чернышова мероприятиенің араласчызы полча. Ол позының сағыстарынаң паза кӧңнінең ӱлескен:
- Мині паза ӧӧрелерімні «Кристалл» фондтың тоғынҷылары Тилекейдегі хазых кӱнін таныхтирға хығырғаннар. Аны хайди иртірчеткеннері кӧңніме кірче. Мин сынымны, кӧдіриимні піліп алғам паза хандағы сахарның синін, хан кӧдірілізін сыныхтабысхам. Сыныхтағларның салтарлары хазиим синінде тіп кӧзітче. Анзы, минің кӧрізімнең, кӱннің иртен скандинавскай чӧріснең айғасчатханынаң палғалыстығ полар.
Мындағ мероприятиелер тузалығлар, иң пастап хазыхты сыныхтир оңдай пар. Тасхархы ойыннар, хыймыраныстар хазыхты тыытчалар паза кізее кӱс хосчалар, кізінің кӧңнін кӧдірчелер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы