ТЫХТАҒ ТОҒЫСТАРЫ ХЫЫЗЫНДА ПАРЧА
13.04.2018
Хабарлар
Кӱн сурии. Хакасия пазының орынҷызы Андрей Новосёлов Ағбан пилтірі аймаандағы Расцвет посёлоктың орамаларындағы чолларны тыхтир тоғыс хайди парчатханын сыныхтирға чӧрген.
АFБАН ПИЛТІРІ АЙМААНДАҒЫ ЧАПАЕВ ПАЗА РАСЦВЕТ ААЛ ЧӦПТЕРІНЕ КІРЧЕТКЕН ПОСЁЛОКТАРНЫҢ ЧУРТАҒҶЫЛАРЫ АНДАҒЫ ЧОЛЛАРНЫ ИПТИРДЕҢЕР ХАКАСИЯ ПАЗЫНЗАР АЙЛАНҒАН СООНДА ВИКТОР ЗИМИН ОЛ ААЛЛАРНЫҢ ОРАМАЛАРЫНДАҒЫ ЧОЛЛАРНЫ ТАБЫРАХ ТЫХТАБЫЗАРҒА ЧАХЫҒ ПИРГЕН. АННАҢ СЫҒАРА ПОСЁЛОКТАРЗАР ТЕХНИКА КІРГЕН, АМДЫ ХАЙ ПІРЕЕ ОРАМАЛАРДА ТЫХТАҒ ТОҒЫЗЫН ТООС ПАРИРЛАР.
РАСЦВЕТ ПОСЁЛОКТЫҢ 8 МАРТ ОРАМАЗЫНДАҒЫ ЧАЛБАХ ЧОЛҒА САЙ КӦП УРЫЛТЫР, ГРЕЙДЕР ПАЗА КАТОК АНЫ ИПТЕП САЛТЫРЛАР, АМДЫ ТРАНСПОРТХА ЧОЛҶА ЧӦРЕРГЕ ИСТІГ ПОЛАР. АННАҢ ХОСТИ ЮБИЛЕЙНАЙ ОРАМАДА ТЫХТАҒ ТОҒЫСТАРЫ ХЫЫЗЫНДА ПАРЧА. ТЕХНИКА ТОЛДЫРА, АВТОГРЕЙДЕР, БУЛЬДОЗЕР, САМОСВАЛЛАР ХАЙЫНЫСЧАЛАР. АНДА САСТЫҒ УЧАСТОК ОСХАС, ЧОЛЗАР УРЫЛҒАН САЙ, МАШИНА ПАРЧАТСА, ЧИРЗЕР КИРЕ ПАЗЫЛЧА. АНДАҒ ОРЫННАРЗАР САМОСВАЛЛАР САЙНЫ ӰЗІГІ ЧОХ УРЧАЛАР.
Хакасияның транспорт паза чол хонии министрі Олег Тропин чолда хазылған орында сай нинҷе халын урылғанын рулетканаң синеп чӧрче. Андрей Новосёлов Юбилейнай орамазар килгенде, аны Олег Тропин, Ағбан пилтірі аймааның пазы Елена Егорова, Расцвет аал чӧбінің пазы Анна Мадисон паза подряд организациязының кізізі удурлааннар.
Хайди Андрей Новосёлов таныхтаан, Хакасия пазының чахиинҷа пу тыхтағ тоғыстарын толдырарға республика бюджедінең 70 миллион салковай позыдылча. Неделя тоозылғанҷа тоғыстарны тоос саларға кирек. Подрядчик чахсы тоғынча. Ағбан пилтіріндегі чолларны тыхтирына хоза 40 миллион салковай пирілер. Пасха ааллардағы чолларны ідӧк тыхтирға киректелче, майда тоғыстар узарадылар, ахча хоза позыдылар. Прай тоғыстарға 100-че миллион салковай кирек полар.
Амды толдырылчатхан тоғыстарның качествозы сыныхталча. Састығ орыннардағы чир пастап 60 сантиметрге теере хыйа алылча, анаң андар хайалығ сай урылча, аны техника типсебіссе, унах тас урылча. «Оӧні - чуртағҷыларға транспортнаң чӧрерге истіг ползын, оларзар табырах имнег полызии тудығ чох чидіп алчатсын, кізілернің кӧңнін кӧдірерге мыннаң мындар тоғынарбыс», - теен Андрей Новосёлов.
Ідӧк Юбилейнай орамадағы тоғыстарнаң устапчатхан, подряд организациязы полчатхан «Авик» ООО-ның прорабы Бесик Вепхвадзенең чоох алысхабыс. Хайди ол искірген, орамадағы чол састығ участокча иртче. Аннаңар аар кӧдірімніг машина парыбысса, андағ орындағы чир тирең кире пазыл парыбысча. Андағ ниме полдыртпас пӧгіннең састығ чир чарымҷа метрге тирен хыйа алылча, анаң андар хайалығ сай урылча, аны бульдозер паза каток чахсы типсебіссе, унах тастығ сай урылча, каток аны пазох иптепче. Унах тастың халыны 20-хе сантиметр поларға кирек. Расцвет посёлокта тоғыстар тоозылза, техника Тепличнай, Зелёнай посёлоктарда тоғысты узарадар.
Самосваллар орамадағы чолзар хайалығ сайны ағылҷаан на ағылчалар. Бульдозер урылған сайны чайча. Автогрейдернің водительі Иван Тайдынов аны ипти чол хыринзар кӱрепче. Тоғысчы Дмитрий Герасимов ағаа хайдар кӱрирге кирек полчатханын кӧзіт чӧрче. Пір сӧснең, тоғыс хайнапча, хыызында парча. Че республикада тыхтағ кирексіпчеткен чоллар ам даа илееде полар. Аннаңар Хакасиядағы чолларны тыхтирына паза пӱдіреріне пӱӱл 380 миллион салковай пирілер.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы