АБАХАЙЛАРНЫҢ АБАХАЙЫ ТАБЫЛДЫ
25.04.2018
Хабарлар
Мисс Абахай-2018. 22 апрельде С.П.Кадышевтің адынаң культура кінінде хакас чонның иң абахай хыстарының марии иртті
ПОЗЫРАХ КӰН 17.00 ЧАСХА С.П.КАДЫШЕВТЩ АДЫНАҢ КУЛЬТУРА КІНІНЗЕР ЧОН ЧЫЫЛЫСХАН. ПРАЙЗЫ ИҢ АБАХАЙЛАРНЫ КӦРІП АЛАРҒА, ОЛАРНЫҢ ХЫЙҒА, ЧАЙААЧЫ САРИЛАРЫН ПІЛІП АЛАРҒА САҒЫНҒАН. КЕМ-ДЕ, ПОЗЫНЫҢ «АБАХАЙЫН» ПІЛІП, АҒАА КӰС ХОЗАРҒА ПАРҒАН. УЛУҒ ЗАЛНЫҢ ӦӦН ЧАРДЫҒЫ «АҒЫРЧАТХАННАР» ПОЛҒАНЫ ІЛЕ КӦРІНГЕН. УЛАМОХ ЧӰРЕКСЕЕННЕР АРАЛАСЧЫЛАРНЫҢ ИҢ ЧАҒЫННАРЫ - ІҶЕ-ПАБАЛАРЫ. КӦРІГҶІЛЕР, ОРЫННАРЫНЗАР ИРТІП, ОДЫРҒЛАП САЛДЫЛАР. ЗАЛДА ЧАРЫТХЫ ӰЗІРІЛДІ. ПРАЙЗЫНЫҢ ХАРАХТАРЫ СЦЕНАДА...
ИИРНІ «АХ ХАЗЫҢ» ТЕЕЛБЕКНЕҢ ПАСТААННАР «КӰН СУЗЫ» ӦМЕНІҢ АРАЛАСЧЫЛАРЫ. ОЛАРНЫҢ СООНҶА СЦЕНАЗАР ИРТКЕННЕР АМҒЫ ТУСХА КИЛІСТІРЕ ЧАЗАНҒАН ХАКАС КИП-АЗАХТЫҒ МАРЫҒ АРАЛАСЧЫЛАРЫ.
12 хыс, пірсі пірсінең абахай, пеер айланзалар - кӱн осхастар, аар айланзалар - ай осхастар. Иирні апарған Таптан Mолатнаң (Игорь Шалгинов) Чолпан Сайын (Вероника Албычакова) полған на араласчынаң таныстырғаннар: 1№ - Анастасия Инкижекова, 18 частығ, хырғыс сӧӧгінең; 2№ -Кристина Конусова, 20 частығ, читі пӱӱр сӧӧгінең; 3№ - Ангелина Боргоякова, 19 частығ, хобый сӧӧгінең; 4№ - Анастасия Идимешева, 18 частығ, сибіҷіннер сӧӧгінең; 5№ - Валерия Торбостаева, 16 частығ, кииҷін сӧӧгінең; 6№ - Аделина Тохтобина, 18 частығ, чилей сӧӧгінең; 7№ - Екатерина Макина, 21 частығ, ах хасха сӧӧгінең; 8№ - Алина Канзычакова,16 частығ, хобый сӧӧгінең; 9№ - Ирина Селегеева,17 частығ, тайғудуғ сӧӧгінең; 10№ -Татьяна Урыбина, 18 частығ, тағ харғазы сӧӧгінең; 11№ - Ангелина Куркучекова, 18 частығ, туран сӧӧгінең; 12№ - Диана Тинникова, 19 частығ, сайын сӧӧгінең.
Араласчыларның аттарын адаан сай хыстар подиумзар сыхханнар. Оларның чазанғаннарын пастарынаң азахтарына теере кӧрглеп, пастағы паалағ турғысхлап пастааннар чарғыҷылар ла нимес, тиксі зал. Хыстар уғаа пай чазан салтырлар. Кӧгенектері, сигедектері, сикпеннері паза пӧріктері наа оңдайнаң чайалтыр. олар чібектең, чылаңмастардаң, таналардаң, нинҷілердең пасха жемчугтарнаң хоосталтыр. Хай пірее хыстарның пӧріктеріне хаптырылған арған сӱрместер оларның тиксі кӧрімін тӱзірген. Сағынчам, кӧрігҷілер сын сілігні кӧрерге килген полбастар ба? Итсе, хыстарның постарының састары чайаанына даа читчеткен. Хысха састығлар чох полған.
Мына чарғыҷыларнаң таныстырчалар: модель агентствозының ӧӧн директоры Олеся Потапова, поэт Сибдей Том, Хакасияның чииттер киректерінҷе хазна комитедінің кнезі Татьяна Борисова, Хакас филармонияның хореографы Наталья Апуневич паза С.П.Кадышевтің адынан культура кінінің режиссёры Антонина Тутатчикова. Абахайларның тудынғанын, хакас чон кибірлерін, оңдайларын паза чайаачызын пілчеткен улусты чыып алтырлар марығны иртірчеткеннер.
Хыстар, тізең, постарынаң чағын таныстырып пастааннар. олаңай ла нимес: мин мында тӧреем, андағда кізілернің палазы полчам. чайаачы оңдайнаң тоң хакас тілінең! Ағаа хоза хыстарға пос тимнеен хакас ас-тамаан ағыларға киректелген. Андох араласчыларның чахсы паза читпес сарилары сығыс килген. Иң пастағызын, хулахха изі чох истерге пос тілінең топыр чоохтасчатханнарын, андағлар пір-ікі ле полбаан, аннаңар тӧреен тіллерін чахсы пілчеткен хыстар кізі хараа алнында пілдірте кӧдіріле халғаннар. Ікінҷізін, пос ас-тамаан аарлапчатханы кӧрінген. Кем-де хой идін пызыр килзе, читкіҷе полар тіп санаан осхас, кем-де иң саблығ чиизібісті, потхыны, тимнеп килтір. че оларның аразында орамас (Ангелина Боргоякова), пызылах (Диана Тинникова), харты (Татьяна Урыбина), сатырма (Валерия Торбостаева) ит килген хыстарны махтирға кирек. Хыстар тӧреен чир-суунаңар, сӧӧктерінеңер тахпах, кибеліс, алыптығ нымах оңдайынаң чоохтааннар.
Анаң чиит хыстар чайаачы кӧңнілерін кӧзіткеннер. че ноға-да пірдеезі дее хайхат полбаан тиирге кирек. Хыстарның чайаачы номерлерін ӱс кӧрімге чарыбызарға чарир: теелбек, сарын паза кибеліс. Теелбек салчатхан кізілер салылған кӧгнің кӧңнін читір пирерге кирек полғаннар, уламох хаҷан кӧӧленіс читірілче. Кӧрігҷілерні теелбекте Екатерина Макина ла аптаан полар. че теелбек аның тоғызының чардығы нооза. Кибелісті таллап алған хыстарның піреезі улуғ алҷаас иткен. Тіл пілбин, ноо посты уйатха кирҷең?! Валерия Торбостаева, тізең, Геннадий Кичеевтің «Тӧреен тілімнеңер» кибелізін чоохтирға чахсы тимнен салтыр. Ағаа Н.Ф.Катановтын адынаң Хакас хазна университедінде хакас тілі ӱгретчізіне ӱгренчеткен студенттер полысханнар. ибіре орыстасчатхан чиит оол-хыстар аразында чалғыс оол ла телефонҷа іҷезінең хакастасчатхан... Валерия, сӧстерін ӧтіг чоохтап, авторның кӧңні-сағызын кӧрігҷілернің чӱреене теерте читірген.
Ӱзінҷі номинацияда хыстар спорт кӧрімнерінең сынасханнар. мында оларның тастындағы кӧрімнері ле паалалбаан, ідӧк пос, азых тудынчатханнары, кӱлінчеткеннері дее паалалған. Халғанҷы номинацияда хыстар иирде кисчең чазанҷыхтығ сыхханнар. Прайзы узун, сіліг, аймах ӧңніг паза хакас хоостарынаң чазалған кӧгенектер кис килтір. Валерия Торбостаева хызыл пызыңнастарнаң кӧгенек кизібістір, ӱстӱне тӱлгӱ теерізін артыныбыстыр. Екатерина Макина порчо ӧңніг кӧгенек кис салтыр, пилінде чібекнең чазалған хоос салылтыр. Грек стильліг ах кӧгенек кистір Татьяна Урыбина. Кӱмӱснең пызыңнапчатхан азых пилліг кӧгенектіг полған Ангелина Куркучекова. мында хыстарға ниик тыныбызарға, андағох ниик чӧріснең подиумҷа ирт парыбызарға кирек полған, че хыстарның прайзы ла пос тудынмаан. Піреезінің чӱрексеені уламох хозыл парғанға тӧӧй пілдірген.
Сағирға кӧп халбаан. Чарғыҷылар паалағларын санирға парыбысханнар. Кӧрігҷілер, тізең, тынағ тузында постарының сағыстарынаң ӱлес турғаннар. Чиит идінҷек Рустам Боргояковтың марығда хыстар сӧӧктерін, кемнең сыхханнарын пілчеткені кӧңніне кіртір. «Уғаа чахсы марығда пос тілін паза сӧӧгін пілчеткені санға алылчатханы. Хакас хыстар тастынаң на абахай полбасха киректер, олар пос чонының аарластарын пілерге кирек. Амғы чииттернің орыс оңдайлығ ӧсчеткені іле кӧрінче. Хакас ас-тамаан тимнирі кирілгеніне ідӧк чӧпсінгем», - тіпче Рустам.
Пір ӧмеде чыылыс партыр Канзычаковтар тӧлі. Олар Алина Канзычакованың ӱчӱн «ағырчалар». Алинаның пабазы Василий Дмитриевич «Мисс Абахай» марығның кирексінізін таныхтапча: «марығ Хакасияны, чонны кӧдірерге паза пос тілін пілерге кӱстепче. Алина, тізең, «Час ханат» ансамбль араласчызы, чоннар аразындағы, тиксі Россиядағы фестиваль-марығлар лауреады полча. Ол тӧреміл хайдағ-да марыға тимненче».
...Мына пазох сценаа абахайлар тол парды. Хыстарға соон сӱрістіре Хакасия правительствозының алғыстазы, марығ араласчыларының дипломнары, сілігленҷең полызығларға сертификаттар читірділер. Пу туста хыстарның иң улуғ сағыссыразы: кем не пістің арабыста иң абахай? Кӧрігҷілернің сыйии паза Пілӧ кӧлдегі турбазазар путёвка Кристина Конусоваа читірілді, «Мисс Этно-стиль» Диана Тинникова полыбысты, ағаа Юлия Чаркова кӱмӱс ілҷірбе-ызырға сыйлаан.
Халды ӧӧн сыйыхтар, хайзыларын адирға чеес пирілген Хакасия пазы Виктор Зиминге. Ол хыстарға марығда араласханнары ӱчӱн алғыс сӧстерін читірген паза сыйыхтар прайзына пирілбинчеткені ӱчӱн пыросынған. Пастағы конвертті Виктор Михайлович ӱр асхан. Зал сымзырыхта сағыпча... II вице-мисс Абахай полыбысты Анастасия Инкижекова! Наа конверт I вице-мисс Абахай - Екатерина Макина! Ағаа республика пазы алтын час паза спонсорлардаң 5 муң салковайға сертификат читірген. Ӧӧн конверт - араласчыларның халғанҷы ізенізі. «Валерия Торбостаева!» - хығырча Виктор Михайлович. Хыстың сырайында ӱрӱгіс, ӧрініс. Лента кизіртіп, чахайахтар читір пирділер. Хакасия пазының алтын чазы паза 15 муң салковайға сертификат читірілген. 2017 чылның «Мисс Абахайы» Вероника Албычакова марығның ӧӧн таниин - диадеманы - чиңісчее кизірткен. Ідӧк Валерия Торбостаева Хакасия адынаң регионнар аразындағы пастағы «Мисс Абахай россия» марығда аралазар.
- Мин халғанҷызына теере иң абахай ӱс хыс аразына кіреріне ізенізім чідірбеем, - ӱлескен Валерия.
Наағынҷа, тізең, харах чазы, часка харах чазы, тоғылахтан парир. - Улуғ алғызым читірчем іҷеме. Ол полбаан полза, пу сценаа мин сыхпасчыхпын.
Валерия Асхыс станциязындағы школада 10-ҷы класста ӱгренче. Іҷезі Екатерина Николаевна марығда аралазарға кӧңнін кӧдірген. Школада кӱстеніп паза чахсы ӱгренчеткен хысха ӱгретчілер дее удур парғаннар. Танығлығ атха турызар ӱчӱн, Валерия пір ай чарым Ағбанзар кӱннің репетицияа чӧрген. Хызы чиңіс тутханына іҷезі киртінминчеткен.
Сибдей Том, хакас тіліне улуғ хайығ салчатхан кізі, марығ араласчыларын аны пілчеткені хоостыра хатығ паалаан. Тіл пілбинчеткеннері паалағларынаң пілдірте соона халғаннар. Аның кӧрізінең, «Мисс Абахай» марығда Хакасияның иң абахай хызы табылбинча, мында хакас чонның ин артых хызы табылча. Ол ӧкер омазынаң на аптабасха кирек, ідӧк кӧңні-чанынаң, хакас оңдайынаң! «Марығ хакас чонына уғаа кирек, аны чииттер пос кӱзінең апарчатханнарын махтапчам», - тіпче поэт.
Марығны «Асхыр» хакас чииттернің чӧрімі иртірче. Пӱӱнгі кӱнде марығны иртірерінең устапча Тимур Тюкпеев.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы