ТАТХЫННЫҒ ЧИИС ХАҶАН ДАА ХАЙЫҒ ТАРТАР
25.04.2018
Хабарлар
Туризм. Италиядаң килген аалҷылар Хакасияда татхыннығ сыр тимнееннер, таңдағызына сағыстарынаң ӱлескеннер.
Пу кӱннерде пістің республикада Италиядағы сыр тимнепчеткен устар Джанлука Креспинең Алессандро Брески аалладылар. Олар Сардиния олтырыхтаңнар. Ікізі дее сыр киреене тӱгеде пирін салған кізілер. Джанлука Креспинің таниинаң, сӱт ас-тамаан тимнирінде кӧп піліс паза опыт киректелче, андада ла кізілерні татхыннығ чииснең ӧріндірерге чарир. Позы ол пу кирекнең 28 чыл айғасчаттыр.
Хакасиязар итальянецтер пастағызын на килділер. Сардинияның чуртағҷылары мында сыр тимнеҷең производство азар оңдай пар ба тіп кӧрчелер. Сыр ӧӧнінде сӱттең тимнелче. Орындағы сӱттің оңдайын сыныхтир, олох туста постарының узын кӧзідер пӧгіннең идінҷектер, пеер килгендӧк, сыр тимнебіскеннер. Оларның таниинаң, Хакасияда хомай нимес сӱт сығарылча, чон, тізең, хайдар ачых-чарых. Сизінгенде, пістің чуртағҷыларны махтап, рекламаны Ағбандағы «Мама Рома» ресторанның шеф-повары Джанлука Ферула иткен. Ол анда илееде тус істенче, чиисті тӧреен чиріндегі рецепттер хоостыра тимнепче. Сардиниядағы идінҷектерні Хакасиязар олох хығырған полар.
Аалҷылар хабарҷыларға алынҷа тоғазығда сырлар хайдағ полчатханын, удур-тӧдір нименең пасхалалчатханын чарыда чоохтап пиргеннер. Ідӧк олар, кирек киліссе, ас-тамах туризмінең айғазар сағыснан ӱлескеннер. Таныхтирға кирек, тилекейде туризмнің пу кӧрімі чахсы тиліпче. Олох Сардиниязар чорыхчыларның илеедезі сырларны, анда ла ӧсчеткен фрукттарны, ӱӱҷік тамаан, пурунғыдаң хайраллалған рецепттер хоостыра тимнелген халасты садызып аларға чӧрчелер. Испанияда туристтернің хайиин оливка хайағы, хызыл араға оралары тартчалар. Фестивальларны алынҷа таныхтирға кирек. Оларның иң саблығ Германияда иртчеткен Октоберфест полча. Туристтер пеер саблығ пивоны ізерге паза сосха идінең тимнелген колбасаны чіп аларға чыылысчалар.
Хакасияда ас-тамах туризмінең тигір алтындағы азых музейлер айғазарға кӱстенчелер. Анда аалҷыларға талғанны, нымырттаң тимнелген ныхчахтарны садызып аларға оңдай пар. Ідӧк музейлер хакас чонның кибірліг ас-тамаана чарыдылған аймах пайрамнар иртірчелер. «Хуртуйах тас» музейнің тоғынҷылары Айран сузы ӱлӱкӱнні кибірге кир парирлар. Пайрамға олар улуғ программа тимнепчелер, чыылған чонны хакастарның чозахтарынаң таныстырчалар. «Казановка» музейде август сай Талған тойы пайрам иртче. Ол мастер-класстарнан танығлығ. Кізілер ол ӱлӱкӱннеңер пілчелер, ағаа азынада тимненчелер. Талған тойында чахсы тынанып аларға, татхыннығ чиисті чіп аларға, саблығ Ах тастың хыринда турып, имненіп аларға оңдай пар.
Италиядағы аалҷыларзар айланза, олар пеер килгенінде чапсыҷаң ниме чоғыл. Хакасия хырығ озариндағы чуртағҷыларнын хайиин хаҷаннаң тартча. Орындағы чон даа европадағыларға чылығ хайча. Сынап Джанлука Креспинең Алессандро Брескинін сыр тимнеҷең производство азар кӱстері читсе, оларның татхыннығ чиизін кізілер хынып садызарлар. Пістің идінҷектерге, тізең, ас-тамах туризміне хайығ айландырарға кирек. Мында чахсы парыс аларға чарир.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы