ЧОННАР АРАЗЫҢДАҒЫ ПАЛҒАЛЫСТЫ ТЫЫТЧАЛАР
08.05.2018
Хабарлар
Пістің ӱгренчiлерібіс Россияның почтазы полызиинаң Япониязар улуғ хоосты ызыбысханнар.
Пу кӱннерде Россия почтазының филиалында чапсых мероприятие ирткен. Ағбанның 19 № школазының олғаннары Япониязар улуғ хоосты ызыбысханнар. Аны пасталығ класстарның ӱгренҷілері «Іарап Art Mile» чоннар аразындағы проект хоостыра чайааннар. Ол проект Японияда тӧстелген. Ӧӧн пӧгін - чоннар аразындағы палғалысты тыыдары. Пӱӱнгі кӱнде анда 100 хазнаның ӱгренҷілері араласча.
Пістің олғаннар «Іарап Art Міlе» проектте пылтырғыдаң сығара араласчалар. Аннаң Ағбанда англия тілі ӱгретчізі Дина Аверьянова устапча. Дина Владимировнаның таниинаң, проект оңдайлары хоостыра япон паза орындағы ӱгренҷілер пір баннерні чайап саларға киректер. Пастап баннернің чардығын іскеркі хазнаның кічіг чуртағҷылары хоостапчалар. Ікінҷі чардығын пістің олғаннар чайапчалар. Япониядағы араласчылар чыл сай алысчаттырлар. 2017 чылда ағбандағылар Утинада поселоктың олғаннарынаң хада хоостааннар, пӱӱл, тізең, проектте Ако городтағы пасталығ школаның ӱгренҷілері араласчалар.
Хоостаңар чоохтаза, аның ӧӧн сағызын араласчылар видеоконференциялар тузында ӱзӱрчелер, чоохтазығ англия тілінең парча. Ирткен чылда ӱгренҷілер орыс культураны кӧзіт пирерге кӱстенген ползалар, пӱӱлгі хоос хакас чоннын кибір-чозахтарына чарыдылған.
Мында Сойан тағларын, Шира кӧлні, кӧзеелерні кӧрерге чарир. Ідӧк олғаннар чатханнаң ойнапчатхан музыкантты, кип-чоохтағы матыр Сибіҷекті хоостап салтырлар. Японецтер сумо кӱресчілерін, самурайларны, каратисттерні, гейшаны чайап салғаннар. Баннернің ікі чардығын ағас піріктірче: пір саринаң ол порчоларын тӱзірчеткен сакура, ікінҷізі - хазың.
Дина Аверьянованың чооғынаң, «Japan Art Mile» проект хоостыра ол ӱгренчілерін пасха чонның культуразынаң таныстырарға пӧгінген. Че сынында ағаа палаларнаң ӧӧнінде хакастарның кибірлерін, чуртас оңдайларын істезерге киліскен. Мында оларға Л.Р.Кызласовтың адынаң чир-суғ ӱгренчең музейнің тоғынҷылары чахсы хабас пиргеннер. Дина Владимировна таныхтаан: «Пу проект піске Хакасияны чахсы піліп аларға оңдай пирген».
Чоохтирға кирек, чоннар аразындағы проектте аралазып, чир-суғҷыларыбыс пір дее ахча хоратпааннар. Баннерні, акрил сырларны японецтер ыс пиргеннер. Посылканы хырығ озаринзар ызарын Россия почтазы позына алған. Россия почтазының хакас пӧлиинің директоры Дарья Цилина чоохтаан: «Пістің учреждениенің ӧӧн тоғызы чоннарны, хазналарны піріктірері, аннаңар піс «Japan Art Mile» чоннар аразындағы проектте араласчабыс. Олғаннарның хоозы EMS почтанаң ызылар, Японияда ол ікі неделя
пазынаң полар». Ако городтағы нанҷыларына пістің палалар ідӧк сувенирлер, улуғ нимес сыйыхтар ызыбызарға чаратханнар.
Проекттің тӧстегҷілері прай хоостарны хайраллапчалар. 2016 чылда олар, баннерлерні чыып, Парижте ЮНЕСКО-ның штаб-квартиразында кӧзідіг иртіргеннер, пылтыр, тізең, Японияча ал чӧргеннер. Ам чайалған хоос ідӧк кӧзідіге сығарылар. Пу проектте пасха даа школаларға аралазарға чарир, сурыныс пічіктерін майда ызарға кирек.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы