ІКІ ТУС АРАЗЫНДА
22.05.2018
Хабарлар
Пу наада В.Г.Чаптыковтың адынаң Хакас филармониязында хайхастығ концерт полды. Чыылған чонны чайаачызынаң «Иренек Хан» рок ӧме ӧріндірген. Пайрамнығ концертті музыканттар «Ікі тус аразында» адап салғаннар. Ол ӧменің 10 чылына чарыдылған.
«Иренек Ханның» репертуары улуғ. Чайаачы устар хакас, алтай, орыс ырларын толдырчалар. Пайрамнығ концертке олар иң артых сарыннарны таллап алғаннар. «Тананой», «Сарын сарназа», «Хоора палых», «Хара суғ», «Айдым» ырларны истіп, кӧрігҷілернің чӱрее-паары хайылған. Чоохтирға кирек, пу ырларны «Иренек Ханның» полған на концертінде истерге чарир. Че мының алнында Юлия Тиникова оларны ӧӧнінде чалғызан толдырған полза, амды ол Аржан Туденевнең хада кӧп ырны сарнапча. Аның сылтаанда сарыннар пасха истілчелер, оларның кӧглері дее алыс парған чіли пілдірче. Ӧмедегілер, пір орында турбин, хачан даа тілегде полчатханы махтағлығ.
Аржан Туденев - харындас чонның оолғы, аннаңар алтай ырлары чох «Иренек Ханның» концерттері иртпинче. «Алтайым», «Алыптарның той-пайы» сарыннар пастыра чайаачы ус чонына, тӧреен чиріне хынызын читірген. Аржанның ӱні сіліг, хайы морсымнығ! Итсе-де, Юлия Тиникова аннаң пір дее халбинча. Тӧӧ чирінең сыххан ырҷы полған на сарынның ӧӧн сағызын читір пирерге кӱстенче. Мында музыканттарны хайди даа таныхтирға кирек. Игорь Колесников (барабаннар), Алексей Брюханов (гитара) паза Антон Воронин (бас-гитара) кӧг тиріглерінең чахсы ойнапчалар, кӧглер пасчалар, аранжировкалар итчелер.
«Иренек Хан» ӧменің тӧстегчілерінің пірсі Максим Кобяков полған. Ол наа ла тӧстелчеткен рок ӧмее «Иренек Хан» ат пиртір. Хомзынысха, чайаачы кӧңніліг чир-суғҷыбыс чуртастаң ирте парыбысхан. Арғызының адын хумартхылап, музыканттар «Хан Сын» ырны толдырғаннар.
10 чыл аразына «Иренек Хан» ӧмеде илееде чайаачы ус тоғынған. Оларның санында - виолончелист, симфоническай оркестрнің музыканты Анна Худоярова. Пайрамнығ концертте аралазып, Анна нинче-де ыр хада толдырған.
«Иренек Хан» ӧменің репертуарына ідӧк композитор Татьяна Шалгинованың «60 алып» музыка пьесазы кiрче. Февральда ирткен концертте музыканттар аны шоор, тимір хомыс, барабаннар паза гитаралар полызиинаң толдырғаннар. Амды, тізең, оларнаң хада сценаа «Аструм» хыллығ квартет сыххан. «Иренек Хан» ӧменің чайаачызынаң чахсы таныс кізілер пілчелер: чир-суғчыларыбыс аймах кӧг тиріглерін піріктіріп ойнирға хынадыр. Че ӧме квартетнең хада ойнирын пірдеезі сағыбаан. Татьяна Шалгинованың пьесазына аранжировканы Антон Воронин пастыр. Кӧгчінің музыказы уламох сіліг истілче. Хайхастығ кӧӧ кӧрігҷілерні часкалығ олған тузынзар, хаҷан-да кӧрген сіліг тӱстерінзер айландырча, таңдағызына ізеніс пирче.
Ідӧк концертте наа сарыннар толдырылған. «Кӱргеннер» ыр поэт Сибдей Томның кибелізіне чайалған. Кӧӧн музыканттар ӧменең пасханнар. Минің кӧрізімнең, «Кӱргеннер» чон сарынына чағын, ол сағысха тӱзірче. Ікінҷі ыр «Ху-ха» адалча, анзы саңай пасха оңдайлығ. Табырах чоохтаныстардаң пӱткен сарынны дискотекаларда даа толдырарға чарир. Аның кӧӧ чиит тусты таныхтапча. Чиитте кізі хал, ӧткін полча, прай чирде маңнанарға кӱстенче.
Пу ырны истіп, мин пылтыр ирткен «От ыры» фестивальны сағысха киргем. Тиксі Россиядағы марыға Крымнаң килген Халиса Аблаева, мындағ ырны толдырып, кӧрігҷілерні чапсытхан. 2017 чылда марығның чиңісчізі «Иренек Хан» полыбысхан. Ағаа хоза чир-суғҷыларыбыс, «Наа Чылтыс» марығда кӱстерін сынап, Россияның пис иң артых араласчыларының санына кіргеннер. Концертке килген улустың марығда толдырылған «Кӧӧк», «Хайдазың син, хыныс?» ырларны истіп алар оңдай полған.
«Иренек Хан» ӧменің «Ікі тус аразында» концерті уғаа чахсы ирткен. Музыканттарның узына морсынып, кӧрігчілер матап айа сапханнар, «Браво! Бис!» хысхырғаннар. Концерт ікі час парған, че кӧрігҷілерге кӧмес читпин партыр, олар таразарға маңзырабинчатханнар. «Иренек Хан» ӧме наа ойынын кӱскӱзін кӧзідер, чайғызын музыканттар фестиваль-марығларда аралазарға пӧгінчелер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде