ТӦРЕЕН ЧИРІБІСТІҢ СІЛИИНЕ ӦКЕРСІНІС
22.05.2018
Хабарлар
Чирібістің сілиине ӧкерсінчеткен кӧрігҷілер.
Кӧзідіг. Ағбандағы «Чылтыс» кӧзідіг залында Хакасиядағы хоосчыларның чайаачы тоғыстары, теестегі кӧзідіге сығарылып, кӧп кізінің кӧңнін кӧдірді.
Сырның чылығ ӧңнері хысхызын пӧзік нимес тағлар аразында чіт парған аалыҷахты тірілдірчеткенге тӧӧй. Аның алнында тохтабызып, кинетін не тӧреен-ӧскен чирімдегі, Таштып аймаандағы, Чоғархы Хурлығас аал сағысха кір килген. Хайдағ истіг орында турча ол. Тиктең нимес андар пістің хазнаның на нимес, пасха хан чирлерінең дее кізілер чуртирға килчелер.
Кӧзідіге сығарылған хоостарның хыринда турчатхан кізілер хайди хылынчатханын сизініп одырзам, прайзы даа сағыстарынаң тӧреен-ӧскен сіліг чирлерінзер парыбысхан осхас. Андағох оңдайнаң тудынча Хакасияның культура министрінің орынңызы Ирина Браим. Ирина Владимировна яблоколығ ағас хоосталған чайаачы тоғыс хыринда турча. Холларын кӧксіне чаба тут салтыр.
- Хоостарның хайзы даа ӧрініс сыйлапчатханға, кізі кӧңнін кӧдірчеткенге тӧӧй, - ӱлесче сағыстарынаң пастых.
- Ирина Владимировна, піс пу кӧзідіге илееде хоостар тимнеен полғабыс. Прайзын сыырт полбаабыс, - чоохха хозылча Россияның Хоосчылар пірігізінің Хакасиядағы пӧлиинің кнезі Александр Кобыльцов.
Александр Григорьевичтің кӧрізінең, мындағ кӧзідіглерде саблығ хоосчыларнаң хада чииттернің дее чайаачы тоғыстары кӧрігҷілер хайиина сығарыларға кирек. Анзы чииттерні уламох тӱзімніг тоғынарға кӧӧктірер, сабланыссар арланчатхан чолҷа ізестіг хаалирға полызар. Мында даа чииттернің тоғыстары пар.
Кӧзідіг азылчатханда, республиканың культура министерствозының Аарластығ пічіктері Александр Кобыльцовха паза Григорий Красновха читірілген. Ирина Браим, оларны алғыстапчадып, хоосчылар мындағ сыйыхха Сибирьдегі федеральнай округтың кӧзідиинде аралазып, махтаға сыхханнарын таныхтаан.
«Чон узы» полчатхан хоосчы Валентина Тодышева Александр Кобыльцовха позының наа сыххан чыындызын сыйлаан. Валентина Ивановна анда кибістерні хайди сохчатханнаңар, хайдағ кӧзідіглерде араласханнаңар, чайаачы тоғыстары хайди паалалчатханнаңар пас салтыр. Иң ӧӧні - чайаачы устың читіре узубаан харааларынаңар, улуғ кӧдіріліс тузында аймах чіптернең соххан сіліг кӧрімніг кибістерінің ӱлӱзінеңер ипти-тапти чоллап салтыр. Пу кӧзідіге Валентина Ивановна «Хакасия» кибісті сығартыр. Мына хайда аның тӧреен чиріне хынызы харахха тасталча.
- Пайаадаң тігі хакас хыстаң харах албинчам. Парып, чағын танызып аларға чарадыбыстым, - хоосчылар кӧзідіглеріне чӧрерге хынчатхан писатель Галина Казачинова хыримда тохтабысты.
Галина Григорьевна пазын икіпчеткен саринзар хылчаңнапчам. Кӧрзем, чиит хоосчы Софья Асочакова позынын хыринда турчатхан кізілерге «Тағларым, минің тағларым» чайаачы тоғызынаңар хайдағ-да чапсых ниме чоохтапчатхан осхас. Кӧрігҷілер пастап кӱлімзірескеннер, анаң сурығлар пиріп пастабысханнар. Софьяның хынызы тағлар полар, олардаңар кӧп чоохтапча.
Пӧзік синде толдырылған тоғыстар аразында Валерий Сусиннің «Часхы кӧӧ» хоозы хайиим тартхан. Сіліг чазыда ипти-кеен одыр салған абахай хыс хомыснаң ойнапча. Сарнапчатхан осхас, ирнілері хыймырапчатхан чіли чайалтыр. Че иң не ӧӧні - аның хакас кӧгенегінiң идегі чазаа толдыра чайыл партыр. Постаң хыс чирдең ӧс килгенге тӧӧй. Андағ хоостар Алексей Топоев ле чайапча тіп сағынңаңмын. Ағаа тӧӧй поларға харасчатханнар парох полтыр. Кӧрерге кӧмес изі чох арах таа полза, чахсы толдырылтыр.
Хакасиядағы хоосчыларның теестегі кӧзідии тӧреен чирібістін сілиине чарыдылча тізе, саба полбас. Аннаңар даа кӧрігҷілер полған на чайаачы тоғыстың хыринда ӱрге тохтабыс турғаннар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы