ХАКАСИЯДА ЧАА ПАЗА ІСТЕНІС САБЛАНЫЗЫ ЗАЛЫ ПОЛАР
23.05.2018
Хабарлар
Культура. Иң кирек сурығлар ӱзӱрілген.
Республиканың пазы Виктор Зимин тоғыс хоостыра культура министрі Татьяна Чаптыкованаң тоғасхан. Ол республиканың музей-культура кінінде ирткен. Чыылығда ідӧк Л.Р.Кызласовтың адынаң чир-суғ ӱгренӌен музейнің директоры Андрей Готлиб паза дизайнер Марина Мамышева араласханнар.
Тоғазығ тузында чоох иң пастап Чаа паза істеніс сабланызы залынаңар парған. Аны азар пастағнаң Ветераннар чӧбінің кнезі Галина Трошкина сыххан. Олох залда Пирятин дивизиязы полктарының знамялары хайраллалар. Оларны Россияның арачыланыс министрі Сергей Шойгу тӧреміл хайраллирға республикаа пирерге чаратты. Пу чағында ӱс знамяны Хакасиязар ағыларлар.
Чаа паза істеніс сабланызы залы музейнің ӱзінӌі хадылында орнығар. Кӧріл парған пӧлік Виктор Михайловичтің кӧңніне кірген. Музей директоры Андрей Готлибтің таниинаң, мында Илбек Ада чаа араласчыларына, тыл тоғынӌыларына чарыдылған экспозициялар полар. Алынӌа стендтерде Социализм Істенізі матырларынаңар чоохталар. Музей чыындызында прай кирек сомнар паза пічіктер пар. Че пу залда интерактивнай стол турғызыбысхан полза, чахсы поларӌых. Андар компьютерзер чіли полған на матырның сомын, чуртас чолынаңар хабарны кир саларға чарир. Ӱгренӌілер, пеер экскурсияа киліп, оларның аға-ууӌалары Илбек Чиңіске хайдағ улуғ хозым иткенін кӧрерлер.
Сағыстарынаң ӱлезіп, Андрей Готлиб таныхтаан: «Чаа паза істеніс сабланызы залында пӧзік чидіглерге читкен улусха хазна сыйыхтарын читірерге, полиция тоғынӌыларына присяга пирерге чарир. Паспорттарны пастағызын на алчатхан саарбахтарны пу залда чеестезе, оларның сағызында пайрамнығ мероприятие ӱрге халар».
Хакасия пазы Виктор Зимин директор Андрей Готлибтің прай сағыстарынаң чарасхан. Че тоғыстарны июньда пастирға кирек тіп чоохтаан. Чонның махачызына чарыдылған залға ахча хайди даа табылар. Виктор Михайлович кӧзідімге Ирт тағдағы мемориал комплексін алған. Аны пӱдірер пастағнаң Улуғлар чӧбінің кнезі полған Владислав Торосов сыххан. Ӱлгӱлернің пу сағыс чуртасха кирілеріне ікінӌілес полтыр, че амды ол комплекс кізілерні ӧріндірче, аны кӧріп, полғанының на чӱреенде ӧбекелерінің ӱчӱн поғдархас тӧріпче.
Ідӧк тоғазығ тузында Республика кӱнін таныхтирдаңар чоох парған. Культура министрі Татьяна Чаптыкова Хакасия пазы Виктор Зиминні опера чылтыстарының концерт программазынаң таныстырған. Пӱӱл анда Мариинскай театрның солизі Юлия Маточкина, «Геликон-Опера» музыка театрының артизі Георгий Васильев, баритон ӱнніг Владислав Косарев паза таланттығ чир-суғӌыбыс, скрипач Анастасия Субракова аралазарлар. Программа Виктор Михайловичтің кӧңніне кірген. Че концерт тузында ырӌылар ариялар ла толдырбазыннар, программазар романстарны хайди даа кир саларға кирек тіп таныхтаан республика пазы. Пылтыр, арияларны ла истіп, кӧрігӌілер майыхтырлар.
Халғанӌызын Хакасия пазы дизайнер Марина Мамышеванаң чоохтасхан. Марина Георгиевна «Алтыр» мода театрының тӧстегӌізі паза устағӌызы полча. Дизайнер амғы тусха килістіре хакас кип-азаан чайапча. Амды Марина Мамышева иреннерге паза палаларға кип-азах тігерге пӧгінче. Эскизтер тимде, че кип-азах чыындызын тігерге ахча киректелче. Виктор Михайлович хакас устың чайаачызынаң чахсы таныс. «Алтыр» театрының хыстары республика пайрамнарында ӧткін араласчалар. Олар Хакасияның иң сіліг ис-пайы полчалар тиирге чарир. Аннаңар губернатор Марина Мамышеваа хайди даа полыс пирербіс тіп молӌаан.
Хакасия пазы Виктор Зиминнің культура министрі Татьяна Чаптыкованаң тоғазии тузында иң кирек сурығлар пӧгілгеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы