ХЫРЫҒ ХАДАҒӋЫЛАРЫ ХАҶАН ДАА ТИМДЕЛЕР
01.06.2018
Хабарлар
Улӱкӱн. Асхыста пістің хазнаның хырығларын хадарған ооллар, чыылызып, Пограничник кӱнін таныхтааннар.
От кӧк пӧріктіг ооллар Асхыста иртеннең пазыс чӧрчеткеннер. Алында 10.00 - 11.00 час тустарында мемориал комплексінде чыылызып пастаӌаңнар. Пӱӱл, тізең, ӱгренӌілер ЕГЭ тутчатханнаңар, оларға харығ полбасха тіп, пограничник-ветераннар 14.00 часта чыылысханнар. Анда Асхыс аймаа администрациязының чииттер киреенӌе пӧлиинің ӧӧн специализі Ольга Бытотова ветераннарны алғыстаан. Анаң олар мемориал хыринзар чахайахтар салғаннар.
Ооллар андартын Асхыстағы Культура туразынзар парғаннар. Культура тоғынӌылары улуғ нимес концерт тимнеп салтырлар. Че ӧӧні - Асхыс аймааның пазы Абрек Челтыгмашев хырығ хадағӌыларын чылығ сӧстернең алғыстааны. Анаң ол чииттернің чир-сууна хынызын тыыдарынӌа улуғ тоғыс апарчатханнарға алғыстастығ пічіктер читірген. Ағаа хоза оларға пограничнай служба тӧстелгеннең 100 чыл толчатханына вымпеллер читірілген.
Прайзының ӧрінізіне хырығ хадарған оолларға «Пограничнай войскоға 100 чыл» медальлар паза орденнер читіргеннер. Пу медальны хазна тимнебеен, аны пограничник-ветераннарның комитеді тимнептір, андағ даа полза, чӱрекке маңат.
Абрек Челтыгмашев чааӌылар комиссары Сергей Кибирёвтың тӱзімніг тоғызын таныхтаан. Чиңіс кӱнінде Асхыста чааӌы-ветераннар стройнаң иртедірлер, пістің республикада пір дее аймахта андағ ниме чох полтыр. Сыннаң даа, пограничниктер, десантниктер, танкисттер, пасха даа чааӌы-ветераннар чыылысса, чааӌылар комиссары анда поладыр. Аның устаанынаң прай ниме иптіг иртче.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы