ЧИИТ СӦБІРЕЛЕРГЕ - ЧАХСЫ ХАБАЗЫҒ
05.06.2018
Хабарлар
Тимур паза Ольга СЕМЁНОВТАРНЫҢ сӧбірезі.
Чурт программазы. Республиканың аймах аалларының 12 чиит сӧбірезі чурт сертификаттарын алды.
ХАКАСИЯ ПАЗЫ ВИКТОР ЗИМИН СОЦИАЛЬНАЙ ТӦЛЕГЛЕР ХООСТЫРА ЧУРТ АЛАРЫНҶА АЛАЙ ПӰДІРЕРІНҶЕ СЕРТИФИКАТТАРНЫ ПАЙРАМНИ РЕСПУБЛИКА ААЛЛАРЫНЫҢ ЧУРТАҒҶЫЛАРЫНА ЧИТІРГЕН. АМДЫ 12 ЧИИТ СӦБІРЕ ПОС ЧУРТЫНА ЧИДІНЕР. ОЛАР «ААЛДАҒЫ ЧИИТ СӦБІРЕЛЕРГЕ ПАЗА СПЕЦИАЛИСТТЕРГЕ ЧУРТ ОҢДАЙЛАРЫН ЧАХСЫЛАНДЫРАРЫ» ПРОГРАММАДА АРАЛАСХАННАР.
- ПӰӰН СІРЕРГЕ МЫНДАҒ ААРЛЫҒ ПІЧІКТЕРНІ ЧИТІРЕРГЕ УҒАА ӦРІНІСТІГ, - ТЕЕН ХАКАСИЯ ПАЗЫ ВИКТОР ЗИМИН. - СІРЕР ДЕЕ ПУ КӰННІ ЧИДІКПИН САҒААЗАР. РЕСПУБЛИКАНЫҢ УСТАҒ-ПАСТАА ААЛДАҒЫЛАРҒА ХАҶАН ДАА ПОЛЫЗЫҒ ПИРЕРГЕ КӰСТЕНЧЕ.
Чурт сертификаттарын, кресен-фермер хониин тутчатханнардаң пасха, ӱгретчілер дее, имҷілер дее алғаннар. Устағҷыларны аалларзар чииттер айланчатханы, оларның саны хозылчатханы чӧпсіндірче.
Пу хазна программазы хоостыра Хакасияның 815 сӧбірезі пӱӱнгі кӱнге чурт оңдайларын чахсыландырып алған. Тиксі 430 миллион азыра салковай позыдылтыр. Программа аннаң андар тоғынар. Ол аалдағы чиит сӧбірелерге паза специалисттерге полызығ пирче. Тура пӱдіриине алай тузаланыста полған тимде чуртха хазна, республика, орындағы бюджеттердең 70 % ахча позыдылча, 30 %-ін программа араласчызы позы хозарға кирек. Ӧӧнінде ол социальнай паза аал хонии тоғынҷыларына кӧріл парған.
Виктор Зиминнің холынаң сертификаттарны алғаннар: кресен-фермер хонииның устағчылары Татьяна Канзычакова, Эдуард Юрганов, «Сибирь-Агроның» устағчызы Тимур Семёнов, ӱгретчілер Татьяна Боргоякова (Таштыптағы школа-интернат), Татьяна Байгушкина (Хубачардағы ортымах школа), Варвара Яркова (Хойбалдағы ортымах школа), Марина Путинцева паза Анна Красникова (Ширадағы тиксі ӱгредігліг паза ортымах школалар), имҷілер Максим Ковалев (Хубачар) паза Белекмаа Монгуш (Боград), чоннаң социальнай тоғысты апарчатхан специалист Тамара Левашева (Пии аймаа).
Татьяна Боргоякова Таштыптағы школа-интернатта пасталығ класстар ӱгретчізі полып тоғынча. Аның тӧреен-ӧскен чирі - Пии аймаандағы Хызыл хара суғ аал. Пӧзік ӱгредіг алып алған специалист, Таштыпта тоғыс табылғанда, андар чуртирға парған. Амға теере чиит сӧбіре чуртты арендаа суурып чуртапча. Апсаа вахта оңдайынаң тоғынча, оларның ікі хызыҷаа олған садынзар чӧрче.
- Пу программада аралазып, чурт кирексіпчеткен сӧбіре полып, тееске тур салғабыс, анаң килістіре чурт таап алғабыс, - чоохтаан Татьяна Боргоякова. - Ол наа чурт нимес, че улуғ тураа саналча. Аалда пӱдіріл парған наа туралар пар, че оларда хай пірее тоғыстар читіре иділбеен полза, программаа килістіре ниместер.
Амғы пирілген сертификат ахчазы кӱскӱзер килер тіпче чиит ипчі. Хысхызына пос чуртынзар кіріп алзалар, уғаа чахсы полар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы