ХАКАС КӦГЛЕРІ - МОСКВА ОБЛАЗЫНДА
05.06.2018
Хабарлар
Культура. «Айланыс» ансамбль Бахрушинскай полызығлығ XV фестивальда араласты.
Хакасияның иң саблығ ӧмелерінін пірсі «Айланыс» аймах фестивальларда ӧткін аралазадыр. Ӱр ниместе артисттер Бахрушинскай полызығлығ XV фестивальда устарын кӧзіткеннер.
Фестивальның тӧстегҷізі А.А.Бахрушиннің адынаң театр музейі полча. Аның ӧӧн пӧгіні - ӧкіс халған олғаннарға паза кӧп палалығ сӧбірелерге полызары. Кибірге кір парған пайрам пір саңай Москва паза Зарайск городтарда иртче. Зарайск Москва облазында орныхча, аннаң меценаттар Бахрушиннер сыхханнар. Фестивальда саблығ артисттер, музыканттар, театр вузтарының студенттері араласчалар.
Чоохтирға кирек, А.А.Бахрушиннің адынаң театр музейі пістің республиканаң пик палғалыс тутча. «Сибер Ил» чоннар аразындағы форумда иділген чӧптезіг хоостыра Хакасияда аның кӧзідіглері, мероприятиелері тӧреміл иртірілче. Л.Р.Кызласовтың «Айланыс» ансамбль кӧрігҷілернең хада адынаң чир-суғ ӱгренҷең музей, тізең, экспонаттарын Москвада кӧзітче. Ідӧк театр музейі хакас ӧмелерін концерт иртірерге хығырча. Аның алнында «Ӱлгер» ансамбль узын кӧзіттір, амды «Айланыс» ырларынаң кӧрігҷілернің чӱреен кӧӧреткен.
«Читіген» театрның директоры Ирина Чустугешеваның таниинаң, фестивальға олар ікі пӧгіннең чӧргеннер. Пастағызы, «Хыс оғырлааны» хоос фильмні кӧзідерге. Аны хакас театрының ӧмезі Бахрушинскай музейнің ахчазына суурған. Фильмнің режиссерлары Андрей Асочаковнаң Артас Канзычаков полчалар. Кӱлкістіг фильмде ипчі ал полбинчатхан иреннеңер чоохталча. Ирина Васильевна таныхтаан: «Фильм хакас тілінең суурылған, піс ӧӧн тоғысты ит салғабыс, че оох-теек нимелер халған. Кӧзідімге, субтитрлерні тимнирге маңнанмаабыс, аннаңар кӧзідіг тузында мағаа фильмні орыс тіліне тілбестирге киліскен. Кино музей директорының орынҷызы Александр Рубцовтың кӧңніне кірген. Ол театр тоғысты чахсы ит салған тіп таныхтаан».
Ікінҷі кӱнінде «Айланыс» ансамбльның концерті Зарайсктағы «Чиңіс» культура кінінде ирткен. Пастап музыканттар кӧрігҷілерні хакас чонның кӧг тиріглерінең таныстырғаннар, анаң залға толдыра хакас сарыннары чайылған. «Кізілер пістін артисттерні уғаа чылығ удурлааннар, олар хакас чайаачыларын позыдарға хынминчатханнар», - чоохтаан Ирина Чустугешева.
Бахрушиннің адынаң театр музейі «Айланысты» пазох постарынзар концерттернең хығырарға пӧгінче. Амды «Читіген» театр «Ызых тағ» наа ойынны кӧзідерге тимненче. Аның премьеразы 9 июньда 19.00 часта С.П.Кадышевтің адынаң культура кінінде иртер. Прайзын театрның наа спектакльын кӧріп аларға хығырчабыс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы