ПІРГЕ ТОҒЫС ХАҶАН ДАА ТӰЗІМНІГ
05.06.2018
Хабарлар
Конференция. Ирткен неделяда «Сибирьдегі философияның оңдайы: чалғыс паза аймах-пасха. Наука. Ӱгредіг. Культура» VII Сибирьдегі философия семинары ирткен. Ол тиксі Россия синіндегі конференция.
Философия семинары республиканың музей-культура кінінде пайрамни азылған. Таныхтирға кирек, пістің регионда ол пастағызын на иртче. Мероприятиее аймах-пасха регионнардаң учёнайлар чыылысханнар: Хызылчардаң, Новосибирсктең, Омсктаң, Томсктаң, Хызылдаң, Самарадаң, Екатеринбургтаң, Вологдадаң паза Москвадаң.
Конференцияның пайрамнығ чардығын философия наукаларының докторы, профессор Марат Чистанов апарған. Хайди ол таныхтаан, семинарның ӧӧн пӧгіні - Россияның паза Сибирь регионнарының наука, ӱгредіг паза культура кибірлерін хайраллирын паза оларның таңдағы тилізін философия паза тархын-культура саринаң кӧрері.
Ідӧк анда Хакас хазна университедінің ректоры Татьяна Краснова, Л.Р.Кызласовтың адынаң чир-суғ ӱгренчең национальнай музей директоры Андрей Готлиб, республиканың ӱгредіг паза наука министерствозының советнигі Татьяна Зеленецкая, ХакНИИЯЛИ-ның директор орынчызы Надежда Данькина араласханнар. Олар прайзы пу мероприятиенің улуғ тузазын таныхтааннар. Аалҷыларны музей директоры Андрей Готлиб чылығ удурлаан.
- Конференция араласчыларына тӱзімніг тоғыс паза маңнаныс алғапчам. Ідӧк прайзын культура-музей комплекснiң ис-пайынаң танызарға хығырчам. Мында сірер Ӱстӱнзархы Сибирьдегі чоннар культуразының пайын кӧрерзер, - таныхтаан ол.
Пу конференция ідӧк Хакас хазна университеді паза чир-суғ ӱгренчең национальнай музей хада тоғынардаңар чӧптезіг алғанынаң танығлығ полған. Ол чӧптезіг хоостыра хазна университеді паза национальнай музей пірге наука істезіглерін иртірерлер, наука тоғыстарын тимнирлер, наа проекттер чуртасха кирерлер, наука мероприятиелерін апарарлар паза даа пасха сурығларны хада пӧгерлер.
ХГУ ректоры Татьяна Краснова оларның пірге тоғызы чылдаң чылға тыып одырарына ізенчем тіп таныхтаан.
- Мындағ наука мероприятиелерінде наа кӧстеглер сығысчалар. Анынаң ол аарлығ. Пу конференция кибірге кір парарына ізенчем. Аның наука істезіглерін піс хайди даа сабландырарбыс паза наука тоғынҷыларынаң пасха ідӧк чонға читірербіс, - теен ХГУ ректоры.
Пу наука конференциязын Хакас хазна университеді, республиканың тіл, литература паза история наука-істезігліг институды паза Философия факультеттерінің паза пӧліктерінің ассоциациязы иртіргеннер.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде