МЫНДА «ФИЛИППОК» ПОЛАР
08.06.2018
Хабарлар
Олған сады. Ағбанда теестегі олған садының пӱдірии пасталча.
Пастағы кірпистер салыл парды.
Пу кӱннерде Ағбанда Чехов орамазындағы 151 № тура хыринда 300 орынға олған садының пӱдірии пасталған. Аны федеральнай программа хоостыра пӱдірерлер. Аннаңар пӱдіріге кӧрілген ахчаның 90 проценті федеральнай бюджеттең пирілер, халғаны - орындағы бюджеттең.
Олған садының пӱдіриин азарға Хакасияның пазы Виктор Зимин, республиканың ӱгредіг паза наука министрі Лариса Гимазутина, Ағбан городтың пазы Николай Булакин килгеннер.
Николай Булакин хайдағ олған сады пӱдіріл парарын хысхаӌахти чоохтап пирген. Пу олған сады пір чыл пазынаң тузаланысха киріл парарға кирек. Ағаа 250 миллионӌа салковай позыдылча. Ол ӱс хадыллығ паза бассейнніг полар. Олған садында 12 группа азылар. 9 группазында 3 -7 частығ палаӌахтар полар, 3 группазында - 3 айлығдаң 3 часха теере.
Ағбан городта палалар кӧп тӧріпче, аннаңар город чыл сай наа олған садын тузаланысха кирче. Пӱӱл, тізең, ікі олған садын пӱдіріп пастапчалар.
Хакасия пазы Виктор Зимин олған садтарын пӱдірерге федеральнай программаа кіріп алғаннаңар республиканың ӱгредіг паза наука министрі Лариса Гимазутинаа паза Ағбан город пазы Николай Булакинге алғызын читірген. Городта олған садтарына хоза пір школа пӱдіреріне пӧгін пар. Республикада
пу чағынғы чылларда Алтай паза Асхыс аймахтарында олған садтары пӱдірілер.
Анаң пу олған садын хайди адап салардаңар сурығ турыбысханда, Н.Булакин аны орыс писательі Лев Толстойның «Филиппок» чооғы хоостыра адап саларға чӧп пирген. Аннаң прайзы чарасхан.
Анаң Хакасия пазы Виктор Зимин, Ағбан город пазы Николай Булакин паза ӱгредіг паза наука министрі Лариса Гимазутина наа пӱдірілчеткен олған садының бетон блоктарына пастағы кірпистерні салғаннар.
Ам пір чыл пазынаң мында сіліг олған сады турыбызар, кічіг палаӌахтарның ӧтіг табызы ибіре чайылар.
Автор :
Илья ПИГЕНОВ.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы