УЙҒУ ЧОХ XAPAAЛAP ПАСТАЛЧА
15.06.2018
Хабарлар
Спорт пайрамы. Тӧрт чыл сағаан ӱлӱкӱн пасталыбысты, футболча тилекей чемпионады Москвада пайрам кибірли азылды. Хайдағ команда чиңіс тудар ни?
Пу кӱннерде кемнең дее чоохтас, прайзының тӧӧй сағыссырас: Россияның піріктірілген командазы, ибде ойнап, хайди пол халар ни? Улуғ хомзынысха, пістің команда чахсы тимненіс кӧзідеріне ізенчеткен кізі чоғыл даа тиирге чарир. Хазнабыс чуртағчылары аразында парчатхан ӧӧн талазығ-тӧлкеленіс - Россияның командазы позының подгруппазынаң даа сых полар ба, чох па?
Мында даа хазыр талазығлар парча. Піди сананып-пӧгініп одырчатса, подгруппада ікінҷі орынға сығып алҷаң оңдай пар чіли пілдірче. Аның ӱчӱн пістіңнерге Саудовскай Аравияның паза Египеттің командаларын хайдағ-да оңдайнаң утып аларға киректелче.
Андада ла подгруппада ікінҷі орынға сыхчалар. Ибде ойнапчатханда, кӧрігҷілерні ӧріндірерге кирек.
Пастағы орын, тізең, пілігҷілернiң сананғаны-пӧгінгені хоостыра сала даа ікінҷілес чох Уругвайның командазына пирілче. Анзын кем пілер, орта даа полар. Сынап таа, Уругвайның командазы, тилекей чемпионаттарында аралазып, сыбыра маңат тимненіс кӧзітче. Олох арада Россияның 11 аймах городында ойнирға тимненчеткен тилекейдегі хайдағ даа команда чиңіс тударға килген нимес пе? Хайди таныхтапчалар футбол эксперттері, пӱӱнгі кӱнде хайдағ даа команда, ползын ол Европадаң, Америкадаң, Азиядаң алай Африкадаң, хомай нимес тимненіс кӧзідерге айабас. Уламох саблығ командалардаң тоғыр чахсы ойнабызарға парчан кӱстерін салары ікінҷілес ағылбинча. Аннаңар чиңіс тударға оой полар тіп пірдеезі ізенминче.
Ухаанҷыланчатханнарның ізеністеріне киртінзе, Россияның командазы позының подгруппазында ікінҷі орынға сығып алар. Андада пістіңнерге ікінҷі подгруппада чахсы ойнабысхан Португалияның алай Испанияның командаларының піреезінең тоғазарға килізер. Пу ікі команданын хайзы даа Европада ла нимес, ідӧк тилекейде сыбыра чахсы тимненіс кӧзітчеткен кӱстіг командалар санында адалча.
Хайдағ даа хазыр талазығ-сарыстар парчатса, пос хазназының командазына кӧмес тее ізенерге кирек. Киртініс чох хайди чуртачаң. Олох арада 2018 чылның тилекей чемпионы кем полыбызардаңар хыныға даа тӧлкелен кӧрерге ноға чарабас. Мында прайзы даа ӧӧнінде Германияның командазын пастағы орында кӧрче. Пір дее айабас, утып таа алар. Хайди ол 2014 чылда Бразилияда марығ ээлерін, пір дее нимее салбинчатхан чіли, чарым финалда 7 : 1 саннаң оой ла утып алды. Амды кирек хайди полар ни? Тоғазарлар ни пу ікі кӱстіг команда Россияда иртчеткен тилекей чемпионадында?
Сағирбыс, кӧрербіс. Мында пір ле ӧріністіг нимее ікінҷілирге киліспинче - спорт пайрамы тузында уйғу чох хараалар пасталыбызарлар. Кӧрігҷі-фанаттар пу тусха орта ӧнетін тынағ-отпускка сыхлапчалар. Бразилияда, тізең, хазна ӱлгӱзінің чарадии хоостыра істеніс кӱні чарым кӱнге хызырылған. Тоғысчылар футбол кӧрген, ибде иртірген тусты соонаң читіре тоғыныбызарға тимделер.
Пістің хазнабыста нӧӧс Россияның футболисттері чир-суғҷыларына «Ура-а!.. Го-ол!» тіп хысхырызар, хараа даа полза, тасхар сығып, орамада тоғасхан на кізінең плесет салар оңдай пирбестер? Іди полбасха кирек. Ибде ойнапчатханда, стенелер дее полысча тіпчелер нооза. Че анзын теестегі ойыннар кӧзідерлер. Олар пасталыбыстылар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы