УЛУҒ ТОҒЫС САҒЫПЧА
20.06.2018
Хабарлар
Ӱлгӱ. Хакасияның пазы Виктор Зимин республика правительствозының чыылиин иртірген.
Чыылығның тоғызын республика устағҷызы чахығлардаң пастаан.
- Мин социальнай сетьтерде постың страницаларын азып апарчам, - айланған ол министрлерзер. - Сурынчам сірердең минің кӧзідімге поларға, пос аккаунттарын азып аларға. Піс прайзыбыс чуртағҷыларнаң кӧні палғалыс тударға паза оларның сидіксіністерін пӧгеріне полызарға кирекпіс.
Хакасияның пазы правительство кізілеріне ол пӧгінні чағын тус аразына толдыр саларға чахып салған.
Ікінҷі чахии Россия президентінің майдағы указында турғызылған пӧгіннерге чарыдылған. Ол указ хоостыра федеральнай правительство, регионнарнаң хада тоғынып, 13 ӧӧн кӧстегче национальнай проекттер тимнеп саларға кирек. Хайди таныхтаан Хакасияның пазы, ол республикаа паза аның чуртағчыларына кирек объекттер (наа имнег тураларын, ФАП-тар, культура паза спорт объекттерін) пӱдіреріне федеральнай ахчаны тартып аларына чахсы оңдай.
- Россия правительствозы пу сурығҷа ам на тоғынып пастабысхан, - таныхтаан республика пазы. - Че піс ол прай кӧстеглерні пілчебіс, аннаңар амох тимненіп пастирға кирек. Прай федеральнай программаларзар кіріп алар ӱчӱн.
Виктор Зимин 2019 чылдаң сығара чуртасха кирілер федеральнай программаларча прай министрлерге амох тоғынарға, постың национальнай проекттерін тимнирге пӧгін турғысхан. Хакасияның кӧстеглерін паза пӧгіннерін федеральнай национальнай проекттернің кӧстеглерінең палғалыстыр саларға кирек тіп таныхтаан ол.
Ідӧк хазнаның стратегическай тиліс кӧстеглерінде республика хайди аралазарын амох кӧріп пастирға пӧгін турғысхан. Ол Россия правительствозы турғысхан 11 ӧӧн кӧстегче федеральнай бюджеттең ахча иң не пурун позыдыл турар тіп кӧрілче нооза. Оларның санында хазых хайраллиры, ӱгредіг, моно-городтар тилізі, хорғыс чох чоллар, сыныхтағ тоғызының реформазы, кічіг бизнес паза идінҷектерге хабазары, істеністі тӱзімніг идері, чоннар аразындағы кооперация паза экспорт, ЖКХ паза город чуртазы, ипотекаа паза арендаа пирілчеткен чурт.
- Пісті улуғ тоғыс сағыпча, - сизіндірген ол.
Пасха сурығларзар айланып, Виктор Зимин паза пір хабарнаң ӱлескен - Хакасияның аграрнай сидіксіністер НИИ -зының холында полған, че тузаланылбинчатхан чирні (6,5 га) паза объекттерні Ағбан пилтірі аймааның холына пирердеңер чарадығ алылтыр. Ол объекттер паза чир Опытнай аал чӧбіне пиріл парар. Тасталған пӱдіріглерзер нааҷылалған соонаң ФАП, олған сады паза аал чӧбі кӧзер тіп кӧрілче.
Теестегі сурығ чоллардаңар полған. Хакасияның пазы пӱӱл орындағы чолларны тыхтирына паза нааҷылирына республика бюджедінең ахча ікі хати кӧп позыдылчатханын таныхтаан. Хакасияның транспорт паза чол хонии министрі Олег Тропин, пу сурығча сан-пиріс идіп, 2018 чылда муниципальнай пӱдістерге чолларны тыхтирына 242 миллион салковай субсидия пирілер тіп
искірген.
- Тиксі 27 километр чол тыхтал парарға кирек, - чоохтаан Тропин. - Амғы туста Ағбан пилтірі аймаанда чол тоғыстарын тоосчалар. Шира аймаанда, Сорығда паза Абазада тимнегліг тоғыстар апарылча. Он кӱн аразына тоғыстарны пастабызарға киректер, июль тоозылғанӌа ӧӧн тоғыстар толдырыл парар.
Виктор Зимин чол тоғыстары орай пасталчатханына паза олаңай чолларны грейдернең тӱзедер тоғыстар ам даа пасталбаанына хайығ айландырған.
- Мағаа социальнай сетьтер пастыра хоптар кірче, - сизіндірген ол министрні. - Чоллар тузында тыхтал турарға киректер.
Ідӧк аал хонии тоғыстарынаң паза Тун пайрамға тимненерінең палғалыстығ сурығларны ӱзӱрібіскеннер. Аал хониина Хакасияның пазы ахча кӧп арах позыдарға киректелчеткенін таныхтаан.
- Мал саны ӧс парған нооза, хабазығ ахчазы ідӧк ӧзіп турарға кирек, - теен ол.
Хакасияның пазы алынча хайығ хакас чонның Тун пайрамын иртіреріне салған.
- Пу ӱлӱкӱн чылдаң чылға сабланып одырча, аны кӧрерге килчеткен аалҷылар саны ӧслече, - таныхтаан Виктор Зимин. - Аннаңар пайрамны улам чарых, хынығ паза пӧзік синде иртірерге кирек.
Хакасияның культура министрі Татьяна Чаптыкова, тимненістеңер чоох тудып, пӱӱлгі Тун пайрам улам чапсых иртер тіп ізендірген. Ӱлӱкӱнні пайрамнығ азары театрализованнай кӧзідігдең пасталар, хайда 200 артиинаң кізі аралазар. Театрализованнай кӧзідіг хакас чонның «Читі хыс» кип-чооғына тӧстенер.
Чыылығның тоғызын тоозып, регион устағҷызы олғаннарның чайғыдағы тынағ тузын хорғыс чох иртірерін хайығда тударға чахығ пирген. Паза республика чуртағҷыларынзар айланған.
- Хайдағ-да паланың чуртазына хорғыс пар полғанын сизін салзаңар, иртпеңер - полыс пиріңер, - піди чооғын тоосхан Виктор Зимин.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы