УСТАҒ-ПАСТАҒДАҒЫЛАР МАРЫҒЛАСТЫЛАР
20.06.2018
Хабарлар
Муниципальнай пӱдістер чуртазы. Ирткен неделя Таштып аймаанда спорт ӱлӱкӱнінең танығлығ полды. Мында Хакас Республиканың муниципальнай пӱдістері аразында спартакиада ирткен.
Хакасияның муниципальнай пӱдістерінің устағ-пастаанда тоғынчатханнарның пу арға-мӧрійі 5-ӌі хати иртірілген. Ол полған сай пасха орында полча. Пу чылдағы спартакиадаа Таштыпсар чыылысханнар.
Арға-мӧрій полар кӱн таңдади Таштып чирінде наңмыр чаған, хазыр чил хайнаан. Кии сыхтығ, сӧрӧн пол парыбысхан. Мындағ кӱннер сӧӧ тартыл парыбысса, марығларны иртірерге тың харығ пол парар тіп хорыхханнар. Че хараазын наңмыр тохтап парған. Иртен пулуттығ паза сӧрӧн дее полза, тигірдең пасха пір дее ниме тоолабинчатхан. Аалӌылар чыылысчатхан туста пулуттар тарап сыхханнар, кӱн, чир ӱстӱн чылыдып, чонның кӧңнін кӧдірген.
Соон сӱрістіре киліп одырчатхан спортсменнернің кип-азахтарында пазыл парған танығлар хоостыра хайдаң килгеннерін піліп аларға чарир полған. Аалӌылар Таштып аймааның культура туразының алнындағы ачыхта чыылысханнар. Алфавит пастыра турыбыстырлар: Абаза город, Алтай, Асхыс, Пии, Боград, Орджоникидзе, Ағбан пилтірі, Шира, Таштып аймахтары паза Харатас город.
Марыға килгеннерні паза прай чонны мындағ танығлығ кӱннең алғыстирға килгеннер: Хакас Республиканың пазы Виктор Зимин, Хакас Республиканың спорт министрі Виктор Струков, национальнай паза территориальнай политика министрі Михаил Побызаков, муниципальнай пӱдістер чӧбінің кнезі Леонид Быков паза Таштып аймааның пазы Алексей Дьяченко.
Спортсменнер, параднаң парып, орыннарында турыбысханда, спартакиаданың ӧӧн чарғыӌызы Николай Свириденко марыға прай ниме тимде тіп республика пазына чоохтаан.
Алғыстастарны пастаан республика пазы Виктор Зимин:
- Прайларыңа чолабит читірчем. Улуғ алғыс Таштып аймааның устағӌыларына мындағ спорт пайрамын тимнеп салған ӱчӱн. Пасха аймахтардаң, городтардаң килгеннерге ідӧк улуғ алғыс.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы