УЛУҒ ЧООХТАНАРҒА ЧАРАБАС
20.06.2018
Хабарлар
Спорт пайрамы. Футболӌа тилекей чемпионадының пастағы ойыннары ирт пардылар. Хайдағ даа марығлар тузындағы чіли утханнары матап ӧрінісчелер, соона халғаннары чоо хомзынысчалар.
Хайдағ даа сидіктерні махалығ тобырып, ыраххы чолларны иртіп, футбол фанаттары тӧрт чыл пазынаң иртчеткен тилекей чемпионадын кӧріп аларға чиде салчалар. Іди пістің хазназар даа хай піреезі пасха-пасха оңдайнаң чиде салча. 1920 - 1930 чыллардағы иргі машиналығ ойлат чӧрчеткеннерге дее тоғасчалар, оларнаң хада сомға суурынчалар. Суғҷа читкеннер парохтар. Олар постарының сіліг киме-яхталарында чӱс чӧрчелер. Че тузы читсе, прай ниме артызып, стадионнарзар маңзырапчалар. Постарының хазназының командазы хайди ойнапчатханын кӧріп алар ӱчӱн не Россиязар килгеннер нооза.
Хайди таныхтапча Новости РИА-ның сурастырығлар иртірчеткен пӧлии, Россия Саудовскай Аравиянаң ойнапчатханын хазнабыс чуртағҷыларының 55 % кӧрген полтыр. Оларның кӧбізі улуғ частығлар. Ортын частығ кӧрігңілер саны кӧп нимес. Чииттер дее саны илееде асхынах. Че соондағы ойыннарны кӧрерге тимненчеткен кізілер саны хозыларын тӧлкеленчелер сурастырығҷылар.
Марығ тузында, тізең, кӧрҷең-ӧрінҷең ниме толдыра. Паза хаҷан пос хараанаң тилекейге сабланчатхан футболисттерні кӧріп аларзың. Талааннығ ползаң, аннаң хада сомға даа суурынып алар оңдай табылар. Ол даа сылтағнан Россияның 11 городында иртчеткен тилекей марииның ойыннарын кӧрерге кӧп чыылыс парадырлар орындағы чуртағҷылар, аалҷылар.
Аалҷылардаңар чоох парыбысханда, Бразилиядаң на 120 муң артиинаң фанат-кӧрігҷі Россиязар килгені таныхталча. Пасха даа хазналардаң кізілер кӧп килгеннеңер искірілче. Хазнабыстың городтарынңа хайди кӧгліг пастырыс чӧрчеткеннерін, ӧріністерін чазырбинчатханнарын кӧріп аларға кӧп кізі чыыл парадыр. Паза ла кӧрзең, постары даа аалҷыларға хозылыбысчалар, кӧгліг плесет сал чӧрчелер, матап сарнасчалар.
- Бразилиядағылар даа, мексикадағылар даа сіліг кӧрімніг пӧрік-сомбрероларын асхынах ағылтырлар. Че уғаа
ачых-чарых кӧңніліглер, - чоохтапчалар хазнабыс чуртағҷылары, оларнаң хада саңай майыхханҷа кӧглезіп алған соонда.
Пістің ӧбекелерібіс тиктең не таныхтабаҷаңнар нооза, улуғ чоохтанарға чарабас тіп. Тилекей марии тузында даа андағ киректер полғаннар. Кӧзідімге алза, Германия Мексиканаң тоғасханда, пастағы чардых 1:0 саннаң тоозылған. Тынағ тузында Германияның Мюнхен городынаң кӧзідіг пар сыххан - кізілер килкім не телевизорлар алнында толдыра чыылыс партырлар. Чир-суғҷылары Мексикаа 1:0 саннаң утырчатханына хайығ даа салбинчалар, Германияның иң чахсы команда тіп санапчалар, тоғазығның ікінҷі чардығында ойын саңай алыс парар, нинҷе кирек, анҷа гол кир пирербіс тіп ізенчелер. Че Германия 1:0 саннаң утыр салған - хайхастығ даа. Ол тилекей чемпионы нооза. Пірдең, андағ атха ол 4 хати турысхан.
Андағох оңдайнаң кирек парыбысхан Бразилия - Швейцария ойында. Бразилия тилекейнің 5 хати чемпионы. Че ойын 1:1 саннаң тоозылған, прайзын даа тың чапсытхан. Бразилияның командазына гол кирібіскен Стивен Цубер анзына сала даа чапсыбинча, чыллар алысчалар, пасха командалар устарын ӧскірчелер, чахсы ойнирға харасчалар тіпче.
Оңарылыстығ, прайзының хайиинда «Д» подгруппа. Алай ба аны тилекей чемпионадының «ӧлім группазы» тіп адапчалар. Анда Аргентина Исландиянаң 1:1 саннаң ойнабысхан, Хорватия Нигерияны 2:0 саннаң утхан. Хаҷан-да «Африканың бразилецтері» аарластығ атха турысхан Нигерияның футболисттері амды чахсы тимненіс кӧзіт полбадылар. Алай Хорватия іди маңат ойнап сыхты ба? Іди дее пол парарға айабас.
Піс, тізең, Россия Египетнең хайди ойнабызарын чидікпин сағыпчабыс, улуғ чоохтанарға сағынминчабыс. Чиңіске ізеніс хаҷан даа чітпинче, пістіңнерге тыңох киртінчебіс.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде