НАА ЧУРТАССАР ЧОЛ
26.06.2018
Хабарлар
Школа тоосчатхан ооллар:
Айзар КАНЗЫЧАКОВ, Денис ДЕВЯТКИН, Владислав ФОМЕНКО, Кирим ЧЕРТЫКОВ
Анымҷох, школа. Ирткен субботада Ағбандағы школаларны тоосчатхан оол-хыстарның пайрамы полды. Киӌеегі 972 ӱгренӌі пӱӱл школаларынаң анымӌохтасча.
ШКОЛАНЫ ТООСЧАТХАНЫ - КӀЗӀ ЧУРТАЗЫНДА ИҢ НЕ ЧӰРЕКСІНІСТІГ ТУС, НЕКЕ. ЧАЛААС АЗАХТЫҒ ОЛҒАН ТУЗЫ, ӰГРЕНІЛБЕЕН УРОКТАР, ХАДА ӰГРЕНЧЕТКЕН АРҒЫСТАРНЫҢ ХАТХЫ-КӰЛКІЗІ - ПРАЙ НИМЕ ИРТКЕН ТУСХА АЙЛАН ПАРДЫ. АЛНЫНДА УЛУҒЛАРНЫҢ НАНДЫРЫҒЛЫҒ ЧОЛЫ. АМДЫ ШКОЛА ТООСЧАТХАННАР ІКІ ЧУРТАС АРАЗЫНДА ТУРЧАЛАР ТИИРГЕ ЧАРИР. ПУ ПАЙРАМ, ТІЗЕҢ, АНЗЫНА КИРЕЧІ. ОЛ ИҢ НЕ СІЛІГ, АЧЫХ-ЧАРЫХ ӰЛӰКӰННЕРНІҢ ПІРСІ, ХАЙЗЫ ПОЛҒАН НА ААЛ-ГОРОДТА, АЙМАХТА, РЕГИОНДА ПАЗА ТИКСІ ХАЗНАДА ИРТЧЕ. ШКОЛА ТООСЧАТХАННАР АНДА ӦӦН МАТЫРЛАР, АННАҢАР ПУ ТАНЫҒЛЫҒ КӰН ОЛАРНЫҢ САҒЫЗЫНДА ӰРГЕ ХАЛА ПАРАР.
ПИС ЧАС ИИРДЕ АҒБАНДАҒЫ ДРАМА ТЕАТРЫНЫҢ ХЫРИНДАҒЫ АЧЫХТА ЧОН ТЫҒЫРАМА. ПРАЙЗЫ ЧАЗАҒЛЫҒ. ӰЛӰКӰН ПАСТАЛАРЫН САҒЫП, ШКОЛА ТООСЧАТХАННАРНЫ ТУҒАН-ЧАҒЫННАРЫ ПАЗА АРҒЫСТАРЫ АЛҒЫСТАС СӦСТЕРІН ЧИТІРЧЕЛЕР, ХАДА ӰГРЕНГЕН НАНҶЫЛАРЫНАҢ ХАЛҒАНҶЫЗЫН КӦРІСЧЕТКЕН ЧІЛИ ХАТИ-ХАТИ ХУҶАХТАСЧАЛАР, ХАҶАН ДАА ТАСТАСПАСХА СӦС ПИРЧЕЛЕР, ОЛОХ ТУСТА ОЛАРЗАР КӦСТЕЛГЕН КАМЕРАЛАРҒА КӰЛІМЗІРИРГЕ МАҢНАНЧАЛАР.
Че хайдағ даа ачых-чарых ӱлӱкӱн полза, оларның кӧбізі иртчеткен школа тузын айапча полар. Нинҷе чыл школа оларға ікінҷі ибі полған.
- Пӱӱнгі пайрам олған тузымнаң, школамнаң анымӌохтазар тус читкенін таныхтапча, - тіпче хакас национальнай гимназия-интернатты тоосчатхан Карина Мамышева. - Хада ӱгренген арғыстарымнаң чарылызарға сидік. Школада переменаларда удаа чоохтасчаңмыс, хормачыланысчаңмыс. Піске хаӌан даа хада хынығ полӌаң. Пістің хынған орныбыс - школадағы столовай. Прай пу ниме мағаа чидіспес.
Че олох туста школа тоосчатханнарның улуғ ӧрініс. Прай сыныхтағлар тудыл парғаннар. Алнында наа чуртас, наа пӧгіннер. Іди Карина Мамышева, экономика факультедінзер ӱгренерге кіріп, студент чуртазын прай саринаң кӧр кӧрерге сағынча. 10 № школаны тоосчатхан оол Кирим Чертыков, тізең, чуртазын имҷі киреенде кӧрче. Ол пайрам соондох пічіктерін ХГУ-ның имнег-социальнай институдынзар пирерге пӧгінче.
- Пастап школа тоосчатханыма киртінмеен полғам, че амды анзы пілдіртче. Прай сыныхтағлар ирт парғанда, чӱреемнең аар чӱк тӱс парған осхас, тынарға даа ниик пол парған. Амды ӧрініс ле халды. Пӱӱн минің наа чуртас пасталча, мин аны ӱр сағаам, - ӧрінізінең ӱлескен оол.
Школа тоосчатхан чииттерні іҷе-пабалары, туған-чағыннары, ӱгретчілері, арғыстары алғыстирға килгеннер. Чииттернең ӧкерсінерге килген олаңай чон полған. Іди харах частарын чызын турчатхан ууҷадаң пархаҷааңар школа тоосча полар тіп сурғам. Ол нандырған:
- Минің пархаларым улуғлар, хаӌанох школа тоос салғаннар. Пу пайрамға мин чылдаң чӧрчем. Чииттерзер кӧрiп, ӧрінчем. Хайдағ олар абахайлар! Оларның чолы азых ла ползын, сағыстары толзын. Чобағ кӧрбезіннер, хазых ла чӧрзіннер! Киртінчем, минің сӧстерім піреезіне хайди даа чидер.
Оркестр пайрамнығ кӧг ойнап пастаан. Школа тоосчатханнар Ағбанның ӧӧн орамаларынҷа колоннанаң соон-сӱрістіре «Саяны» стадионзар тибіребіскеннер. Олох туста чол хыринҷа туған-чағыннары, олардаң халбасха тіп, соонҷа маңзырааннар. Іҷе-пабалар палаларынаң, ӧкерсініп, харах албинчатханнар.
Полғанына ла пос иркезі иң сіліг, иң артых. Че сынында пу пайрамда прайзы айдас полғаннар! Ооллар ах кӧгенектіглер паза иптіг костюмнығлар. Хыстар, тізең, «хызыл чолдағы» саблығ артисттердең пір дее халбинчатханнар. Кӧгенектер аймаа чи! Ах, хара, кӧк, хызыл ӧңніглер. Хысхаҷах, узун. Полғанының на састары кӧгенеене килістіре оңдайлал партыр. Ызырғалар, монҷыхтар, прай ниме синінде. Прай пу хайхас нинҷе тимненіс, кӱс паза ахча кирексіпче полар.
- Палаа пір дее ниме айастығ нимес. Мындағ пайрам чуртаста пір ле хати полча, аннаңар, хызымны пу иирге тимнир ӱчӱн, прай кӱзібісті салғабыс. Ниме кӧңніне кірген, аны алғабыс. Пу кӱн паламның чӱреенде андағох ӧрініс халзын, аннаңар пір дее ниме айастығ нимес, - таныхтаан іҷе Елена Мамышева.
24 № школаның киҷеегі ӱгренҷізі Валерия Сазанакова пу танығлығ кӱнде хайдағ кӧгенектіг поларын хаҷанох сағын салған. Ус холлығ хысха аны, пызып, тігіп аларға пір дее сидік полбаан. Че хайдағ кӧгенек киліс парған! Тилекейде пірдеезінің андағ чоғыл. Че улам на ниик ол саринаң оолларға, таныхтапча Андрей Чебодаев.
- Иң ӧӧні сас хырыхтырып аларға, ах кӧгенек, тізең, хаӌан даа тимде, - тіпче 22 № школаны тоосчатхан оол.
Пу иирде Андрейнің ӧрінізіне іҷе-пабазы хозылған. Іҷезі Татьяна Евдокимовнаның чооғынаң, пу кӱнде ол позының школа тоосчатхан пайрамын сағысха кирче. Ол 1986 чылда Бондарев аалдағы школаны тоосхан. «Аалдағы ӱлӱкӱн амды оолғымның пайрамынаң тиңнеспинче дее, че, андағ даа полза, пос чыллары хаҷан даа аарлығ ла», - тіпче ипчі.
Н.Ф.Катановтың адынаң национальнай гимназия-интернаттың абахайлары
Школа тоосчатханнарның пайрамы «Саяны» спорткомплексте узарадылған. Трибунаа кізі тол парған, кӱн хайди даа ізітчетсе, чон орныларынаң тибірирге дее сағынмаан.
- Аарлығ олғаннар! Пӱӱн сірер школанаң анымӌохтасчазар. Школа тузы - ол хайхастығ тус. Сірер аны хаӌан даа ундубассар. Че алнында улам на хынығ тус сағыпча. Анда улуғ кізі чолы. Хаӌан даа турғызылған пӧгінзер хаалаңар, андада маңнаныс хайди даа полар. Чуртас кӧзітче, сірернің піреезі пасха городсар алай пасха хан чирінзер парыбызар. Че Ағбан чуртағҷылары сірерге ізенчелер, сірернең поғдархапчалар. Піс киртінчебіс, сірер улуғ чидіглерге чпдерзер, - школа тоосчатханнарзар алғыстас сӧстерінең айланған город пазы Николай Булакин.
Хайди таныхталған, пӱӱл Ағбандағы школаларны тоосчатханнар школа чуртазында чахсы чидіглер кӧзіткеннер. Іди 136 оол-хыс «Ӱгредігде алынҷа чидіглер ӱчӱн» Россия медальына турысхан, 30 кізі ӱгредігде, спортта, чайаачы тоғыста маңнаныстар ӱчӱн «Хакасияның алтын ізенізі» медаль алған. Пу танығлығ кӱнде оларны махтир кӧп ниме табылған. Сценадаң постаң полыбысхан чиит улусты кӧп алғыстааннар. Оларға кӧглееннер, теелбектенгеннер. Че мыннаң оларның пайрамы тоозылбаан. Концерт соонаң полған на класс школаларынҷа тарасхан. Анда оларны пайрамни аттестаттар алары сағаан.
Школаларынаң анымҷохтазар тус читкен. Пу иң не чӱрексіністіг тус. Амды пір класста 11 чыл хада ӧскен оол-хыстар полғаны ла чуртасча алынҷа хаалир.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы