МЫНДАҒ КӰН ХАТАЛБИНЧА
27.06.2018
Хабарлар
Концерт тузында.
Ӱлӱкӱн. Ирткен понедельникте «Саяны» спорткомплекс пазох ла кӱӱледі. Школа тоосчатхан чиит улусха республика ӱлӱкӱні ӱзінҷі чылы иртірілді. Аның ӧӧн аалӌызы реп толдырчатхан Россия артизі Мот полған.
ПРАВИТЕЛЬСТВО СЫЙИИ
Ӱлӱкӱнге чииттер тиксі республикадаң чыылысханнар. Чоох чоғыл, ӧӧн матырлар школа тоосчатхан оол-хыстар полғаннар. Оларнаң хада іҷе-пабалар, ӱгретчілер килгеннер. Ідӧк пӱӱл пастағызын на концертке республиканың ортымах профессиональнай учреждениелерін тоосчатхан иң артых студенттерні паза регионның ӧткін чииттерін хығырғаннар. Стадионда тиксі 10 муңҷа кізі чыыл парған. Пу пайрамны чииттер хаҷанох сағып пастааннар. Мындағ сыйыхты оларға Хакасия пазы Виктор Зимин иткен. Ол аннаңар ӱгренҷілерге хаҷанох искірген.
- Хакасия правительствозы сірерні пазох иң улуғ теелбек площадказынзар «Саяны» стадионзар пайрамнарыңны чалахай таныхтирға хығырча. Хайдағ артисттің концертін сірер кӧрерге сағынчазар?Пу олаңай нимес сурығны хада пӧгелер! - Инстаграмда пасхан Виктор Михайлович. Мындағ искіріге чон сах андох ӱндескен.
Таныхтирға кирек, школа тоосчатханнарның пайрамында саблығ артисттер ӱзінҷі чылы аралас парирлар. 2016 чылда «Серебро» группа килген полза, ирткен чылда чииттернің ӱлӱкӱнін «Gyest Pistols Show» группа чазаан. Пӱӱл чииттер Россияның саблығ артисттері Макс Коржты, Бастаны, Ёлканы, Полина Гагаринаны, Егор Кридті кӧрерге хынғаннар. Че хайди кӧрчебіс, таллағ репер Мотха тӱскен.
Пайрамнығ концертті В.Г.Чаптыковтың адынаң республика филармониязының артисттері асханнар. Сценадаң ідӧк амғы туста сабланчатхан ырлар истілгеннер. Чалахай теелбектер толдырылғаннар. Че оол-хыстарның ӧӧн аалҷыны сағыпчатханы іле кӧрінген.
Мына артисттер сценада алысчалар. Барабан, гитара паза пасха даа кӧг тирии тимнелче. Чыылыс парған чон «чылтыстың» сығарын тынмин даа сағыпчатханға тӧӧй полған.
- Изен, Ағбан! Кӧңніңер хайдағдыр? - прайзын чалахай удурлаан Мот. Пу туста чыылыс парған чон кӱӱли тӱскен.
Мотты (Матвей Мельников) чииттернің кӧбізі таныпча полар. Аның сарыннары радиоҷа, кӧг каналларынҷа тӧреміл ойнапча. Полған на наа сарыны сах андох прай хазнабысха саблан парча. «Капкан», «День и ночь», «Абсолютно всё», «Сопрано» ырларны чииттер чахсы пілчелер. Аның полған на концерті илееде чон чыып алча паза аның гастрольлары нинҷе-нинҷе айларға азынада пазыл парча. Че андағ даа полза, Хакасияның школа тоосчатхан тӧлін алғыстирға ол тус тапхан.
ЧОН КӦҢНІ
Мындағ сыйыхха чииттер тын ӧрінгеннер. Айза Бозыкова Таштып аймаандағы Ибіг аалдаң килген. Ол хаҷанох Моттың чайаачызын хайығда тутхан, амды ағаа пос хараанаң аны кӧріп алар ӱлӱс тӱскен. Аннаңар пу тоғазығны хыс чидікпин сағаан. «Пу иирнең мин уғаа чӧпсінчем. Ағбанзар андағ саблығ артисттер килчеткені ӧріндірче», - теен Айза. Ідӧк ол пу иирде азахтарына айабин теелбектенерге паза артистнең хада ырлирға молҷаан. Аның сӧстеріне ідӧк Тадина Колчинаева хозылған. Ол ідӧк Моттың сарыннарын хынып исчеттір. Аннаңар иир хынығ иртерінде пір дее ікінҷілебеен паза Хакасия пазына мындағ сыйых ӱчӱн улуғ алғызын читірген. Сизінгенде, хыстар прайзы даа пу артисттің чайаачызына тың хынчалар. Прайзы аннаңар чахсы ӱндескеннер, ырларын сарнааннар, холларын кӧдіріп, хысхырысханнар. Ооллар, тізең, сала амыр тудынғаннар.
- Школа тоосчатханы піске улуғ пайрам. Мин аны сағаам. Ол кӱн читкеніне ӧрінчем. Мындағ сыйых иділчеткені улам на ӧріністіг. Сынап чоохтаза, Моттың чайаачызынаң мин таныс нимеспін. Кем ол, репер бе алай ырҷы ба, піл полбинчам. Арса, пу иирде піліп аларбын, - таныхтаан Никита Тороков. Андағох сағыстығ полған Вася Сагалаков.
- Кемдір андағ Мот, пілбинчем, че концерт алнында хай пірее сарыннарын ис кӧргем. Минің артизім нимес тиирге кирек. Мин пу сценада Макс Коржты, Бастаны кӧрерге сағынғам. Че пу даа артист пістің кӧңнібісті «тамызар» сағынчам. Мағаа ӧӧні - артист нимес, че тиксі иир паза ибіркізінің кӧңні, - теен оол. Аннаң чараспин пол полбас. Кӧрігҷілер прайзы даа уғаа кӧгліг паза чалахай полғаннар.
Хайди азынада таныхталған, пу пайрамға, школа тоосчатханнардаң пасха, ӧткін чииттер хығыртылғаннар. Оларның пірсі - «Час ханат» эстрада студиязының чиит артизі Алина Канзычакова. Мындағ сыйыхты ол сағыбаан даа полған. Аннаңар, Моттың концертіне билет читірілгенде, уғаа ӧрінген.Ағаа хоза пу артисттің чайаачызы аның кӧңніне тың юрче. Алина пӱӱл 11 классха сыхты, аннаңар килер чылда мындағ концерт полза, ол анда школа тоосчатханнарның санында полар.
ЧОЛЫҢАР АЗЫХ ПОЛЗЫН!
Концерт соонда школа тоосчатхан тӧлні Хакасия пазы Виктор Зимин алғыстаан.
- Олғаннар, алғыстапчам сірерні! Сірернің чуртазыңарда сидік сыныхтағ полды, сірер ЕГЭ-ны чиңдер! Че хынчатхан ӱгретчілерің хада полбаан ползалар, чиңіс тее полбасчых! Олар прай чӱреен паза пілізін сірерге салғаннар! Аның ӱчӱн алғыс сірерге! Ідӧк іҷе-пабаларға алғызым читірчем, - таныхтаан республика пазы. - Олғаннар, сірерні часкалығ чуртас сағыпча. Сірер иң чахсы регионда паза иң артых хазнада чуртапчазар!
Ідӧк пайрамнығ иир алнынҷа школа тоосчатхан чииттерге алғыс сӧстерін республиканың ӱгредіг паза наука министрінің орынҷызы Юрий Сагалаков читірген:
- Прай сыныхтағлар тудыл парды. Салтарлар искірілібӧк парды. Алныңарда наа чуртас. Олғаннар, кӧңніңерге кірчеткен специальностьтарға ӱгренерге кіріңер. Сағынчам, ӱгретчілерің сірерні наа чолға тимнеп салғаннар, киректелчеткен пілістерні пиргеннер. Чолыңар азых, прай ниме чахсы ползын!
Асхыс аймаа администрациязының чииттер киректерінхе ӧӧн специалист Ольга Бытотова чииттерге ідӧк кӧп чахсы ниме алғаан:
- Аарлығ школа тоосчатхан оол-хыстар, алғыстапчабыс сірерні мындағ улуғ чолға сыхчатханнарыңнаң. Чолыңар чарых ползын, прай сағынған сағыстарың толзын! Ӱгренерге парыбызып, іҷе-пабаларыңны ундутпаңар, оларға удаа сығдырат турыңар. Соонаң чолларың ибзер, пос аймахтарынзар айланзын. Пос чирін сірер кӧдірбезе, кем кӧдірер.
Раиса Тодинова ідӧк сағыстарын олғаннарға читірген. Аның хызы пӱӱл школа тоосты.
- Чииттерге чахсы вузтарзар ӱгренерге кіріп аларға алғапчам. Ӱгредииңерні хайди даа тоозып, дипломнығ специалисттер полыңар. Чуртазыңарда маңнаныс ла ползын, - теен ипчі.
Пайрамнығ иир соонаң тигірзер аймах ӧңніг салют атылған.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде