ХАЙТПАС, УТЫРАРҒА КИРЕГӦК
27.06.2018
Хабарлар
Спорт пайрамы. Улуғ даа, кічіг дее марығлар тузында ӧріністер паза хомзыныстар поладыр. Анзын Россияның командазы Уругвайның футболисттерінең ойнааны чахсы кӧзiттi.
Хайдағ ізіг полды Самарада. Кӧлек орыннарда даа 33 - 35 градус ізіг кӧзіткенін киречілепчелер. Аннаңар пістіңнер удаадаң удаа тирлерін чызын турғаннар. Уругваецтер, тізең, ізіг хазнадаң килген улус, іди тың ирееленминчеткен, ибдегі ле чіли ізестіг хайынысчалар тіп чоох тараптыр.
Ізіг ізігнең, че 25 июнь, понедельник, пістің команданың кӱні полбиндыр. Аның алнында ла Саудовскай Аравияның паза Египеттің командаларын ізестіг утхан чир-суғҷыларыбыс Уругвайнаң даа турыстығ ойнабызарларына кӧп кізі ізенген. Аннаңар понедельникте Самарадағы илееде предприятиелерде тынағ кӱні чарлалған. Ол даа сылтағнаң наа пӱдірілген стадионзар 41 муң артиинаң кӧрігҷі чыылысханы таныхталған. Метрода кізілер тикке чӧр турғаннар.
Иң не хомзыныстығ мына ниме - пістіңнер мындағ нандырығлығ ойынны 10 на футболистнең иртіргеннер. Тоғазығ пасталар-пасталбастаңох, сайбағ ӱчӱн марығ чарғыҷызы Маланг Дьедиу Игорь Смольниковты стадионнаң сығарыбысхан. Итсе, ӧӧн чарғыҷы полған сенегалец соонаң даа пістіңнерге харығ пол чӧргенін сізінерге чарир полған. Іди Артем Дзюбаны Уругвайның командазының штраф площадказында аңдарыбысханнарында, пір дее килістіре чарадығ албин, тӧдір айланыбысхан.
Кӧп аймах-пасха сылтағ табарға чарир. Че иң ӧӧні - Уругвайның командазы артых тимненістіг полчатханын тилекей чемпионады пасталар алнындох прайзы даа сизінген. Аннаңар даа пістіңнернің «А» подгруппазында Уругвайға пастағы орын азынадох пирілчеткен. Россия, сынап Саудовскай Аравияны паза Египетті утып алза, ікінҷі орынға сығып алар оңдайлығ. Станислав Черчесовтың командазы позының алнында турғызылған ӧӧн пӧгінні толдырыбысхан, тилекей чемпионадының 1/8 чардығына сығып алған.
Уругвайның футболисттері пӧзік тимненіс кӧзітчеткеннерін ойын хоостыра сизінерге чарир полған. Пірее хати пістіңнер меспек хайдар учуғарын азынада сағынарға маңнанмин халчатханнар. Уругваецтер, тізең, пістіңнер хайди ойнирын, кемге пас пирерін оой ла сизін салчатханнар. Хайди тіпчелер саблығ футболисттер, улуғ марығлар тузында паснаң-мииснең тоғынғаны тик чирге чӱгӱр чӧргенінең хай-хай артых паалалча. Аннаңар Уругвайнаң ойнааны пістіңнерні чахсы сизіндірді: алтын медальға нинҷе чағын тоғазығлар, анҷа пӧзік синде ирт турарлар хайдағ даа марығлар. Анзына тимде поларға кирек.
Россияның футболҷа улуғ тренері Станислав Черчесов Уругвайға 3:0 саннаң утыр салғаннарына тың хомзынчатханын кӧзідерге хынминча, амыр тудынча. Піс амды тилекей чемпионадының 1/8 чардығындағы тоғазығны хайди иртірібізердеңер сағынчабыс, ағаа тимненчебіс теен. Пістіңнерні, тізең, анда тилекей чемпионы полған саблығ Испанияның командазы сағыпча. Испания «Б» подгруппада пастағы орын алған. Аның 5 сан. Олох син сан Португалияның, че ол пір голға асхынах киртір. Аннаңар ікінҷі орында пол партыр. Амды Уругвай 1/8 чардыхта Португалиянаң тоғазар.
Пістіңнер Испанияның командазынаң Москвадағы «Лужники» стадионда 1 июльда тоғасчалар. Оңарылыстығ, ойын уғаа нандырығлығ, сидік оңдайда иртер. Че Россияның командазы ӱчӱн прай хазна «ағырар», чиңіске кӧӧктірер. «Лужники» стадионға чон толдыра чыылыс парары ідӧк тее пілдістіг. Аалҷылар саны асхынах полбас. Россияның городтарынҷа кӧс чӧрчеткен футбол фанаттары муңарлап саналчалар, прай ойыннарны кӧріп аларға харасчалар. Метро 4 час иртенге теере тоғынар.
- Москвада Самарадағы осхас 35 градус ізіг полбас тіп ізендір салғаннар. Футболисттер марыға кӧрілген план хоостыра тимненчелер, - ӱлесче пӧгіннерінең тренер Станислав Черчесов, анаң хосча. - Утырарға кирегӧк. Анзы футболисттерні ӧс аларға, чахсы ойнирға кӧӧктірче.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы