АНЫҢ ПОС КӦРӀСТӀГ ХАЙХАСТЫҒ ХООСТАРЫНДА - ЧИРІНІҢ СІЛИИ
27.06.2018
Статья
Чайаачы чииттерібіс. Пірге хазна сыныхтағлары ирт парды, ортымах ӱгредігні киречілепчеткен аттестаттар холда. Амды чииттерге таллап алған ВУЗ-тарзар пічіктерін пирібізерге халды.
Дарья ТЮРБЕЕВА.
Дарья Тюрбеева Орджоникидзе аймаандағы Копьев аалдағы алынҷа предметтерні тирең ӱгренҷең школаны тоосхан. Математика паза орыс тілі предметтерінең пасха, ол физикаҷа паза обществознаниеҷе пірге хазна сыныхтағларын тутхан. Аның ӧӧн пӧгіні - Хызылчардағы Сибирьдегі федеральнай университеттің архитектура паза пӱдіріг институдынзар ӱгренерге кіріп аларға.
Хайдағ даа кізінің нимее чайалғаны кічігдӧк кӧрін парча. Анаң, олғанның теелбектенер, сарнир, хоостир оңдайын паза пасха даа нимелерге тартылызын кӧріп, хабазыға ӱгретчілер килчелер. Даша Копьевтағы Чайаачы олғаннар кініндегі «Кізі паза тилекей» студиязар 2011 чылда килген. Ӱгретчі Галина Комарова аның хоостар чайир кӧңні чатчатханын ідӧк сах андох кӧр салған. Орджоникидзе аймаандағы олғаннарның хоза ӱгредиинең айғасчатхан кізі іди 11 частығ хызыҷахтың чайаачы оңдайын тилідіп пастаан. Ӱгретчінең ӱгренҷі тестодаң, хуруғ от-чахайахтардаң ниме-ноолар ит сыхханнар. Анаң батикнең паза аймах аппликациялар тимнирінең айғазып пастааннар. Нимее дее чапсынза, Даша тоғызын прай кӧңнін салып толдырчаң.Че иң артых ол хоостар чайирға хынча. Сырларны паза кисточканы холларына алзох, ол ханаттығ хус чіли кӧк тайғалар, хыри-пазы чох чазылар ӱстӱнҷе учухчатхан осхас. Анаң чайалчалар аның пос кӧрістіг хайхастығ хоостары...
- Даша - уғаа чайаачы хызыҷах. Ағаа хоза ол тоғысха кӱс. Ортымах школада даа ол чахсы ӱгренген, -чоохтапча чайаачы хызыҷахтың ӱгретчізі.
Паза Галина Комарова Дашаның хоза пілістер аларға харасхағын таныхтапча. Пӱӱнгі кӱндегі технологияларнаң ол уғаа чахсы тузаланча, позына наа нимелер таап ла алча.
Сағамғы туста Интернет пастыра сынап таа кӧп искіріг таап турарға чарир. Паза ол амғы тӧлге, ибдең дее сыхпин, чоннар аразындағы марығларда аралазар оңдай пирче. Даша Тюрбеева 2015 чылда іди ікі марығда араласхан. Пастағызы «Страна безопасности» адалған, ікінҷізі - «Мы рисуем осень». Хайзында даа пастағы степеньніг дипломнаң таныхтатхан. Дипломнар ағаа ідӧк Интернет пастыра ызылғаннар.
2017 чылдаң сығара,тізең, хоосчы хызыҷах Россия синіндегі марығларда чиңісчілер санында пол сыххан. Пылтырдаңох ол республика марығларында аралазып пастаан. Оларның пірсі «Вот оно какое наше лето!» адалған. Аны республиканың «Хакасия» газетазының редакциязы иртірген. Марығның чиңісчізі полып, Копьевта чурттығ хызыҷах смартфонны холға кирген. Аалдағы 10 класстағы ӱгренҷее ол уғаа чахсы паза тузалығ сыйых полчатпас па. Тиксі чоохтаза, Даша Тюрбеева хайдағ даа синніг марығда алай кӧзідігде аралазарға тимде полҷаң. Орджоникидзе аймаандағы чайаачы пайрамнар аның тоғыстары чох иртпинчеткеннер дее тиирге чарир.
Пылтыр Хакасия правительствозы чарадиинаң республикада чииттер киреенҷе комитет тӧстелген. Анаң ол ведомствоның таниин чайирынча марығ чарлалған. Пурнада иң артых тоғыстарны муниципальнай пӱдістерде, ӧнетін комиссия тӧстеп, таллааннар. Орджоникидзе аймаанда іди Дарья Тюрбеева чиңісчі полыбысхан. Пӱӱл дее аның чахсы чидіглері кӧп полған. Кӧзідімге, Россия синіндегі «Минің кічіг чир-суум: аның чир-чайааны, культуразы паза чоны» марығның региондағы чардығында ол пастағы степеньніг дипломға турысхан. Россияның Хакасиядағы журналисттер пірігізі иртірген «Олғаннар коррупциядаң тоғыр» плакаттар мариинда чиңісчі полыбысхан.
Таныхтирға кирек, прай чӱреенең чайалчатхан хоостарын чонға кӧзідерге Дарьяны ӱгретчізі Галина Михайловна Комарова кӧстепче. Аныңох хабазиинаң пӱӱл школа тоосхан хызыҷах Орджоникидзе аймаа пазынын грантына турысхан. Ӱгретчі кізі ӱгренҷізінің прай чидіглерін, пічікке пазып, устағҷыларға читірген. Мындағ сыйых чыл сай позын чахсы кӧзіткен ӱгренчілерге читірілче. Пӱӱл ағаа Дарья Тюрбеева турысхан!
Че амды аттестатты холға кирген, ӱгретчілерінің чылығ сӧстерін истіп алған чайаачы хызычахха сағынған сағызын толдырыбызарға халды. Пӧзік ӱгредіг заведениезінзер кіріп аларға! Піс тее аның чолы азых ползын тіп алғастарға хозылчабыс.
Александра СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы