КӦРДЕК ОЛАРНЫ, КОРЕЕЦТЕРНІ
29.06.2018
Хабарлар
Спорт пайрамы. Россияда иртчеткен футболда тилекей чемпионады сағыбаан хайхас-таңнастарға пай полчатханын прайзы даа таныхтапча. Анзын Германиянаң Ӱстӱнзархы Корея хайди пасхаҷыл ойнабысханы даа чахсы киречілепче.
Хайдағ даа марығ пасталчатса, прайзының хайиинда ирткен тустағы тилекей чемпионнары. Мында, тізең, пастағы тоғазығлар тузындох кӧрігҷілер пастарын тырбахтанып пастабысханнар: Бразилия Швейцариянаң 1:1 саннаң ойнабысхан, Аргентинаны Хорватия 3:0 саннаң, Германияны Мексика 1:0 саннаң утханнар.
Пасхазы даа тилекей чемпионнары полған командалардаң тоғыр турыстығ ойнирға харасчатхан. Тилекей чемпионады тузында пірее подгруппада уғаа чахсы ойнапчатхан командалар чыылыс парадыр. Аны «ӧлім подгруппазы» тіп адидырлар. Пу чемпионат тузында андағ атха турысхан «Д» подгруппа. Сала даа ікінҷілес чох Аргентина прайзын утарға кирек тіп чарат салғаннар. Че тилекейнің ікі хати чемпионы полған аргентинецтер чадап ла ікінҷі орынға сығып алдылар. Арса, амды маңат тимненіс кӧзідіп пастир, хаҷан чемпионаттың 1/8 чардығына сығып алғанда. Че прайзын саңай алаң астырды позының подгруппазында халғанҷы орында полған Ӱстӱнзархы Кореяның командазы. Ағаа теестегі ойындағы чиңіс пір дее ниме пирбинчеткен тиирге чарир. Аар таста, пеер таста, хайдағ даа ізестіг чиңіс тутса, позының подгруппазында ӱзінҷі орыннаң пӧзік кӧдіріл полбинча, тилекей чемпионадының 1/8 чардығына сыхпинча.
Андағ даа полза, тоғазығ уғаа хазыр оңдайда ирткен. Кӧрігҷілерні сыбыра сизікте тутхан, тың чапсытхан. Хайди тидірлер, Ӱстӱнзархы Кореяның хаалхазы алнында Германияның защитниктері дее ӧткін хайынысханнар, гол кирібізерге матап харасханнар. Че, хаҷасхан чіли, меспек хаалхазар кірерге пір дее хынминча. 1994 чылда даа Ӱстӱнзархы Кореяның футболисттері тилекей чемпионы полчатхан Германияның командазына турыстығ удурласханнар, саңай майыхтыр салғаннар. Ойын соонзар немецтер, кӱстерін прай хорадып, тоғазығ тоозылар алнында чӱгӱр полбин, стадионҷа пастырыс чӧргеннер.
Тоғазығ 1:1 саннаң тоозылғаны кӧп кізіні тың чапсытхан. Нӧӧс ирткен тус хати айланча, нӧӧс ойын 0:0 саннаң тоозылар? Мюллер дее, Кроос таа, пасхазы даа чиңіске парчан кӱстерін салчалар - тик чирге ле. Пірее хати хаалха хадағҷызынаң пірдең пірге сыхчалар, че меспек саба ла учуға халча. Марығ чарғыҷызы 6 минута хосча. Ойын тузында андағ-мындағ тудығлар-тохтағлар пол турғаннар. Тоғазығның ӧӧн чардығы 0:0 саннаң тоозылды. Че «Казань Арена» стадионзар чыылысхан 41835 кізі таразарға маңзырабинча. Хайзы-да команданың футболисттері гол кирібізерін сағыпчалар. Ӱстӱнзархы Кореяның футбол фанаттары ай-сым одырчалар, чир-суғҷыларына харығ полбасха харасчалар. Германия ӱчӱн иртіре «ағырчатханнар», чӱректерін пазын полбин, пластик бутылкаларны стадион чазызынзар тастап пастабысханнар.
Хоза тустың 3 минутазы парчатханда, Ким Ён Гвон Германияның хаалхазына гол кире тебісче. Аны ікінҷілестіге санап, марығ чарғыҷызы видео кӧрерге парча. Стадионда саңай сымзырых. Хаҷан марығ чарғыҷызы меспекті стадионның ортызынзар турғызарға кӧзіткенде, суум-саам тохтабинчатхан. Иптіг кӧрімніг кореянка харах частарын чысчатхан - ӧрінгеніне, пабазының иңніне чаба чадып, оолағас ылғапчатхан - хомзынғанына. Оңарылыстығ, гол кирілген соонаң Германияның командазының прайзы алнынзар кӱрелізе халған - ам даа 3 минута, ам даа саннарны тиңнестірҷен оңдай пар.
Хаалха хадағҷызы даа стадион ортызында чалғысхан пастыр чӧрче. Пу аның иң улуғ алҷаазы полған - меспек немец футболисттерінің дее, хаалха хадағҷызының даа пастары азыра тебілгенде, ағаа прайзынаң пурун чидіп алған кореецтернің капитаны Сон Хын Мин гол кирібіскен. Хайди таныхтапчалар специалисттер, Германия мындағ уйадыстығ оңдайнаң утырғалах полған. Олар хайди даа тилекей чемпионадының 1/4 алай 1/2 чардығына читчеңнер. Тилекейнің тӧрт хати чемпионнары нооза.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы