ХОЙ ӦСКІРЧЕТКЕННЕРНІҢ САНЫ КӦПТЕЛЧЕ
03.07.2018
Хабарлар
Аал хонии. Халғанҷы чылларда Хакасияда аал хониинаң айғасчатханнарға аймах хабазығлар пирілче. Оларның пірсі - аалдағы чиит собірелерге ине хойлар пирері.
Пу программа республика аймахтарында 2011 чылдаң тоғынча. Аны хоостыра 35 часха читкелек аал чуртағҷыларына 20 пасха теере хой пирілче. Ікі чыл пазынаң собіре алған хойларның чарымызын хурағаннарнаң айландыр пирерге кирек, ӱс чыл пазынаң - халған 50 процентін. Хойларны, тізең, постарына артыс салчалар.
Пии аймаанда чиит собірелерге хабазарынҷа программа сигізінҷі чылы тоғынча. Хойлар чыл сай кӱскӱде пирілчелер. Пылтыр пу хабазығны аларына аймахтың аал хонии устанызынзар 10 сурыныс пічии кірген. Читі собірее 20-ер пас хой пирілген.
Куйбышев аалның чуртағҷызы Вера Кандыкова 20І7 чылда хойлар алғаннарның санында полча. Амғы туста ол школада олған чӧрімінің устағҷызы полып тоғынча. Школада ол алты чыл істен салған. Вера Кандыкова Куйбышев аалында тӧреен-ӧскен, андох школа тоосхан. Пабазы Николай Николаевич паза іҷезі Валентина Петровна Кандыковтар хаҷан даа кӧп мал тутчаңнар, аннаңар читі палазы мал ӧскірерге пілче. Че амғы туста Вера ла хыстары аалда чурттығ, пасхазы - Ағбанда.
Вера Николаевна чиит сӧбірелерге хабасчаң программадаңар «Саянская заря» аймах газетазынаң піліп алған. Анда пу хабазығны алып алар оңдайлардаңар чарыда пазыл парған. Пии аймааның аал
хонии устанызынаң хойлар алып алар ӱчӱн, мал азиин паза хазаа тимнеп саларға киректелген. В.Н.Кандыкова хазаанаң от парынаңар аал чобінең пічік алып алған. Аны паза сурыныс пічиин аал хонии устанызынзар пир салған.
Тоғынчатханда, хойларны хаҷан хадарарға маңнанчазар сурыға В.Н.Кандыкова піди нандырған: «Хойларны хадарарға іче-пабам полысча. Оларға улуғ алғызым читірчем. Олар полбаан ползалар, хойлар Ӧскірер оңдай чох поларчых. Хойларны чыл ибіре хадарчабыс. Иртен оларны сығарар алнында чарбанаң, суланаң азырапчабыс, иирде от пирчебіс. Чайғыда суланаң на азырапчабыс. Хойларны позыбыс хырыхчабыс, чахсы хыстадып алғабыс. Хурағаннар даа прайзы хазых. Амды хой санын ӧскірер ӱчӱн хоза хазаа пӱдірерге пӧгінчебіс».
Пу программача Пии аймаанда чыл сай аалдағы 7 - 10 чиит сӧбіре, хойлар алып, пос хониинаң айғазып пастапча.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы