ТОҒЫСТАРДА - РОССИЯ АРМИЯЗЫНЫҢ ТАРХЫНЫ
04.07.2018
Хабарлар
Россияның арачыланыс министрі Сергей ШОЙГУНЬІҢ тоғыстарынаң танысчалар.
Культура. Л.Р.Кызласовтың адынаң чир-суғ ӱгренҷең музейде Хызыл армияның 100 чылына чарыдылған кӧзідіг азылды.
Хакасияның ӧӧн музейінде хынығ кӧзідіглер тӧреміл иртчелер. Анда хайхастығ сомнарны, сағысха тӱзірчеткен хоостарны, чапсых экспонаттарны кӧріп аларға чарир. Пу кӱннерде музейде «Несокрушимая и легендарная» наа кӧзідіг азылды. Ол Хызыл армияның 100 чылына чарыдылған. Улуғ проектті Россияның арачыланыс министерствозының культура департаменті тимнеен.
Чоохтирға кирек, ведомство Хакасиянаң пик палғалыс тутча. Республикада саблығ А.А.Александровтың адынаң сарыннар паза теелбектер ансамбльының концерттері, аймах кӧзідіглер ирткеннер. Амды ол тоғыс узарадылча, ведомство Хакасияның чуртағҷыларын паза аалҷыларын «Несокрушимая и легендарная» проектнең таныстырча. Экспозиция тӧрт чардыхтаң пӱткен. Пастағызында М.Б.Грековтың адынаң чааҷы хоосчылар студиязының тоғыстарын кӧрерге чарир. Мында ӧӧн тоғыс «Хызыл Армияның тӧстелгені» хоос полча. Аны 1954 чылда В.Дмитриевский, Евстигнеев паза Г.Прокопинский чайааннар. Амғы тоғыстардаң Россия Матыры Александр Прохоренконың портредін таныхтирға кирек. Хоосты Ю.Бирюков пасхан. Улуғ лейтенант Александр Прохоренко 2016 чылда 17 мартта Пальмира ӱчӱн чаалазығда арығ тынын пир салған.
Кӧзідігнің ікінҷі чардығы - плакаттар. Олар Россияның тирігліг кӱстерінің ӧӧн музейінде хайраллалчалар. Плакаттар 1919 - 1982 чылларда чайалғаннар. Сағынчам, кӧрігҷілернің хайиин Д.Моорның «Син доброволецке пазын салғазың ма?» саблығ тоғызы тартар. Нинҷе хати аны тархын учебниктерінде, хоос фильмнерде кӧрерге киліскен. Ідӧк кізінің чӱреен «Россияның армиязы» сомнар кӧзідии кӧӧретче.
Че минің кӧрізімнең, проекттің иң хынығ халғанҷы чардығы полча. Мында Россияның арачыланыс министрі Сергей Шойгуның тоғыстары сығарылған. Пос туста Сергей Кужугетович хоостирға, сомға суурарға паза ағастаң ниме-нооларны чайирға хынчаттыр. Харағайдаң иділген чоон вазалар, абдыралар, скульптуралар хайхатчалар.
Оларны кӧріп, сағын салчазың, Сергей Кужугетович скульптор Зураб Церетели чіли килкім не тоғыстар чайапчаттыр. Че аның графика хоостары саңай пасха оңдайлығ. Пу тоғыстары хоостыра сизінерге чарир, арачыланыс министрі - тӧреен чирінің сілиине саңай аптаттыр салған кізі. Хайдағ хыныснаң ол Туваның тағларын, чазыларын хоостапча. Сергей Кужугетович чайаачы тоғыснаң 20 артиинаң чыл айғасчаттыр, че кӧзідігде ол пастағызын на аралазарға чаратхан.
«Несокрушимая и легендарная» кӧзідігні азарында Хакасия пазы Виктор Зимин (ол мероприятиее сӧбірезінең хада килген), Россияның арачыланыс министерствозының культура департаментінің директор орынҷызы Сергей Фральцев, республиканың культура министрі Татьяна Чаптыкова паза Ағбанның устағҷызы Николай Булакин араласханнар. Татьяна Чаптыкованың таниинаң, мындағ улуғ кӧзідіг Хакасияда пастағызын на иртче. Сергей Фральцев Россияның арачыланыс министрі Сергей Шойгуның адынаң чыылған чонны кӧзідіг азылғанынаң алғыстаан. Ол кӧзідіг чахсы иртер, аны Хакасияның прай чуртағҷылары кӧріп аларлар тіп ізеніснең ӱлескен. «Несокрушимая и легендарная» кӧзідіг Хакасияның ӧӧн музейінде чайғы тооза иртер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы